İran’da “Azerbaycan Türkü” diye bir millet ve milli ad yoxdur

İran’da “Azerbaycan Türkü” diye bir millet ve milli ad yoxdur. “Türk” millet ve “Türk” milli adı vardır

Méhran Baharlı

“Azerbaycan Türkü” diyenler bunu bir Milli ad ve Millet adı olaraq işledirler, coğrafi mensûbiyeti gösteren ve Azerbaycan’da yaşayan “Türk” anlamında déyildir. Mentiq gereyi bu iki qonunu bir birine qarışdırmamaq gerekir. İran’da “Azerbaycan Türkü” diye bir millet ve milli ad yoxdur. “Türk” milleti ve “Türk” milli adı vardır. İster bu Türk Şirazlı olsun, ister Hemedanlı, ister Azerbaycanlı, ister Binli ve Samanlı veya başqa bir yérden.

Her hansı adlanırma ki İran’da Batı Oğuzların tek millet olduğunu danır, veya tek millet olmadığını îmâ édir, veya onların milli adının “Türk” olmadığı tesevvürünü yaradır, (“Azerbaycan Türkü” millet adı kimi), men ve sizin istek ve düşüncesinden asılı olmadan, biz istesek de istemesek de Paniranism-İstalinism’in anti Türk millet yapma (İran milleti, Azerbaycan milleti) siyâsetine xidmet édir ve İran’da Türk xalqının milletleşmesi ile Türk topraqlarının vetenleşmesini engelleyir. Bunu da bölgeler esasında yéni milli quruplar yaratmaq ve Türk xalqını parçalamaq; milli ad ve milli kimlik ve Türk veteninin hudûdu haqqında béyinleri bulandırmaq … yoluyla gérçekleşdirir.

Bunları mâné görmeyenler olabiler. Ancaq menim gözümde bunlar ve en başda Azerbaycan esaslı her hansı milli ad ve milli kimlik (Hemedan veya Xemse ve … esaslı başqa her hansı milli ad ve milli kimlik kimi), son yüzilde ve indi de İran’da Türk xalqının milletleşmesi ve Türk topraqlarının vetenleşmesi qabağında en önemli İç mânédir (Paniranism-İstalinism ise Dış manédir).

İran Sovyét Azerbaycanı déyildir ki bütün Batı Oğuzlar Azerbaycan adı daşıyan kiçik ve kompakt bir bölgede yaşasın ve Azerbaycan adı onları birleşdirsin. İran’da bütün Batı Oğuzlar Azerbaycan adı daşıyan bölgede yaşamır ve Azerbaycan’ın hamısı da târixen Türklerle meskûn déyildir. Dolayısı ile Azerbaycan adının birleşdirici rolu da yoxdur. Azerbaycan adı mentiqsizlikle milli kimlik ve veten adı olaraq işledilende, Türk milleti ve Türk vetenini bölür ve her ikisini parçalayaraq Türk milleti ve Türk veteni qavramların oluşmasının qabağını alır. Paniranistler ve Parsîlerin Téhran’da Encümen-i Azerbaycanı qurduqları günden beri, Azerbaycan adının en azı 125 ildir béle bölücü - ayrışdırıcı, zidd-i milli ve anti Türk bir işlevi vardır.

Ayrıca kimsenin haqqı yoxdur Elburz Ostanı Savucbulaqında yaşayan Türkü zorla Azerbaycan Türkü ve oradakı Türk vetenini zorla Azerbaycan yapsın. Veya orası Azerbaycan’da déyildir diye Türk veteni dışında saysın…. Azerbaycan ve Şiraz ve Hemedan ve Xorasan … bölgelerinde yaşayan Türk insanının coğrafi intisâbını göstermek üçün ise, en mentiqli adlandırma Azerbaycanlı Türk, Şirazlı Türk, Hemedanlı Türk, Xorasanlı Türk ….dür.