ایستانبول بلدیه سئچیم‌له‌ری
ایستانبول بلدیه سئچیم‌له‌رینی ایمام‌اوغلونون
قازانماسی، تورکییه‌ده هله ده دئموکراسی‌نین جانلی اولدوغو و اؤلمه‌دییی‌نین
سونوجودور. بو سونوج، تک آدام رئژیمینه، شریعت‌چی‌لییه، حقوق‌سوزلوغا، یول‌سوزلوق
و قاییرماچی‌لیغا، سیاسی اخلاق‌سیزلیغا؛
آیریش‌دیریجی، اؤته‌کی‌له‌ش‌دیریجی، کین و نفرت تمه‌ل‌لی سیاست آنلاییشینا؛ دیش
سیاست‌ده گرگین‌لییه، دین‌چی و ایسلام‌چی طریقت و مافیالارا، پیس یؤنه‌تیلمه‌یه؛ ائکونومیک
دورقون‌لوق، ایش‌سیزلیک، باهالیق و اؤزه‌للیک‌له اردوغان‌ین دامادی‌نین ائکونومینی
چؤکه‌رتمه‌سینه؛ .... وئریله‌ن تپگی، گؤسته‌ریله‌ن اؤفکه‌دیر؛ بونلارین مودئرن
و دئموکراتیک تورکییه‌ده یئری اولمادیغی‌نین قانیتی‌دیر.
پ.س: آکپ‌نین ایستانبولو اوتوزماسی‌نین
بیر چوخ نده‌نی واردیر. آیریجا سانمیرام آکپ بو سونوجو ده‌ییشدیره‌بیلسین. اؤلکه
چاپیندا اؤزه‌للیک‌له شهه‌رله‌رده ایستانبول، آنکارا، ایزمیر .... آکپ دوشوشه گئچمیش‌دیر.
منجه سونو آناوطن پارتیسی کیمی اولاجاق و پارچالانیپ یوخ اولاجاق‌دیر ....
اردوغان‌ین گوجله‌نمه‌سی مومکون دئییل‌دیر.
ذاتن آکپ تک باشینا ایقتیداری جمهورباشقان‌لیغی سئچیمینده ایتیردی. اوندان سونرا
ائتلافا مجبور اولدو. ایندی ده اردوغان اؤزو اؤزونو توزاغا دوشوردو و سئچیمی
اوتوزدو. ایستانبولو اوتوزماق، اؤزونون ده دئدییی کیمی تورکییه‌نی اوتوزماق‌دیر. آکپ
ایدئولوژیک پارتی دئییل‌دیر. شخصه باغلی‌دیر. اردوغان ضیعف‌له‌یینجه او دا
پارچالانیپ یوخ اولاجاق‌دیر. ایندی ده تورکییه‌نین بؤیوک شهه‌رله‌رینده‌ن، ایستانبول،
آنکارا، ایزمیر ... الی کسیلمیش. گول-باباجان ایلیم‌لی ایسلامچی‌لاری قورتارماق
اوچون یئنی پارتی قورونجا- کی قوراجاق‌لار- آکپ‌نین رسما سونو و پارچالانما سوره‌جی
باشلار. اردوغان ایسه آرتیق امه‌ک‌لی‌لییه -تقاعدا- آیریلمالی. دئموکراسی‌له‌رده سئچیم‌له گله‌ن، سئچیم‌له گئده‌ر.
No comments:
Post a Comment