ایران‌دا «آزه‌ربایجان تورکو» دییه بیر ملت و میللی آد یوخدور.
«تورک ملتی» و «تورک میللی آدی» واردیر.
مئهران باهارلی
«آزه‌ربایجان
تورکو» دییه‌ن‌له‌ر بونو بیر «میللی آد» و «ملت آدی» اولاراق ایشله‌دیرله‌ر، جوغرافی
منسوبیتی گؤسته‌ره‌ن و آزه‌ربایجان‌دا یاشایان «تورک» آنلامیندا دئییلدیر. منطیق
گره‌یی بو ایکی قونونو بیر بیرینه قاریشدیرماماق گره‌کیر. ایران‌دا «آزه‌ربایجان
تورکو» دییه بیر ملت و میللی آد یوخدور. «تورک ملتی» و «تورک میللی آدی» واردیر.
ایسته‌ر بو تورک شیرازلی اولسون، ایسته‌ر همدان‌لی، ایسته‌ر آزه‌ربایجان‌لی، ایسته‌ر
بین و سامان‌لی و یا باشقا بیر یئرده‌ن.
هر
هانسی آدلاندیرما کی ایران‌دا باتی اوغوزلارین تک ملت اولدوغونو دانیر و یا تک ملت
اولمادیغینی ایما ائدیر و یا اونلارین میللی آدی‌نین تورک اولمادیغی تصورونو
یارادیر؛ «آزه‌ربایجان تورکو» (میلت آدی اولاراق) کیمی، من و سیزین ایسته‌ک و
دوشونجه‌سینده‌ن آسیلی اولمادان، بیز ایسته‌سه‌ک ده ایسته‌مه‌سه‌ک ده پان‌ایرانیسم-ایستالین‌ین
آنتی تورک ملت یاپما (ایران ملتی، آزه‌ربایجان ملتی) سیاستینه خدمت ائدیر و ایران‌دا
تورک خالقی‌نین ملت‌له‌شمه‌سی ایله تورک توپراق‌لاری‌نین وطن‌له‌شمه‌سینی انگله‌ییر.
بونو دا بؤلگه‌له‌ر اساسیندا یئنی میللی گوروپ‌لار یاراتماق و تورک خالقینی
پارچالاماق، میللی آد و میللی کیملیک و تورک وطنی‌نین حدودو حاققیندا بئیین‌له‌ری
بولاشدیرماق.... یولویلا گئرچه‌ک‌له‌شدیریر.
بونلاری
مانع گؤرمه‌یه‌ن‌له‌ر اولابیله‌ر. آنجاق منیم گؤزومده بونلار و ان باشدا آزه‌ربایجان
اساس‌لی هر هانسی میللی آد و میللی کیملیک (همدان و یا خمسه و .... اساس‌لی باشقا هر
هانسی میللی آد و میللی کیملیک کیمی)، سون یوز ایلده و ایندی ده ایران‌دا تورک
خالقی‌نین ملت‌له‌شمه‌سی و تورک توپراق‌لاری‌نین وطن‌له‌شمه‌سی قاباغیندا ان اؤنه‌ملی
«ایچ مانع»دیر (پان‌ایرانیسم-ایستالینیسم ایسه «دیش مانع»دیر)
ایران
سوویئت آزه‌ربایجانی دئییلدیر کی بوتون باتی اوغوزلار آزه‌ربایجان آدی داشییان
کیچیک و کومپاکت بؤلگه‌ده یاشاسین و آزه‌ربایجان آدی اونلاری بیرله‌شدیرسین. ایران‌دا
بوتون باتی اوغوزلار آزه‌ربایجان آدی اولان بؤلگه‌ده یاشامیر و آزه‌ربایجان‌ین
هامیسی دا تاریخن تورک‌له‌رله مسکون دئییلدیر. دولاییسی ایله آزه‌ربایجان آدی‌نین
بیرله‌شدیریجی رولو دا یوخدور. آزه‌ربایجان آدی منطیق‌سیزلیک‌له میللی کیملیک و
وطن آدی اولاراق ایشله‌دیله‌نده، هم تورک ملتی و هم تورک وطنی‌نی بؤلور و هر
ایکیسینی پارچالایاراق «تورک ملتی» و «تورک وطنی» قاوراملارین اولوشماسی‌نین
قاباغینی آلیر. ایران‌دا پان‌ایرانیست‌له‌ر و پارسی‌له‌رین تهران‌دا «انجمن
آزربایجان»ی قوردوقلاری گونده‌ن بری، آزه‌ربایجان آدی‌نین ان آزی ١٢٥ ایل‌دیر بئله
بؤلوجو-آیریشدیریجی، ضد ملی و آنتی تورک بیر ایشله‌وی واردیر.
آیریجا
کیمسه‌نین حقی یوخدور البورز اوستانی ساوجبلاغ‌ین‌دا یاشایان تورکو زورلا «آزه‌ربایجان
تورکو» و اوراداکی تورک وطنی‌نی زورلا آزه‌ربایجان یاپسین و یا اوراسی آزه‌ربایجان‌دا
دئییلدیر دییه تورک وطنی دیشیندا سایسین... آزه‌ربایجان و شیراز و
همدان و خوراسان، ... بؤلگه‌له‌رینده یاشایان تورک اینسانی‌نین جوغرافی انتسابینی
گؤسته‌رمه‌ک اوچون، ان منطیق‌لی آدلاندیرما، آزه‌ربایجان‌لی تورک، شیرازلی تورک،
همدان‌لی تورک؛ خوراسان‌لی تورک،.... دور.
No comments:
Post a Comment