بوته‌م-دين، بوته‌نج-اعتقاد ديني

بوته‌م-دين، بوته‌نج-اعتقاد ديني

مئهران باهارلي

اسکي تورکجه‌ده «ايمان گتيرمه‌ک» آنلاميندا ايشله‌ديله‌ن نئچه اؤنه‌ملي فئعل واردير: «اينانماق»، «بوتمه‌ک»، «گيرتينمه‌ک- گئرتينمه‌ک»، «ايشه‌نمه‌ک»، ...

بوتمه‌ک: ايمان گتيرمه‌ک

اسکي تورکجه‌ده بوتمه‌ک فئعلي ايمان گتيرمه‌ک (تانري‌يا، دين‌ه، پئغه‌مبه‌رله‌ره، ولي‌له‌ره، ....) آنلاميندادير: «بوت مانگا» (بوت منه، اينان منه. قوتادغوبيليک). اينانماق آنلاميندا اولان «بوتمه‌ک»، قاراخانلي تورکجه‌سي، اورتا تورکجه، اويقورجا (پوتمه‌ک)، شورجا (پوتمه‌ک) و ساخاجا-ياقوتجادا (بيتمه‌ک) واردير. بوتمه‌ک تورکجه‌ده ده‌ييشيک دؤنه‌مله‌رده چئشيتلي آنلاملار قازانميشدير. اؤرنه‌يين چاغاتايجادا گووه‌نمه‌ک، ائعتيماد ائتمه‌ک. «بوتورولمه‌ک»: تاماملانميش اولماق. «بوتون»، «بوتؤو»، «بوتوت» (بير گؤره‌وي باشاري ايله يئرينه گتيرمه‌ک)، «بوترو» (باشدان باشا، سراسه‌ري)، «بوتروره‌ک» (تامامه‌ن، تامامي‌يلا، اييي‌جه، بوسبوتون)، ... کليمه‌له‌ري ده عئيني کؤکه‌نده‌ن گلمه‌کده‌ديرله‌ر.

عئيني کؤک موغولجادا دا واردير: «بوت.» (بير شئيه اينانماق، ديله‌يي يئرينه گلمه‌ک، بورجو و يا آلاجاغي گئرچه‌کله‌شمه‌ک، قانماق، دويماق)، «بودومجي» (اينانج)، «بودومده.» (اينانديرماق)، «بوت.» (اينانديرماق، گووه‌نمه‌ک)، «بودوم» (صداقه‌ت، جيددي)، «بودومچيدو» (صداقه‌تلي، شره‌فلي)، «بودون.» (ايچده‌ن، صاديق اولماق، گووه‌نمه‌ک، ائعتيماد ائتمه‌ک)، «بودوندير.» (ايچده‌ن اولماق، ائعتيماد ائتمه‌ک).

«بوته‌م»-دين، «بوته‌نج»-ديني ائعتيقاد

«بوته‌م» دئگيسي، «بوتمه‌ک» فئعلينه فئعلده‌ن آد ياپان –ه‌م سون اکي آرتيريلاراق اورتايا چيخميشدير. «ياشام» (حيات)، «دؤنه‌م» (دوره، عهد)، «توتام» (دسته)، «بيچه‌م» (سبک)، «قورام» (تئوري)، «اوينام» (رول)، «قونام» (مقام)،.... کليمه‌له‌ري گيبي.

«بوته‌نج» دئگيسي، «بوته‌نمه‌ک» فئعلينه دؤنوشوملو فئعلده‌ن آد ياپان –ج سون اکي آرتيريلاراق اورتايا چيخميشدير. «کوسه‌نج» (آرزو)، «ايله‌نج» (لعنت، نفرين)، «گؤنه‌نج» (رفاه)، «ايمره‌نج» (غبطه)، .... کليمه‌له‌ري کيمي

بوتمه‌ک فئعلي‌نين باشقا آنلاملاري

«بوتمه‌ک» فئعلي‌نين باشقا آنلاملاريندا دا واردير. اؤرنه‌يين سونا ائرمه‌ک، يارانين ايييله‌شمه‌سي، بيتگيله‌رين بؤيومه‌سي، اينسانين دونيايا گلمه‌سي ..... «بوتورمه‌ک» (ياراتماق، ياپماق، بيتيرمه‌ک). بو آنلاملارداکي بوتمه‌ک فئعلي و ده‌ييشگه‌له‌ري، بوتون تورکيک ديلله‌رينده واردير. بوتمه‌ک (اسکي تورکجه، قاراخانلي تورکجه‌سي، اورتا تورکجه، اويقورجا، توواجا، آلتايجا، دولقانجا)، بيتمه‌ک (تورکجه، قاقاووزجا، خله‌جي‌جه، قيرقيزجا، قازاقجا، نوقايجا، بالقارجا، قوميقجا، اؤزبيکجه)، پيتماق (ساري اويقورجا)، پوتماق (ساري اويقورجا)، بئتمه‌ک (تاتارجا)، پيتمه‌ک (قاراقالپاقجا)، پوتمه‌ک (خاقاسجا)، پودورمه‌ک (شورجا)، پييئتمه‌ک (چوواشجا)، ...

بوتمه‌ک فئعلي بو آنلاملاردا و بوته.، بوتو. بيچيمله‌رينده موغولجادا دا واردير: بوته‌.: بيتمه‌ک، تاماملانماق، گئرچه‌کله‌شمه‌ک، سونا ائرمه‌ک، يوخ اولماق، قيسيلماق، کسيلمه‌ک، آلچالماق. بوتو.: ياراديلماق، دوغماق؛ يارانين قاپانماسي، اونولماق، ايييله‌شمه‌ک؛ بيتگي اوچون چيخماق، نشو و نوما ائتمه‌ک.

دين کليمه‌سي‌نين کؤکه‌ني

«دين» کليمه‌سي‌نين کؤکه‌ني سئميتيک ديلله‌ردير. آشاغيدا بو کليمه‌نين سئميتيک ديلله‌رينده‌ن اولان آککادجاداکي ايزله‌رينه ده‌يينيلميشدير.

«دييانوم»، «دآنو»: يارقيدا بولونماق، قضاوه‌ت ائتمه‌ک، قرار  و حؤکوم وئرمه‌ک

«دينوم»: يارقي، قضاوه‌ت، قرار، حؤکوم

«دين»: اسکي آککادجا متينله‌رينده، ايکينجي شخص تکيل بويروق کيپي و «يارقيدا بولون!» آنلاميندا و يا آد اولاراق يارقي آنلاميندا ايشله‌ديلميشدير.

«دين ايلئ»، «دينني ايلي»: «دين ايلئ»: تانريلارين يارقيسي؛ «دين ايلي»، «دينني ايلي»: يارقيلا مني، تانريم!

«دينام ديانوم»: بو دريم، ياسال اولاراق حؤکوم وئرمه‌ک و يارقيدا بولونماق آنلاميندا، دوعالاردا ايسه باغلاييجي بير قرار ساييلان تانري‌نين قيلاووزلوغو و گؤسته‌ريشي دئمه‌کدير.

ده‌ييانوم: يارقيج

قيسا سؤزلوک:

بوتروBütrü : سراسر

بوتروره‌کBütrürek : کاملاً، تماماً

بوترولBütrül : سراسري

بوتمه‌کBütmek : ايمان آوردن

بوته‌م اريBütem eri : خادم ديني

بوته‌م اوستوBütem üstü : فراديني

بوته‌م ايچي: درون ديني

بوته‌م ديشيBütem dışı : غير ديني، برون ديني

بوته‌مBütem : دين

بوته‌مجهBütemce : ديناً

بوته‌مسه‌لBütemsel : ديني

بوته‌مسيزBütemsiz : بي دين

بوته‌مله آجونBütemle acun : دين و دنيا

بوته‌مله‌رآراسيBütemlerarası : بين اديان

بوته‌مليBütemli : ديندار

بوته‌نجBütenc : اعتقاد ديني

بوتوتBütüt : کاملاً به جا آوردن

بوتورمه‌ک Bütürmek: ياراتماق، ياپماق، بيتيرمه‌ک، ايجاد کردن، آفريدن، خلق کردن، کامل کردن

بوتورولمه‌کBütürülmek : تاماملانميش اولماق، کامل و مکمل شدن

بوتونBütün : کامل

بوتؤوBütöv : يکپارچه

تانريسال بوته‌مله‌رTanrısal bütemler : اديان الهي

کؤکده‌ن بوته‌مچيKökden bütemçi : بنيادگرا

گؤکسه‌ل بوته‌مله‌رGöksel bütemler : اديان آسماني