Sunday, February 26, 2017

تورکله‌شمه زاماني


تورکله‌شمه زاماني

مئهران باهارلي

ييرمينجي يوز ايلين باشلاريندا گونئي قافقازدا موساوات فيرقه‌سي، اؤز سيياسي ايسته‌ک- شوعاريني «آزه‌ربايجانلي‌لاشما» دئييل، ضييا گؤک آلپ‌دان اسينله‌نه‌ره‌ک «تورکله‌شمه» (و«ايسلاملاشما، موعاصيرله‌شمه») دييه سئچميشدي. بورادا تورکله‌شمه‌کده‌ن آماج، سيياسيله‌ر و آيدينلارين تورک ميللي کيملييينه قاييديشي؛ سوسيال قوروملار، غزئته‌له‌ر، سيياسي تشکيلاتلار، يئره‌ل دئوله‌ت اورگانلارينين تورکله‌شديريلمه‌سي (آدلارينا «تورک» کليمه‌سي آرتيراراق تورکله‌ره عاييد اولدوقلارينين وورقولانماسي، ديلله‌رينين تورکجه‌له‌شديريلمه‌سي و تورکله‌رله يؤنه‌تيلمه‌سي) ايدي. منيمسه‌نه‌ن بو دوغرو شوعار-ايستيراتئژي قيسا سوره‌ده، آيدينلاردا تورک ميللي بيلينجينين اويانيشي و ان باشدا «تورک عدم مرکزيتچي فيرقه‌سي» اولماق اوزه‌ره، تورک سيياسي تشکيلاتلارين يارانماسينا نده‌ن اولوپ، آرديندان «آزه‌ربايجان خالق جومهورييه‌تي»نين قورولماسينا گتيريپ چيخاردي.

بوگون بيز ايراندا ياشايان تورک خالقي دا تورک آيدين و سيياسيله‌رده تورک ميللي بيلينجله‌نمه‌سيني يئيينله‌شديرمه‌ک و «تورک» آدلي  سيياسي و کولتوره‌ل تشکيلاتلارينين قورولماسيني باشلاتماق اوچون، قاتيقسيز بير «تورکله‌شمه» (و «دئموکراتيکله‌شمه، سئکولارلاشما») سوره‌جينه («آزه‌ربايجانلي‌لاشما» دئييل)، ائحتيياجيميز واردير.

 

مودئرن تاريخده ايراندا ياشايان تورک خالقينين آديندا «تورک» کليمه‌سيني ايچه‌ره‌ن تکجه اوچ تشکيلاتي اولموشدور: سانال دونيادا «تورک دئموکراتيک پيلاتفورمو»، آمئريکادا قورولان «ايران تورکله‌ري کونگرئسي» ايله «ايران تورکله‌ري آراشديرما مرکه‌زي»، و يئنيجه ايران مجليسينده ياراديلان «تورکله‌رله مسکون بؤلگه‌له‌ر نوماينده‌له‌ري فيراکسييونو». بونا رغمه‌ن سون يوز ايلده چوخ ساييدا آزه‌ربايجان آدلي تشکيلات يارانميشدير. بو دا تورک آيدين و سيياسيله‌رينده تورک ميللي شوعورونون اولماييشيني، اونون يئرينه بؤلگه‌چيليک آنلاييشينين حاکيم اولدوغونو گؤسته‌رير. چونکو آزه‌ربايجانلي بير بؤلگه آدي و جوغرافي کيمليکدير، ميللي کيمليک دئييلدير. تورک خالقينين ميللي و ائتنيک آدي، آيريجا ياشاديغي تورک ميللي بؤلگه‌سينين هاميسينين آدي دا، آزه‌ربايجان دئييلدير. اؤته ياندان آزه‌ربايجان کيملييي (مشروطه‌چي پان‌ايرانيست آزه‌ربايجانچيليق و ايستالينيست- ميکويان آزه‌ربايجانچيليغي)، تورک ميللي کيمليييني اينکار ائتمه‌ک اوچون، فارس، روس و ائرمه‌نيله‌رجه ياراديلان ياپاي، ميللي اولمايان و کولونييال کيمليکله‌ردير.

تاريخي پئرسپئکتيوده‌ ايراندا «آزه‌ربايجان تشکيلاتلاري، آزه‌ربايجان اده‌بيياتي، آزه‌ربايجان تاريخي، آزه‌ربايجان شخصييه‌تله‌ري، ....» کيمي قاوراملار، «تورک تشکيلاتلاري، تورک اده‌بيياتي، تورک تاريخي، تورک شخصييه‌تله‌ري، ....» کيمي قاوراملارين اولوشماسينين قاباغيني آلميش، حتتا «تورک ميللي کيملييي» و «تورک وطه‌ني» مفهوملارين اورتايا چيخيشيني بلوک ائتميش و انگه‌ل‌له‌ميشدير. تورکوسو، گئچه‌ن يوز ايلده ايراندا «آزه‌ربايجان اده‌بيياتي، آزه‌ربايجان تاريخي، آزه‌ربايجان شخصييه‌تله‌ري، ....» و بنزه‌ري «آزه‌ربايجان»لي قاوراملار، آنتي‌تورک آزه‌ربايجانچي شخصييه‌تله‌رجه «تورک اده‌بيياتي، تورک تاريخي، تورک شخصييه‌تله‌ري، ....»ني دانمانين اوستو اؤرتولو و ان اؤنه‌ملي آراجي اولموشدور.

تورک سئچگين و آيدينلاري، مشروطه‌چي پان‌ايرانيستله‌رجه (تقي‌زاده، سيد جليل اردبيلي، کسروي، ...) ايران ميلله‌تي و ايران وطه‌نينين بير پارچاسي دييه ياراديلان «آزه‌ربايجان جوغرافي کيملييي»، و روسيا طره‌فينده‌ن (ايستالين، ميکويان، ...) گونئي قافقازدا تورکلويو يوخ ائتمه‌ک اوچون ياراديلان «آزه‌ربايجان ميللي کيملييي»نده‌ن اؤزله‌ريني قورتارماديقجا، ايراندا ياشايان «تورک کيتله‌سينين ميلله‌تله‌شمه‌سي» و ايرانين قوزئي‌باتيسي‌ندا «تورک توپراقلارينين وطه‌نله‌شمه‌سي» ايله تورک خالقينين «ميللي حاقلاريني الده ائتمه‌سي» يولوندا، بير آدديم بيله ايله‌رييه گئده‌بيلمه‌ز. نئجه کي گئچه‌ن يوز ايلده گئده‌مه‌ميشدير.

سون يييرمي ايلده، حتا داها اؤنجه‌له‌ر «وارليق درگيسي»نده‌ن باشلاياراق، ايراندا تورک ديلي، تورک خالقي و تورک کولتورو ايله ايلگيلي الده ائديله‌ن بوتون باشاريلار، -بونا «تورک فيراکسييونو»نون قورولماسي دا داخيلدير-، تورک کيملييينه قاييشديش و وورقو، «آزه‌ري» ايله «آزه‌ربايجانلي» قومي-ميللي کيمليکله‌رينده‌ن قوپوشون و اونلارين نفي ائديلمه‌سينين، يعني کيمليک آلانيندا «تورکله‌شمه»نين (و نه «آزه‌ري‌له‌شمه» و »آزه‌ربايجانلي‌لاشما»نين) باشاريسيدير. ايندي ايسه سيياسي و تشکيلاتلانما آلانيندا «تورکله‌شمه‌‌نين زاماني» گليپ چاتميشدير.

No comments:

Post a Comment

Note: Only a member of this blog may post a comment.