Sunday, February 7, 2016

خالق آرتيستي، اورمولو قاوالچي يزدان نيك‌بخت: اينسانلاري شاد ائتمه‌ و اونلارين گولومسه‌مه‌سيني گؤرمه‌ني سئويره‌م.


خالق آرتيستي، اورمولو قاوالچي يزدان نيك‌بخت: اينسانلاري شاد ائتمه‌ و اونلارين گولومسه‌مه‌سيني گؤرمه‌ني سئويره‌م.

مئهران باهارلي

Monday, November 15, 2010

اوخوياجاغينيز يازي، اورمولو قاوالچي يزدان عمي (يزدان نيک‌بخت) ايله ياپيلان ايکي سؤيله‌شي تمه‌لينده حاضيرلانميشدير. بو يازي، طره‌فيمده‌ن يزدان عمي`نين بو ايکي موصاحيبه‌ده فارسجا يايينلانان يانيتلارينين بيرله‌شديريليپ دوزه‌نله‌مه‌سي و داها سونرا توركجه‌يه چئوريسينده‌ن اولوشور. يازي يزدان به‌ي'ين ديلينده‌ن آنلاتيلميش کيمي يازيلميشدير.

١-بو سؤيله‌شيله‌رين اصلي توركجه اولسا دا، اوزوله‌‌ره‌ک اونلاري ياپانلار تورکجه متني وئرمه‌ميش و يالنيز اونون فارسجا چئويريسيني يايينلاميشديرلار. بئله دوروملاردا، اؤزه‌لليکله سؤيله‌شي تورکجه ياپيلميشسا، فارسجايا اک اولاراق تورکجه ‌ده يايينلانماسي گره‌کير.

٢-اورمولو قاوالچي، خالق صنعه‌تچيسي، اولو اينسان يزدان عمي`ني تورك و آزه‌ربايجان كولتورو و موزييينه ائتدييي عؤمور بويو خيدمه‌تينده‌ن دولايي، ايلگيلي و يئتگيلي درنه‌كله‌ريميز آغيرلامالي و گئج اولمادان، بيله‌سينه ياراشان بير تقدير اؤدولو و يا تشه‌ککور پيلاكئتي سونماليديرلار.

٣-يزدان به‌ي سؤيله‌شيسينده بير سيرا تورکجه گولدورو ييرلاري (ترانه‌هاي فکاهي) بسته‌له‌ديييني سؤيله‌يير. موزيک قونوسو ايله ايلگيله‌نه‌نله‌ر و اوزمانلارين بونلاري بير آن اؤنجه ثبت ائتمه‌سي، درله‌ييپ توپلاماسي، بير آرايا گتيريپ يايينلاماسي تاريخي اؤنه‌مه‌ صاحيب ميللي بير گؤره‌دير.

٤-يزدان عمي کيمي شخصييه‌تله‌ريميزين تانيتيلماسي، سؤيله‌شيله‌رينين يازيلي، سس و گؤرونتو اولاراق تورکجه ثبت ائديلمه‌سي، حاقلاريندا يازيلان يازيلاردا تورک کيمليکله‌رينه وورقو ياپيلماسي، ...؛ تورک ميللي کيمليک ايله مده‌ني ميراثيميزا صاحيب چيخمانين، اونلاري يازيلي تاريخده ثبت ائتديره‌بيلمه‌نين گره‌يييدير. بو آيريجا خالقيميزين تورک و اورمونون آزه‌ربايجان اولماديغيني ايدديعا ائده‌نله‌ره وئريله‌بيله‌جه‌ک ان ائتگيلي يانيتلاردان بيريدير.

مئهران باهارلي

من يزدان نيک بخت ...







"من يزدان نيك بخت`ه‌م. آتامين آدي حوسئين`دير. اورمولويام. جدله‌ريم ده اورمولودورلار. من "مهدي القدم" يؤره‌سينده (محله‌سينده) يوخسول و چوخ اوشاقلي بير اوغوشدا (عاييله‌ده) دونيايا گلميشه‌م و اورادا دا بويا باشا چاتميشام. ايندي ائويم "ابوذر" اوراتيندادير (خييابانيندادير). آلتميش (آلتي) ياشيندايام و ائولي اولان بير اوغلوم واردير.

منيم گؤزله‌ريم كؤرپه چاغلاريمدان سورونلو ايدي. بوندان دولايي چتين ايشله‌ري گؤره‌بيلمه‌زديم. آتام يوخسول بير كيشي اولدوغوندان دولايي، بيز اوشاقلار اؤيره‌نيم گؤره‌مه‌ديك و بو اوزده‌ن ده من اوخوريازار دئييله‌م. من چاغا ياشلاريمدان عاييله‌مين گئچيمينه کؤمه‌ک ائتمه‌يه مجبور ايديم. قاوال چالماني دا سئوديييم اوچون، بو يولو سئچديم.

من اوشاقليقدان تورک ييرلارينا (ماهنيلارينا) ايلگي دويارديم. منه ايلك كز يير اوخوما و قاوال چالماني، اورمو`دا آزه‌ربايجان كويونون (موسيقيسي‌نين) اسكي اوزلولاريندان (هنرمندله‌رينده‌ن) اولان "سلام دشتي" اؤيره‌تدي. او مني اؤز يانيندا دويون تويلارينا (جشن عروسي) آپاراردي. او دؤنه‌مله‌رده منه ييرمي تومه‌ن ترگه (دستمزد) وئره‌رديله‌ر.

من اللي ايلدير قهوه‌ائوله‌ري و گزيمليكله‌رده (پاركلاردا) يير اوخويورام. بو منيم تک ايشيم اولموشدور. اون بئش ياشيمدان بري بوگونه‌ده‌ك ده بو يولدان گئچينميشه‌م. دئوريمده‌ن (اينقيلابدان) اؤنجه دويون تويلاريندا دا سؤيله‌يه‌رديم. آنجاق دئوريمده‌ن سونرا يالنيز گزيمليك و يؤره‌له‌رده اوخويورام. ساواش ايلله‌رينده سککيز ايل قاوالي اليمه آلماديم. بو سوره‌ده، ساواش بيتينجه‌يه دک، ايشچيليک (عمله‌ليک) ائديرديم. بوگونه دک هئچ بير دئوله‌ت مامورو منده‌ن ماهني اوخومامامي ايسته‌مه‌ميش، قاوال چالماغيما انگه‌ل اولماميشدير.

من آزه‌ربايجان ماهنيلارينا چوخ قولاق آسارام. منده اوستا آزه‌ربايجان ييرچيلاريندان (خواننده‌له‌رينده‌ن) چوخ ساييدا اسكي كاسئتله‌ر واردير: حاجي بابا، تئيمور موصطافايئف، رشيد بئهبودوف، زئينه‌ب خانلارووا و.س... آنجاق تانري يارليقاسين (آللاه رحمت ائتسين)، حاجي بابا`ني هاميدان چوخ سئوه‌رديم. او اولو بير اينساندي. من آزه‌ربايجان سي‌دي‌له‌رينده‌ن ده اؤيره‌نه‌ره‌م.
 
گئچميشده آراسيرا فارسجا "كوچه بازاري" ماهنيلاريني دا اوخويارديم. آنجاق اؤزوم توركجه يير سؤيله‌مه‌ني سئويره‌م، فارسجا ماهنيلاري چوخ سئومه‌م. من آزه‌ربايجان ماهنيلارينين وورقونويام. او دؤنه‌مده بيله فارسجا اوخومازديم. بير سيرا گولدورو (فكاهي) ييرلاريني اؤزوم باغداييپ (تصنيف ائديپ) اوخويارام. بو، ييري اوخودوغوم يئره باغليدير. قادينلارين اولدوغو اه‌يله‌شمه‌له‌رده (مجليسله‌رده) سايقينليغا آرتيقراق اؤنه‌م وئره‌ره‌م. ايلله‌ر قاباق، نفه‌سيم گوجلو و بلله‌ييمين (حافيظه‌مين) ايتي اولدوغو گونله‌رده، چوخ ساييدا ماهنيني ازبه‌ره بيليرديم و ياخشيراق، داها گور سسله اوخويارديم. ايندي ايسه ياشلانميشام. آنجاق اينسانلاري شاد ائتمه‌ و اونلارين گولومسه‌مه‌سيني گؤرمه‌ني سئويره‌م.

اوغلوم، منيم خييابانلاردا اينسانلارا ماهني اوخوماغيمدان اؤتورو دارقينج (راحاتسيز) اولماز. او، ايلك باشدان منيم ايشيمين گزيمليكله‌رده يير سؤيله‌مه‌ك اولدوغونو بيلير. اؤزوم ده گزيمليك و اوراتلاردا يير سؤيله‌مه‌، اينسانلارين منه آقچا (پول) وئرمه‌سينده‌ن، يا دا منيمله هنه‌ک (شوخلوق) ائتمه‌سينده‌ن كسينليكله دارقينج اولمام. بيرينجيسي، بو منيم ايشيمدير. ايكينجيسي، من اينسانلارين منيم يير سؤيله‌مه‌مده‌ن سئوينديكله‌ريني گؤروره‌م. من ده اونلاري سئوينديره‌بيلديييمده‌ن سئوينجلي اولورام. يالنيز، بير سيرا گنجله‌ر منيمله اويقونسوز شوخلوقلار ائديرله‌ر. من اونلارا دا دؤزوملو داورانارام. چونكو نه ده اولسا، اونلار گنجديرله‌ر.

من ده اؤز پاييما، آزه‌ربايجان`ين اكينجي (فرهنگي) اوغروندا امه‌ك وئريره‌م. آنجاق ايندييه‌ده‌ك اركله‌ت (دولت) و اكينج اؤزده‌كله‌رينده‌ن (مرکزله‌رينده‌ن) هئچ بير كؤمه‌ك آلماميشام. ذاته‌ن اونلار بيزله‌ري به‌يه‌نمه‌زله‌ر بيله. بوگونه‌ دک ده دئوله‌ته باغلي هئچ كيمسه‌نين، منيم اؤلوپ قالديغيمي سوروپ سوروشدوغو اولماميشدير. من كيمسه‌ده‌ن كؤمه‌ك گؤزله‌ميره‌م. آنجاق منيم گؤروتومو (عكسيمي) اؤز گونده‌لييينيزده (روزنامه‌نيزده) چاپ ائده‌رسه‌نيز، كسينليکله منده‌ن گؤزه‌ل بير گؤروت سالين و گونده‌لييينيزده‌ن بير نوسخه‌سيني منه ده وئرين."

قايناق:

١-فاريابي، فرشيد. خوابت آشفته مباد! هفته‌نامه فرداي ما. پنجشنبه ١٥ آذر ماه ١٣٨٦- شماره ٢٤٠
٢-کیومرثی، زیبا. یزدان، پیرمردی که ۵۰ سال است می‌خواند. خبرگزاري شبستان، رسانه حوزه دين، فرهنگ و انديشه.

No comments:

Post a Comment

Note: Only a member of this blog may post a comment.