علی‌یف و ایمضالانان آنلاشما
شو آنا دک الده اولان (و ده‌ییشه‌بیله‌جه‌ک، دوزه‌لتیله‌بیله‌جه‌ک، بوتون‌له‌شه‌بیله‌جه‌ک) بیلگی‌له‌ره گؤره:
تورکییه یالنیز گؤزله‌م مرکزی‌نده آدام بولوندوراجاق، باریش گوجو ساده‌جه روس اوردوسوندان و بو گؤزله‌م مرکزی ده قاراباغ دیشی‌نداکی توپراق‌لاردا اولوشدورولاجاق‌دیر.
علی‌یف بو آنلاشمانی- کی خان‌کندی‌نین دوشمه‌سی‌نین قاباغی‌نی آلدی، قاراباغ‌ین یوزده آلتمیشی‌نی- ٪٦٠نی روس‌لارا و دولایی‌سی‌یلا ائرمه‌نی‌له‌ره بیراخدی و آزه‌ربایجان دولتی و اوردوسونون اورایا گیرمه‌سی‌نه انگه‌ل اولدو- ایمضالاماق ایسته‌میردی. آنجاق اردوغان بیر سیرا نده‌ن‌له‌‌رده‌ن دولایی (روسیا ایله لیبی و سوریه قونوسوندا قارشی‌لیق‌لی تعویض‌له‌ر؟)؛ وباکی‌یا گئده‌ن چاووش‌اوغلو، آکار، فیدان و باشقا تورکییه‌لی یئتگی‌لی‌له‌ر، علی‌یف‌ی سویوق باخدیغی بو آنلاشمانی ایمضالاماسی اوچون اقناع ائتدی‌له‌ر. (بعضی آنالیست‌له‌ر، بو یازی‌دا سونولان سئناریونون تام ترسی‌نی ایله‌ری سورمه‌ک‌ده‌دیر. اونلارا گؤره علی‌یف، بو آنلاشمانی تورکییه ایله ایستیشاره ائتمه‌ده‌ن، اؤز قراری ایله و تر تله‌سیک ایمضالامیش‌دیر).
اویسا بو آنلاشما علی‌یف‌ین سون گونه ده‌ک اصرارلا سؤیله‌دیک‌له‌ری‌نین ترسی‌نه‌دیر: باریش گوجونون آزه‌ربایجان‌ین ایچينده یئرله‌شه‌مه‌یه‌جه‌یی، قاراباغ‌ا سیاسی –عسکری اوتونومی وئریله‌مه‌یه‌جه‌یی، آزه‌ربایجان اوردوسونون ایستاتوسو ده‌ییشدیردییی اوچون «تمه‌ل ایلکه‌له‌ر»- بازال پیرینسیپ‌له‌رین آرتیق گئچه‌رلی اولمادیغی، جبهه خطی‌نین وار اولماماسی، آزه‌ربایجان دولت و اوردوسونون بوتون قاراباغ‌ا حاکیم اولماسی گره‌کدییی، ...
بو آنلاشمانین آیرینتی‌لاری اوزه‌رینده چالیشمالار سوره‌رکه‌ن، بیرده‌ن بیره آنلاشمانین ایمضالانماسی‌نین نده‌نی ایسه، روس هئلیکوپتئری‌نین ائرمه‌نیستان توپراق‌لاریندا آزه‌ربایجان اوردوسو طرفینده‌ن- شبهه‌لی بیچیم‌ده- دوشورولمه‌سی و بونا روسیانین وئره‌جه‌یی اولاسی عسکری تپکی‌نین- ساواشا گیرمه‌سی‌نین- آزه‌ربایجان لیدئرلییی‌نده یاراتدیغی تمه‌ل‌سیز پانیک ایدی (بعضی‌له‌ری‌نه گؤره بو هئلیکوپتئر، آزه‌ربایجان اوردوسوندا اولان روس آژان‌لاری طرفینده‌ن، آزه‌ربایجان‌ی باریش آٚنلاشماسی‌نی ایمضا آتماغا مجبور ائتمه‌ک اوچون- دوشورولدو).
اردوغان‌ین آنلاشما حاققی‌ندا ایییمسه‌رلییی ایسه آبارتی‌لی و اونو چکیجی و اولوملو گؤسته‌رمه‌ک اوچون‌دور. اویسا بو آنلاشما- ایندیکی دورومویلا- یوخ اولماق و یئر یوزونده‌ن سیلینمه‌ک اوزه‌ره ایکه‌ن، قوندارما آرتساخ جمهوریتی‌نی قورتاردی، اونو قالیجی‌لاشدیردی و گله‌جه‌ک‌ده ائرمه‌نیستان‌ا ایلحاقی‌نین یولونو آچدی...
ایلهام علی‌یف، بیر پولیتیکاجی، دیپلومات، اؤلکه اؤنده‌ری، آزه‌ربایجان اوردوسو و ایکینجی قاراباغ ساواشی‌نین اولو باش‌قوموتانی اولاراق (بو سون آنلاشما دیشی‌ندا)، و ده تاریخی اؤلچه‌ک‌ده، آزه‌ربایجان‌ین میللی و مودئرن اوردوسونو یاراتماق‌دا، و سون درجه دنگه‌لی، اوزاق‌گؤروش‌لو و اوس‌لو اولان دیش سیاستی‌نده، اولدوقجا باشاری‌لی، میللی، بیلگه و اوستاجا بیر پئرفورمانس سرگی‌له‌میش‌دیر. علی‌یف گئنه‌ل‌ده سؤز دالاشیندان اوزاق دورور، دویقوسال داورانماز و گره‌کدییینده دویقولاری‌نی سویوق قانلی‌لیق‌لا کاموفلاژ ائتمه‌نی بیلیر.
No comments:
Post a Comment