Wednesday, May 9, 2018

منيمسه‌ديييم نئچه ايملا بيچيمی

منيمسهديييم نئچه ايملا بيچيمی

مئهران باهارلی

بیله- بئله، گيبي- کيمي، ائيله‌مه‌ک، کليمه- کله‌مه، داوشان، آو، سکيز، دوقوز، کؤپرو، یاپراق، توپراق، اؤسکورمه‌ک، آسقیرماق، ایسی، یاسی، کندی-اؤز، ايل-ائل، آوشار، جالاییر، یورت، قورت، بولوت، سوت، جئیلان، هئیلان، گوره‌شمه‌ک، گليپ، آلیپ، آلامام، گئده‌مه‌م، گليرسين، سن‌سین، یاییملاماق، یایین، چکیمسه‌ر، قارارماق، کورد، تورک، سارارماق، تاهران، مي‌؟، باشارماق- باجارماق، یوبات- گئجیک، قیلینج- قیلیج، ....

٭٭٭

ایراندا تورکجه لهجه‌له‌ریمیزده، دئگی‌له‌ر و دیل قورال‌لاریندا گؤروله‌ن بیر چوخ ده‌ییشیک‌لیک، دوغال و طبیعی‌دیر. آنجاق بونلارین بیر چوخو، دوغال اولماق‌لا بیرلیک‌ده، تورکجه‌نین یوزلاشما و یوخ اولمایا اوز توتدوغونون دا بلیرتیسی‌دیر. بئله اولومسوز ده‌ییشیکله‌ره، ایراندا اولوشماقدا اولان ادبی-معیار تورکجه‌ده یئر وئریلمه‌مه‌سی گره‌کدییینه ایناندیغیم اوچون، من اؤز چاپیمدا یازیلاریمدا اونلاردان قاچینمایا و دوزه‌لتمه یاپمایا چالیشیرام.


بيله-بئله: لهجه‌له‌ریمیزده ایکی فرقلی «اینگونه» و «حتی» آنلاملاری اوچون، عئینی «بئله» کلیمه‌سی ایشله‌دیلیر. اویسا اسکی متین‌له‌ریمیزده بو ایکی فرقلی آنلامی آنلاتماق اوچون ایکی فرقلی «بؤیله» و «بیله» کلیمه‌له‌ری ایشله‌دیلیردی. گئنه‌ل بیر قورال اولاراق من معیار و ادبی تورکجه‌ده فرقلی آنلاملارین عئینی کلیمه‌ ایله آنلاتیلماسینی، دیلین یوخسوللاشماسی و اؤلوشگه‌مه‌سی اولاراق گؤروره‌م. بو نده‌نله معیار و ادبی تورکجه‌ده «بئله» کلیمه‌سینی تکجه «اینگونه»، و «بیله» کلیمه‌سینی «حتی» آنلامیندا ایشله‌دیره‌م.

گيبي-کيمي: تورکجه‌ده «کیمی» کلیمه‌سی، «بعضی، تعدادی» آنلامیندادیر. اؤرنه‌یین: کیمی اینسانلار، یعنی بعضی اینسانلار. اسکی‌ده‌ن «مانند» آنلامیندا اولان «کَبی-گیبی» کلیمه‌سی، گونوموزده یینه «کیمی» اولاراق یازیلیر و سؤیله‌نیر. ایکی فرقلی «بعضی» و «مانند» آنلاملاری‌نین تک «کیمی» کلیمه‌سی ایله گؤسته‌ریلمه‌سی‌، منجه دیلیمیزی سیسقا و یوخسول‌لاشدیریر. بو نده‌نله معیار و ادبی تورکجه‌ده اسکی‌ یؤنته‌مه اویاراق، «کیمی»نی «بعضی»، و «گیبی»نی «مانند» آنلامیندا ایشله‌دیره‌م.

ائيله‌مه‌ک: تورکجه‌ده «ائیله‌مه‌ک» مصدری، ائتمه‌ک، قیلماق آنلامیندادیر. بونون معیار و ادبی تورکجه‌ده «ائله‌مه‌ک» اولاراق یازیلماسی و سؤیله‌نمه‌سی یانلیش‌دیر.

کليمه- کله‌مه: اسکی تورکجه‌ده گفتن آنلامیندا اولان «کلمه‌ک-کله‌مه‌ک» مصدری وار ایدی. بو کؤکه‌نده‌ن یاپیلان «کلْمه-کله‌مه» ایسه، دوعا و سخن و .... دئمه‌کدیر. تورکجه «کلْمه-کله‌مه» ایله، عربجه «کَلَمه» بیر بیرینه قاریشماسین دییه، من تورکجه اولانی «کله‌مه»، عربجه اولانی ایسه «کلیمه» بیچیمینده یازیرام.

آو-اوو، داوشان، دووشان: بوگونکو لهجه‌میزده اسکی « آو » سس‌له‌ری‌نین چوخو « وو » اولاراق سؤیله‌نیر. اؤرنه‌یین «آو» (شکار) یئرینه «اوو»، «داوشان» یئرینه «دووشان»، «یاووز» یئرینه «یوووز»، «آووج» یئرینه «اوووج»، «یاووق» یئرینه «یوووق»،.... من معیار و ادبی تورکجه‌ده اسکی‌ده‌ن اولدوغو گیبی، « آو » بیچیمله‌ری‌نین قورونماسی گره‌کدییینه اینانیرام. بونا گؤره ده «آو»، «داوشان»، «یاووز»، «آووج»، «یاووق»، .... بیچیمله‌رینی ایشله‌دیره‌م.

سکيز، دوقوز، چوخور،... : گونوموز لهجه‌له‌رینده بعضی تورکجه کلیمه‌له‌رده حرفله‌رین مشدّد اولماسی گؤرونور. اؤرنه‌یین سککیز، دوققوز، ساققیز، قاششیق، دؤششه‌ک، ائششه‌ک، توپپوز،... بو دا بیر چوخ سورونلا بیرلیکده، بو کلیمه‌له‌رین کؤکه‌نله‌مه‌سی و تورکجه دیل‌بیلگیسی‌نده سورون یارادیر (اؤرنه‌یین توپپوز و دؤششه‌ک کلیمه‌له‌ری‌نین کؤکه‌نی «توپپ» و «دؤششه» دئییل، «توپ» و «دؤشه»دیر). منجه معیار و ادبی تورکجه‌ده و تورک کلیمه‌له‌رینده تشدید اولاییندان اوزاق دورماق گره‌کیر. دولاییسی ایله من معیار و ادبی تورکجه‌ده «سکیز»، «دوقوز»، «چوخور»، «قاشیق»، «توپوز»،.... بیچیمله‌رینی ایشله‌دیره‌م.

ايسی، ياسی: لهجه‌له‌ریمیزده کیمی « س » حرفلی کلیمه‌له‌ر مشدّد اولدوقدان سونرا، ایکینجی « س » حرفی « ت » حرفینه دؤنوشور: «یاسی-یاسسی-یاستی»، «ایسی-ایسسی-ایستی»، ..... منجه ادبی و معیار تورکجه‌ده بونلارین اؤزگون بیچیمی اولان «یاسی»، «ایسی»، ... قوللانیلمالی‌دیر.

کؤپرو، توپراق، ياپراق: لهجه‌له‌ریمیزده بیر سیرا کلیمه‌له‌رده « پ » و « ر » حرفله‌ری یئر ده‌ییشدیریر (مئتاتئز اولایی). اؤرنه‌یین اسکی «توپراق»، «یاپراق»، «کؤپرو» و .... بیچیمله‌ری یئرینه «تورپاق»، «یارپاق»، «کؤرپو» .... دییه سؤیله‌نیر و یازیلیر. من معیار و ادبی تورکجه‌ده بونلارین اسکی بیچیمله‌رینی ایشله‌تمه‌ک‌ده‌ن یانایام: «کؤپرو»، «یاپراق»، «توپراق»، ....

گؤرسه‌تمه‌ک-گؤسته‌رمه‌ک: بو اؤرنه‌ک، یوخاریدا آنلاتیلان مئتاتئز اولایی ایله ایلگیسیز اولوپ، ایکی فرقلی کؤکه‌نله‌مه‌ده‌ن قایناقلانیر («گؤرسه‌تمه‌ک» «گؤر»، «گؤسته‌رمه‌ک» ایسه «گؤز» کؤکو ایله). دولاییسی ایله منجه «گؤرسه‌تمه‌ک» و «گؤسته‌رمه‌ک» بیچیمله‌ری‌نین هر ایکیسی، معیار و ادبی تورکجه‌ده ایشله‌دیلمه‌لی‌دیر.

اؤسکورمه‌ک- اؤکسورمه‌ک، آسقيرماق- آقسيرماق: بیزده «اؤسکورمه‌ک» و «آسقیرماق» اولان مصدرله‌ر، تورکییه‌ده «اؤکسورمه‌ک» و «آکسیرماق» اولاراق سؤیله‌نیر. تورکجه‌ده «–قیر، -کیر، -غیر، -گیر،...» سون‌اکی، سسله ایلگیلی مصدر یاپار: «قیشقیرماق»، «چیغیرماق»، «باغیرماق»، «فیشقیرماق»، «پوسگورمه‌ک»، .... بیزیم ایشله‌تدیییمیز «اؤسکورمه‌ک» و «آسقیرماق» بو گئرچه‌یی اؤزله‌رینده یانسیتدیقلاریندان دولایی، منجه داها اویقون بیچیمله‌ردیر و ادبی معیار تورکجه‌ده ایشله‌دیلمه‌لیدیر.

افشار-آفشار-آوشار، جلاير-جالايير، تئيمور-تيمور: بیزیم لهجه‌ده چوخ ساییدا تورکجه کلیمه، زمانلا سس اویومو یاسالارینا ترس اولاراق، فارسجادا اولدوغو گیبی سؤیله‌نیر و یازیلیر. اؤرنه‌یین «آوشار-آفشار»، «جالاییر» یئرینه فارسجادایا اویاراق «افشار» و «جلایر» اولاراق یازیلیر و سؤیله‌نیر. منجه بو دوروملاردا کسینلیکله تورکجه‌نین اویوم یاسالاری گؤزه‌تیلمه‌لی و «افشار» یئرینه «آفشار-آوشار»، «جلایر» یئرینه «جالاییر»، «تئیمور» یئرینه «تیمور» ... ایشله‌دیلمه‌لی‌دیر.

جئيلان، هئيلان، گوره‌ش: بیزیم لهجه‌ده بیر چوخ یئرده « ر » و « ل » حرفله‌ری بیر بیری‌یله ده‌ییشدیریلیر، بو دا کؤکه‌نله‌مه آچیسیندان سورون یارادیر. اؤرنه‌یین اسکی «جئیلان»، بیزده «جئیران» اولاراق سؤیله‌نیر، اویسا بورادکی «–لان»، حایوان آدی دوزه‌لده‌ن سون‌اک‌دیر (ایلان، سیرتلان، قاپلان، خورتلان، کوهئیلان، قولان، آسلان، ترلان،....). یا دا «هئیلان» (گدییی) بیزده «حیران» اولاراق یازیلیر. اویسا بو آد عربجه قوملوق آنلامیندا اولان «هیلان»دیر. باشقا بیر اؤرنه‌ک کُشتی گرفتن آنلامیندا اولان «گوره‌شمه‌ک» مصدری‌دیر. بو مصدر بیزده «گوله‌شمه‌ک» اولاراق سؤیله‌نیر. اویسا بو کلیمه‌نین کؤکه‌نی، ایگیت و ساغلام آنلامیندا اولان «کور-گور» کلیمه‌سی‌دیر. من بو دوروملاردا دوغرو کؤکه‌نله‌ری گؤسته‌ره‌ن بیچیمله‌رین ایشله‌دیلمه‌سینده‌ن یانایام: «جئیلان»، «هئیلان»، «گوره‌شمه‌ک»، ...

کورد-تورک، کرد-ترک: فارسجا یازیلاردا «تورک» یئرینه «ترک» یازیلماسی، اونو «تَرْک» کلیمه‌سی، و «کورد» یئرینه «کرد» یازیلماسی اونو «کَرْد» کلیمه‌سی ایله قاریشدیریر. بو قاریشیقلیقدان ساخینماق اوچون، من فارسجا متینله‌رده ده «ترک» و «کرد» یئرینه «تورک» و «کورد» (تورکیه، تورکستان، کوردستان؛...) بیچیمله‌رینی ایشله‌دیره‌م.

ايل-ائل: لهجه‌له‌ریمیزین چوخوندا «یورت» و خالق آنلامیندا اولان اسکی «ایل» کلیمه‌سی، «ائل» بیچیمینده سؤیله‌نیر و یالنیز «خالق» آنلامیندا ایشله‌دیلیر. بو دا دیلیمیزی یوخسوللاشدیریر. بوندان دولایی من «ایل» کلیمه‌سی‌نین «یورت» و «اؤلکه» آنلامیندا ایشله‌دیلمه‌سی و یایقینلاشدیریلماسی، و «ائل» کلیمه‌سی‌نین «خالق» آنلامیندا ایشله‌دیلمه‌سینده‌ن یانایام.

يوبان-گئجيک: لهجه‌میز ایله آزه‌ربایجانجادا بیر چوخ تورکجه کلیمه اونوتولموش، «آرخاییک» آدلانمیش و یا «تورکییه‌نین‌کی» دییه دیلده‌ن دیشلانمیشدیر. اؤرنه‌یین «گئجیکمه‌ک» کلیمه‌سی یئرینه «یوبانماق» ایشله‌دیلیر. اویسا گئجیکمه‌ک و یوباتماق آراسیندا آنلام چالاری واردیر. «گئجیکمه‌ک» هر هانسی بیر نده‌نله گئج قالماقدیر. اؤرنه‌یین ماشین تصادوف ائده‌ر و بیر یئره گئج قالینیر. اویسا «یوبانماق»، اهمال و تعلل و غفلت و تنبللیک نده‌نی ایله گئج قالماق دئمه‌کدیر، یعنی اؤزه‌ل بیر گئجیکمه‌ک تورودور. گئنه‌ل اولاراق من «آرخاییک» و یا «تورکییه‌نین‌کی» دییه دیشلانان بوتون تورکجه کلیمه‌له‌رین ادبی و معیار دیلیمیزه قایتاریلماسی و قوللانیلماسیندان یانایام.

باشارماق، باجارماق: بو ایکی کلیمه عئینی کؤکه‌نده‌ن اولمالارینا قارشین، آنلام چالارینا صاحیب‌دیرله‌ر.  «باشارماق» فارسجا موفق شدن، «باجارماق» ایسه بلد بودن آنلامیندادیر. دولاییسی ایله هر ایکیسی ادبی و معیار تورکجه‌ده قوللانیلمالیدیر.

کندی-اؤز-بيله- کندؤز: منجه بونلارین هر دؤردو ده ادبی و معیار تورکجه‌ده ایشله‌دیلمه‌لیدیر، چونکو آرالاریندا آنلام چالاری واردیر. «کندی»: خود، «اؤز»: خود اصل، جوهر و عصاره، «بیله»: ضمیر انعکاسی (بیله‌مه دئدی: بِهِم گفت)، «کندؤزودور»: خود خودش است.

گليپ-آليپ: آزه‌ربایجانجادا همیشه «-یب» اولاراق یازیلان بیچیم، بیزیم لهجه‌له‌ریمیزده گئنه‌لده «-یپ» اولاراق سؤیله‌نیر. من ادبی و معیار تورکجه‌ده لهجه‌له‌ریمیزده یایقین اولان «-یپ» بیچیمینی ایشله‌دیره‌م. «گلیپ»، «آلیپ»، «گؤروپ»، «سئویپ»،...

يورت، قورت، سوت، بولوت: آزه‌ربایجانجادا کیمی کلیمه‌له‌رین سونو همیشه «-د» ایله یازیلیر: یورد، قورد، سود، بولود، ..... اویسا من بو کلیمه‌له‌رین سونونو، بیزیم لهجه‌له‌رده سؤیله‌ندییی گیبی، «-ت» ایله یازماقدان یانایام: «یورت»، «قورت»، «سوت»، «بولوت»، ...

سارار، قارار: تورکجه‌ده آددان و یا اؤن‌آددان (صفتده‌ن) فعل یاپان «-یر، -ر» سون‌اکی واردیر: «یاش-یاشارماق»، «ائو-ائوه‌رمه‌ک» (متاهل کردن)، «ساری- سارارماق»، «قارا-قارارماق». بو سون‌اک بیزده یا اونوتولموش، یا دا بیر چوخ دورومدا « ل » اولاراق سؤیله‌نیر: «قارالماق»، «سارالماق». من بو سون‌اکین ایشله‌کله‌شدیریلمه‌سی و دوغرو قوللانیلماسیندان یانایام: «یاشارماق»، «ائوه‌رمه‌ک»، «سارارماق»، «قارارماق»

مي سورو اداتی: سورو اداتی اولان « می » آزه‌ربایجانجادا ایشله‌ک دئییلدیر، ایشله‌دیله‌نده ده یانلیش اولاراق و یالنیز جومله‌نین سونوندا گلیر. منجه « می » سورو اداتی هم یازیلی و قونوشما دیلیمیزده یایقینلاشدیریلیپ  ایشله‌کله‌شدیریلمه‌لی، هم ده دوغرو قوللانیلمالیدیر. یعنی جومله سونوندا دئییل، سورو قونوسو اولان نسنه و قاورامدان سونرا گلمه‌لی‌دیر. اؤرنه‌یین: «چیچه‌کله‌ر چوخ گؤزه‌ل‌دیر» جومله‌سینده‌ن «می»لی سورولار: ١-«چیچه‌کله‌ر می چوخ گؤزه‌لدیر» (یوخسا آغاجلار می) ؟، ٢- «چیچه‌کله‌ر چوخ مو گؤزه‌لدیر؟» (یوخسا بیرآز می) ٣-«چیچه‌کله‌ر چوخ گؤزه‌ل می‌دیر؟» (یوخسا اوجوز مو؟)، ...

آلامام-آلاممام: بیزیم لهجه‌له‌رده یئته‌رسیزلییی بیلدیره‌ن «آلامماز» و «آلانماز» بیچیمله‌ری قوللانیلیر. اویسا تورکجه‌ده «–امماز» و «–انماز» سون‌اکله‌ری یوخدور. بو اصلینده «–اماز» سون‌اکی‌دیر که « م » حرفی بیر سیرا لهجه‌ده مشدّد اولموشدور. «–امماز» سون‌اکی‌نین اورتایا چیخیشی، دیلیمیزین یوزلاشماسی و پوزولماسی‌نین آچیق بلیرتیسی‌دیر. منجه ادبی و معیار تورکجه‌ده، «-امما» دییه بیر سون‌اکین وار اولدوغو یانلیش ایماژینی یارادان «آلامماماق» یئرینه، تورکییه‌ده اولدوغو گیبی «آلاماماق» بیچیمی منیمسه‌نمه‌لی‌دیر (آلانمادی، آلامماز، ... یئرینه «آلامادی»، «آلاماز»، ...).

گليرسين-گليرسه‌ن: بیزیم لهجه‌له‌رده، ایندیکی زمان ایکینجی تکیل شخص، «-سه‌ن» سون‌اکی ایله سؤیله‌نیر: «گلیرسه‌ن» (می آیی)، «سن‌سه‌ن» (تو هستی). بو دا اونو شرط کیپی (قالبی) ایله قاریشدیریر: «گلیرسه‌ن» (اگر بیایی)، «سن‌سه‌ن» (اگر تو باشی). بو ایکی فرقلی قالیبلار بیر بیرینه قاریشماسین دییه، من ایندیکی زمان اوچون «–سین» («گلیرسین»: می آیی، «سن‌سین»: تو هستی) و شرط اوچون «–سه‌ن» («گلیرسه‌ن»: اگر بیایی، «سن‌سه‌ن»: اگر تو هستی) بیچيمله‌رینی ایشله‌دیره‌م.

ياييملاماق- يايينلاماق: «یاییملاماق» گئنه‌لده مادّی اولان یازیلی (کیتاب، قزئته،....) و یا گؤرسه‌ل، ائشیتسه‌ل اثری، کیتابچی‌لار ویا مئدییا آراجیلیغی ایله اینسانلار آراسیندا منتشر و پخش ائتمه‌ک، اوله‌شدیرمه‌ک (توزیع) آنلامیندادیر. «یایینلاماق» ایسه بیر شئی‌ین مئدییا (رسانه) آراجیلیغی ایله پایلاشیلماسی‌دیر. اؤرنه‌یین: «بو کیتاب ١٠٠٠ نوسخه‌ده باسیلیپ یاییملاندی». آنجاق «بو تی‌وی خبر پروقرامی دا یایینلار»، و یا «یاییم‌ائوی» (ناشر کتاب)، «یایین قورولوشو» (رسانه).

چکينمه‌ک-چکيمسه‌مه‌ک- چکيمسه‌ر: «چکیمسه‌مه‌ک»، ممتنع رای وئرمه‌ک آنلامیندا اولوپ، فعل کؤکونه یا دا آدا آرتیریلاراق فعل دوزه‌لده‌ن «-یمسه» سون‌اکی ایله یاپیلمیشدیر (گولمه‌ک- گولومسه‌مه‌ک، من-منیمسه‌مه‌ک، ...). بورادان یاپیلان «چکیمسه‌ر» کلیمه‌سی، ممتنع آنلامیندادیر. «چکینمه‌ک» ایسه، اجتناب، امتناع و استنکاف کردن آنلامیندادیر. آنجاق تورکجه‌ده «چکینسه‌مه‌ک» دییه بیر مصدر یوخدور. ایسته‌‌ک بیلدیره‌ن «-سه» سون‌اکی، آدا آرتیریلابیله‌ر (سو- سوساماق)، آنجاق فعل کؤکو اولان «چکین»ه آرتیریلاماز. دولاییسی ایله «چکیمسه‌مه‌ک» و «چکیمسه‌ر» بیچیمله‌ری دوغرو، «چکینسه‌مه‌ک» و «چکینسه‌ر» بیچیمله‌ری یانلیشدیر.

قيليج-قيلينج: لهجه‌له‌ریمیزده «قیلینج»ی سیف و شمشیر آنلامیندا ایشله‌ده‌نله‌ر واردیر. اویسا «قیلینج» بیر ایشی قیلمانین طرزی و داورانیش یؤنته‌می‌دیر (سئومه‌ک-سئوینج). شمشیر و سیفین قارشیلیغی ایسه «قیلیج»دیر.

حايوان، مايمون، تاهران، ....: بیزیم لهجه‌ده کیمی یابانجی کلیمه‌له‌ر، تورکجه سس اویومو یاسالارینا ترس اولاراق، فارسجا بیچیمله‌ری ایله سؤیله‌نیر. اؤرنه‌یین «حیوان»، «میمون»، «تهران»، ... من ادبی و معیار تورکجه‌ده بئله یابانجی کلیمه‌له‌رین- اؤزه‌للیکله بو کلیمه‌له‌رین گئچمیشده و یا گونوموزده باشقا تورکیک لهجه و دیلله‌رده سس اویومونا گؤره سؤیله‌نه‌ن بیچیمله‌ری وار ایسه- بیزده ده سس اویومونا گؤره یازیلماسی‌نین داها اویقون اولاجاغینی دوشونوره‌م: «مایمون»، «حایوان»، «تاهران»، ...

دولت، مولا، حوض، گوز، طويله، دوران، تورات، ...: فارسجا و عربجه‌ده‌ن دیلیمیزه گیره‌ن بعضی کلیمه‌له‌رده‌کی اوزون « و » سسله‌ری و یا « -َو » دیفتونگو، کیمی لهجه‌له‌ریمیزده و آزه‌ربایجانجادا اوزون « ؤ » و یا اوزون « و » بیچیمینده سؤیله‌نیر: دؤلت، مولا، حوض، گوز، طؤله.... بو دا دیلیمیزین تورکجه کاراکتئرینی پوزور. اویسا بونلار باشقا لهجه‌له‌ریمیزده «-ه‌و» و یا «-ئو» اولاراق سؤیله‌نیر. من ده بو سؤیله‌نیشین ادبی و معیار تورکجه‌ده قوللانیلماسیندان یانایام: «دئوله‌ت»، «مئولا»، «حه‌ویض»، «جه‌ویز»، «طه‌وله»، «دئوران»، «تئورات»، ......


.سه‌نه، .سانا قينامالی-سسله‌نديرمه‌لی بويروق سون‌اکی
ديل ياراسی: اوماق، آلی اوماز- آلاماز- آلامماز- آلانماز، آلا بيلمه‌ز- آلابيلمه‌ز
گليرسه‌ن، گليرسين، گليره‌ن، گليرسه‌ن‌سه
فارسجا «که-کي» ايلگه‌جيني (اداتيني) ايشله‌تمه‌ک
Mi İlgeci (Edâtı) Ve Yazımı
فتحه، کسره، ضممه‌، تشديد و تنوين
نامهاي جالايير، ايلکا، ايلکانويان، ايلخانيان و ايلخان
آلرژي به استفاده‌ از کلمات تورکي رايج در غرب ما (تورکيه، عراق، سوريه، قبرس، بلغارستان، ...)
زبان معيار مدرن تورکي
تورکجه‌يه يئني کليمه قازانديرما يوللاري
استفاده از فرمهاي تورکي «تورک» و «آزربايجان»
ديل، خط و نثر يازيسي‌نين ائوريم، اويقارليق و ميللي کولتور ايله باغلاري

No comments:

Post a Comment

Note: Only a member of this blog may post a comment.