Thursday, May 17, 2018

ائف-٣٥، بيزيم «اؤنجه تورک خالقيميز» و اونلارين «اؤنجه تورکييه» شوعاری

ائف-٣٥، بيزيم «اؤنجه تورک خالقيميز» و اونلارين «اؤنجه تورکييه» شوعاری

مئهران باهارلی

آمئریکادا ائف-٣٥له‌رین تورکییه‌یه وئریلمه‌مه‌سی و تئکنولوژیسی‌نین تورکییه‌یه تیرانسفئر ائدیلمه‌سی‌نین قاباغینی آلماق اوچون، گوجلو بیر ایسراییل یانلیسی لوبی واردیر. بو لوبی تورکییه‌نین ائف-٣٥ یاپیمی اوچون اولوشدورولان کونسئرسییومدان ایخراج ائدیلمه‌سی، تورکییه‌یه ائف-٣٥له‌رین وئریلمه‌مه‌سی، ائف-٣٥ تئکنولوژیسی‌نین تورکییه‌یه تیرانسفئر ائدیلمه‌مه‌سی و بو باغلامدا تورکییه‌یه آمبارقو –بایکوت قویولماسینی ایستیر. گئچه‌ن هفته بو تحریم و بایکوتون آیرینتیلی لاییحه‌سی کونگره‌یه - که اورادا هم جومهورییه‌تچی‌له‌ر و هم دئموکراتلار گؤزو باغلی ایسراییل یانلیسی‌دیرلار- وئریلدی.


اردوغان‌ین ایسراییل‌ه قارشی سون سالووْلاری-چیخیشلاری بو لوبی‌نین خئیرینه اولاجاق و ائف- ٣٥ تئکنولوژیسی قونوسوندا بؤیوک ائحتیماللا (تیرامپ بیر مؤعجوزه ایله ایقتیداردان اوزاقلاشمازسا) تورکییه‌نین تحریم ائدیلمه‌سی ایله سونوجلاناجاقدیر. چونکو آمئریکانین ایندیکی اورتا دوغو و تورکییه ایله ایلگیلی خاریجی سییاسه‌تینی، آمئریکا یؤنه‌تیمی دئییل، نئتانیاهو بلیرله‌ییپ دیکته ائدیر.

اردوغان غزّه اولایلارینی گونئی آفریقا و آوروپا دئوله‌تله‌ری گیبی، دیپلوماتیک یوللارلا و تورکییه‌نین میللی چیخارلارینی گوده‌ره‌ک پروتئست ائتمه‌لی و اؤلچونو قاچیرمامالی ایدی. آنجاق سئچیمله‌رده اویلارینی چوخالتماق اوچون و ایسلامچی رئفلئکسله‌رله --که اوندان بیر تورلو قورتولابیلمیر-، گینه ده اؤزونو امّت لیدئری سانیپ، آشیری‌یا قاچدی.....

تورکییه سییاسی‌له‌رینین اؤزه‌للیکله دیش و بؤلگه قونولارینداکی شوعاری، «ایلک اؤنجه تورکییه» اولمالیدیر. عینه‌ن بیزیم سییاسی‌له‌ر گیبی کی شوعاریمیز همیشه «ایلک اؤنجه تورک خالقیمیز» اولمالیدیر. (بیز مخصوصه‌ن عره‌ب و فیلیسطین مساله‌سینده ایفراطدان اوزاق دورمالی‌ییق. فیلیسطین و عره‌بله‌رین چوخو هم قاراباغ، هم ائرمه‌نی سوی‌قیریمی، هم جیلولوق و هم پ‌ک‌ک -کورد مساله‌سینده ... آنتی تورک و ائرمه‌نی-آسورو-پ‌ک‌ک یانلی قونوملاری واردیر). طبیعی تورک اینسان حاقلاری آکتیویستله‌ری‌نین شوعاری فرقلی و هر زمان «ایلک اؤنجه اینسان» اولمالی‌دیر. ایسلامچی‌لارین شوعاری ایسه، «ایلک اؤنجه امّت»، آنلامسیزدیر. چونکو آرتیق «ایسلام امّتی» دییه بیر شئی یوخدور ....

تیرامپ‌ین ایقتیداریندا آمئریکا یؤنه‌تیمینده تورکییه دوشمه‌نی چوخ جیددی بیر هاوا یارانمیش و درینله‌شیپ گئنیشله‌مه‌کده‌دیر. آمئریکادا ایفراطی اسراییل لوبیسی، ائرمه‌نی‌له‌ر، یونانلار، روملار، کوردله‌ر، عره‌بیستان یانلیلاری، ائوانجئلیست و خیریستییان فاناتیکله‌ر، گوله‌نچی‌له‌ر، چئشیتلی ایرانلی-فارس گوروپلاری .... هامیسی تورکییه علئیهینه بیرله‌شمیش دورومدالار. بو دا خئیره علامه‌ت دئییلدیر. چونکو گئنه‌لده تاریخده دوشمه‌نله‌رین سینئرژی یاراتماسی و هم‌جهت-یؤنده‌ش اولماسی، تورکله‌ر اوچون فاجیعه ایله سونوجلانمیشدیر: ایراندا اینگیلیز، روسییه، زردوشتی-پارسی، پان‌ایرانیست، فارسچی‌لار، ائرمه‌نی، مانقورت تورکله‌ر، باستانگرالار، شئیخی-بابی-بیانی-ازلی، ....بیرله‌شمه‌سی سونوجوندا قاجارین سوقوطو، و روسیا، بوتون آوروپا ایله عره‌بله‌رین بیرله‌شمه‌سی سونوجوندا عوثمانلی‌نین پارچالانماسی گیبی.....

تورکییه‌نین اؤنوموزده‌کی اوچ ایلده دیپلوماتیک داورانماسی و ایسراییلی تحریک ائتمه‌کده‌ن چکینمه‌سی گره‌کیر. تورکییه هم نئتانیاهویا قارشی، هم ده تیرامپا قارشی آوروپا اؤزه‌للیکله اینگیلتئره، آلمانیا، فیرانسا و روسییا ایله بیرلیکده حرکت ائتمه‌لی‌دیر. چونکو اونلار دا تورکییه قده‌ر نئتانیاهو-تیرامپ ایکیلی‌سینده‌ن راحاتسیزدیرلار. تورکییه اؤز مشروع ایسته‌کله‌رینی اونلارین الی ایله گئرچه‌کله‌شدیرمه‌لی‌دیر.

یوخسا ایسراییل-نئتانیاهو آمئریکانین ایندیکی خاریجی سییاسه‌تی‌نین گئرچه‌ک رئیسی‌- تورکییه‌‌یه جیددی سورونلار یارادابیله‌ر: قیبریس‌ین تورک بؤلوموعلئیهینه روملار و یونانیستانلا پئترول-عسکری آنلاشمالار یاپماق، سورییه‌نین اوچده بیرینی پ‌ک‌ک‌یا ساواش غنیمتی اولاراق وئرمه‌ک، ائرمنی سوی‌قیریمینی تانیتماق، ائف-٣٥ قونوسوندا تورکییه‌یه اوچاق-تئکنولوژی آمبارقوسو قویماق، میصیر و عره‌بیستانی تورکییه‌یه قارشی تحریک ائتمه‌ک و قوللانماق، قاراباغ‌ین ائرمه‌نیستانا ایلحاقینی قولایلاشدیرماق، تورکییه‌نی ناتودان آتمایا چالیشماق..... ایسراییل‌ین بونلاری یاپمایا گوجو واردیر و اصلینده هامیسینی دا بیره‌ر بیر‌ه‌ر یاپمایا باشلامیشدیر.

آنجاق تیرامپ اوچ ایل سونرا کسین، بلکه ده نئتانیاهو ایله بیرلیکده گئدیجی‌دیر. آمئریکادا خالقین بؤیوک بیر بؤلومو تیرامپدان نفرت ائدیر، حتتا آمئریکا یهودیله‌ری‌نین یوزده ٥٠‌سی نئتانیاهو و تیرامپا قارشیدیر، اونلارین تکجه یوزده ١٥ی تیرامپ و نئتانیاهویو حمایت ائدیر.... بو اوچ ایلی تورکییه ساغلیقلا باشا چاتدیریرسا، اوندان سونراسی راحاتدیر.

بو اوچ ایلده تورکییه نیظامی صنایئعینی اؤزله‌للیکله فوزه ساوونما سیستئمینی –دفاع موشکی (اس ٤٠٠، ...) و هاوا قوّتله‌رینی (ائف ٣٥ ایسکادرانی، ...) گلیشدیرمه‌لی و تئکنولوژی تیرانسفئری یاپاراق یئرلی اوره‌تیمه باشلامالیدیر. عئینی آندا کیمسه‌نی تحریک ائتمه‌ده‌ن ایچه‌ریده و سورییه‌ده پ‌ک‌ک‌نین کؤکونو قازمالیدیر...

No comments:

Post a Comment

Note: Only a member of this blog may post a comment.