Tuesday, October 24, 2017

گورگور بابايا سلام- تحية الی بابا كركر


گورگور بابايا سلام- تحية الی بابا كركر
بيرينجی بؤلوم

اسماعيل سرت  تورکمان




سؤزوموز فونئتيک يازيمی ايله
مئهران باهارلی

Saturday, July 22, 2006

توركمان بيزيك وئبلاگيندان
بابا گورگور بیر قیزدیر
کرکوک اوسته یولدوزدور
آچ گؤزون، دونیایا باخ
گئجه‌ده‌کی یولدوزدور


کرکوک‌ون گونئی باتی تپه‌له‌ری‌نین قوینوندا، یئریاغی (نفت) یاتاقلاری‌نین لاپ اورتاسیندا یئرله‌شه‌ن و بئشیک تکین سالینان «باباگورگور»، اولولوغو، اودونون گؤرکه‌می، باغریندان قوپان و بیربیری آردینجا یوکسه‌له‌ن قیغیلجیملاری ایله اونلودور. یالینیق اؤته‌یی (اینسانلیق تاریخی) بویونجا وارلیغیندان سؤز ائدیله‌ن بو اود، سویوق یئلله‌رده‌ن، قاردان، قیشدان، یاغیش و بوراندان ائتکیله‌نمه‌زلییی ایله بیلینیر. بو اود و قایناغی، بو اؤزه‌للیکله‌ری ایله ده بؤلگه خالقینجا، سیرادان قارشیلانماییپ قوتسانمیشدیر. بیر سؤیله‌نجه‌یه گؤره، چنگیزخان دا بو اودون قارشیسیندا دیز چؤکوپ کله‌مه -یاخاری (دعا-التماس) ائتمیشدیر. تورکمانلار (عراقدا یاشایان تورک اوجقاراوباسی (دییاسپوراسی)، بو گؤرکه‌ملی اود کیتله‌سی آدینا، یانارکه‌ن آلوولاری‌نین چیخاردیغی «گورگور» سسینده‌ن اسینله‌نه‌ره‌ک «گورگوربابا» دئمیشله‌ر. (تورک دیلینده «گورگور» سؤزجویو، شلاله (قوبا)، آلوو (خاچماز)، «قورقور» ایسه سو ایچیله‌ن دمیر قاب (قاخ) و اووال بیچیملی دمیر قوتو (شرور) آنلاملاریندادیر). (مئهران باهارلی)


گورگور بابايا سلام

١

گورگور بابا سلام اولسون درینده‌ن
یابانجی دئییله‌م، اؤزله‌‌ر ایلینده‌ن
ننه قوجاغیندان، مردله‌ر بئلینده‌ن
گورگوربابا سالسان بیزی یادینا
آدیمیز باغلیدیر سنین آدینا

٢

گورگوربابا گلدیم عتابلاشماغا
داها دوغروسو بئله دردله‌شمه‌یه
چوخ باخسان باشیمداكی باش باغا
باشیمداكی‌دیر توركمان اشارتی
قیافه‌تیمیزدیر طوبله‌ر عشیرتی

٣
بیر داها حرمتده‌ن سنی سلاملار
دئدیییم جمله‌له‌ر اییی كلاملار
چوخ ده‌یه‌رلی، چوخ معنالی آنلاملار
دﻳنله منی، اوزوندور عتابیمیز
بیر اثردیر ملّته كتابیمیز


٤

آنلادییسان جواب ایسته‌ر سؤزله‌ریم
چئویرمه‌یه‌جه‌یه‌م سنده‌ن گؤزله‌ریم
من اﻳچده‌ن دردلی‌یه‌م، چوخدور دردله‌ریم
حیدربابا شاهد اولسون بیزله‌ره
قاووشاركه‌ن خوش قونوشسون سیزله‌ره

٥
گورگوربابا آتشله‌رین یاناندا
یاری ساری، یاریسی دومانلاناندا
بیلمه‌زیدیك دئدییینی او آندا
قورخوموزدان اوزاقلاردان باخاردیق
یولدوز كیمین یاتاقلارا آخاردیق
    
٦
گورگوربابا یاز گئجه‌سی ایشیغین
ساووقلاردا قیزغین قیزغین قیشلیغین
اوشاقلاری سئویندیره‌ن خوشلوغون
من بئشیكده‌ن ایشیل ایشیل باخاردیم
اوشاق ایكه‌ن حكمت‌ینی اوخاردیم
    
٧
بؤیوك اولدوم، آدین اییی یازاردیم
دووارلاردا، خیرجانلاردا قازاردیم
آدینی سئومه‌یه‌نه آغیز بوزه‌ردیم
ایشته زمان نئتدی، ائتدی بیزله‌ره
دایانمیشیق چولوم- چوجوق سیزله‌ره
    
٨
گورگوربابا ایشیغیندا اویناردیق
قازانداكی نفت‌ین كیمین قایناردیق
صباح ائركه‌ن خوروزلاردان بایناردیق
هاردا قالدی گونله‌ریمیز، چاغیمیز
ویران اولدو باغوانیمیز، باغیمیز


٩
گورگوربابا بیز بیلیریك، بیزیم‌سه‌ن
باهالی‌سان، جگریم‌سه‌ن، گؤزوم‌سه‌ن
فدا اولسون سنه اوغلان، قیزیم سن
داماریندا آخان منیم قانیمدیر
توپراقلارین کومانیمدیر، جانیمدیر

١٠
گورگوربابا سیغینمیشیق یانینا
ایسته بیزده‌ن، جان قاتاریق جانینا
بو بایقین‌لیق هاردان گلدی قانینا
دامارلارینداكی دده‌م قانیدیر
نئدیم «كركوك» مسافرله‌ر خانیدیر
    
١١
گورگوربابا قالامیزا قارشی‌سان
بیزده‌ن اوزاق بیلمه‌م كیمه قونشوسان
گور سسینله‌ن نه‌له‌ر، نه دانیشیرسان
گورگوربابا اوزاق باخاق یوللارا
سونا اوچار، گنه قونار گؤل‌له‌ره
    
١٢
گورگوربابا دده‌له‌رین ایلینده
كیمله‌ر گئتدی، كیمله‌ر قالدی یئرینده
بیر اویونجاق اولدوق زمان الینده
بو فلك ایسته‌رسه گوله‌ر حالینا
تراش ائده‌ر، گؤزگو وئره‌ر الینه
    
١٣
گورگوربابا آغیر باشلی اولایدین
قوجالایدین، چوخ دا یاشلی اولایدین
قالام كیمین مرمر داشلی اولایدین
بیر قیرسایدین دشمنله‌رین باشینی
پوزار ایدین هر خاینین ایشینی
    
١٤
گورگوربابا محلّه‌مین سوقاغی
هر یئرده‌ن چوخ ایمیش یانان اوجاغی
نئشه‌لی اولسایدی چیچه‌كلی باغی
دییه‌ریدیم زمان گولدو اوزومه
سولموش ایدیم، گنه گلدیم اؤزومه
    
١٥
گورگوربابا قویونون قوردا وئردین
آرامادان اؤزون یئرینده دوردون
مین اولدو دردله‌رین، بیر ایكه‌ن دردین
هر كسین یوكونو وئردین دالینا
دوران ایسه قالیپ حالی حالینا
    
١٦
گورگوربابا سنده‌ن ایلله‌ر گئچیپدیر
یاناشاندان نئچه كروان كؤچوپدور
گوگورتلو سویوندان مینله‌ر ایچیپدیر
سنده‌ن ایسته‌ردیله‌ر خسته‌له‌ر شفا
نه یازیقدیر بوگون قالماییپ وفا
    
١٧
گورگوربابا زمان بیزی چورقالار
تهدید ائده ائده باشین یورقالار
بلبلله‌ر یئرینه قونوپ قارقالار
آللاه بلا وئرسین بئله خویلارا
بیلمه‌م نه‌ده‌ن ظلم اولور اییی‌له‌ره
    
١٨
گورگوربابا خرمنله‌رین یئرینده
قیزلار اوینار آلتین كمر بئلینده
معنی دیییپ، سؤزون اریر دیلینده
بیز ده اوزاقلاردان دوروپ، دینله‌ردیك
آرا سیرا اوزلاریدان اویناردیق
    
١٩
گورگوربابا مِحَطّه‌نین یولوندا
گؤزه‌ل یارین قوللاریمیز قولوندا
ساغ یانیمیز تاخیل، گول‌له‌ر سولوندا
قوخلاریدیق اوبا اوبا نرگیزی
آرار ایدی گؤرمه‌سه‌یدی یار بیزی
    
٢٠
گورگوربابا باغلار قوخو ساچاردی
چئشیت چئشیت گول‌له‌ریمیز آچاردی
آرخلاریمیز هیچ دورمادان قاچاردی
سوسوزلوقدان سولدو پمبه گول‌له‌ریم
داها نه‌یه وارسین اكه‌ن ال‌له‌ریم
    
٢١
گورگوربابا داغلاریندا ایچه‌ردیك
خیاللانیپ، اورمانلارا قاچاردیق
گول‌له‌رین اییی‌سین بیزله‌ر بیچه‌ردیك
كیمه قالدی سن بیلیرسه‌ن چاغیمیز
گئچدی گنجلیك، خزل اولدو باغیمیز
    
٢٢
گورگوربابا «مصلّا»نین دوزلویو
سئیران اولان باهارلیغی، یازلیغی
دده، نینه‌م دییه‌ن خوش آوازلیغی
پیس قارقالار ایندی اوردا گزیری
بو حاللاردان اوره‌ییمی ازیری
    
٢٣
گورگوربابا روزگار گلیپ گزه‌ردی
عاشقلارین هر دردینی یازاردی
غملی اولانلارا همه‌ن قیزاردی
ایندی بیلمه‌م نه‌ده‌ن گلمه‌ز یانیما
خوشلوق ایكه‌ن غم بویاندی قانیما
    
٢٤
گورگوربابا «دؤرت باغلار»ین یانیندا
دؤشه‌نه‌ردیك گؤزه‌لجه هئیوانیندا
تونکولوپ دؤشه‌ردیك گول زمانیندا
ایندی باخیم هیچ گئتمه‌‌ریك اورایا
دالداكی اوزومله‌ر‌ دؤندو قورایا
    
٢٥
گورگوربابا دردیمیزی سورمورسان
گؤزله‌ریمده‌ن آخان یاشی گؤرمورسه‌ن
بو گورگور سسینده‌ن بیر آز دورمورسان
چوخ آنلاتیم سنه اولان دردیمی
گؤزوكور، سئومیرسه‌ن بیزه یاردیمی
    
٢٦
گورگوربابا ظلمه قارشی، قارشی دور
یورد خاینله‌رینه چال دا مارشی، دور
اؤكسوزله‌ری، مظلوملاری اوخشا، دور
یوخسا نئده‌جه‌یه‌م گورگور آدینی
سالماز ایسه‌ن، بیزی گونده یادینا
    
٢٧
گورگوربابا «قتلِ عام»ین گونونده
آسیلانلار نه‌یدی قیشلا اؤنونده
كور دئییلدین، گؤزون، باشین یئرینده
غافل غافل سمالارا باخیردین
دوردورمادان نفت‌ین كیمه آخیردین؟
    
٢٨
آسلان كیمین گنجله‌ر چوخورا دولدو
قانلاری آرخ تكین گؤل‌له‌ره دولدو
كیمسه‌لی كیمسه‌سیز ال‌له‌رده قالدی
توپراغینین یارسی قاندی، یارسی جان
بیز قربان اولموشوق، سن ده اول قربان
    
٢٩
گورگوربابا كومونیستله‌ر قاچاردی
پنجره، قاپییا آتش آچاردی
سیلاحسیز ایگیدله‌ر حالی ناچاردی
حقدی سن اولاری اوخالایایدین
مملكت خاینین یاخالایایدین
    
٣٠
گورگوربابا گئجه‌له‌رین یاریسی
شهیدله‌رین یالغیز قالدی یاوروسو
ماللارین كومونیست اولدو واریثی
گنه شرفیمیز قورتارابیلدیك
دشمنله‌ری ازیپ، دهره بیلدیردیك
    
٣١
گونله‌رجه باشیمیز دالقالی قالدی
دره، تپه، آغاج، هر طرف دالدی
بیر گون بیزده‌ن فلك نامردجه چالدی
هیچ ده اونوتماریق گؤردویوموز گونو
دهرین یاسی وارسا، وارمیش دویونو
    
٣٢
بیلمه‌م نئجه آولادیلار بیزله‌ری
كسدیله‌ر بئشیكده بالا قیزلاری
ییغلاتدیلار باباسیز اؤكسوزله‌ری
او گونون یاراسی ایشله‌ر گؤیلومده
دردیمیز درمانسیز، چاره یوخ الده
    
٣٣
خاین اولما، خیزمه‌ت ائیله یوردونا
اؤلمه‌ده‌ن چاره تاپ یامان دردینه
سونرا قیران دوشه‌ر قالان اوردونا
بیز سایاق‌كه‌ن، سن ده بیر آز سایاق اول
بیز سنه دایاغیق، سن ده دایاق اول
    
٣٤
بیلمه‌م نئجه خبرله‌ره اولاشدیم
چیلقین چیلقین، اویان بویان دولاشدیم
گاه دووارا، گه اطرافا ساتاشدیم
یوللار كسیلمیشدی یئریم اوزاقدا
بیلمه‌م كیمله‌ر اؤلوپ، كیمله‌ر توزاقدا
    
٣٥
ایكینجی گئجه‌نین پك یاریسیندا
خولیالار ایچینده، غم آراسیندا
قارانلیق ساعتله‌ر قاپ قاراسیندا
بیریسی گلدی تئلفونلا بیلدیردی
دئدی اوشاقلارین بیرله‌ر اؤلدوردو
    
٣٦
هیجاندان پارچالادیم اؤزومو
یاش یئرینه قان دولدوردوم گؤزومو
كیمسه دینله‌میردی فریاد، سؤزومو
میدانا گئتمه‌یه یول بولماز اولدوم
كسدیله‌ر یولومو، قاتیلماز اولدوم
    
٣٧
اوچ گون ایكی گئجه حبسه آتیلدیم
تورلو تورلو افكارلارا قاتیلدیم
الده‌ن اله قوزو تكین ساتیلدیم
اوسكوت اول دئدیله‌ر، قونوشما فضله
قانینی ایچه‌ریك اویونلا، سازلا
    
٣٨
گئچدی گونله‌ر هر شئی بللی اولونجا
حكومتده‌ن امداد قوولو گلینجه
حق میدانی اوزوموزه گولونجه
قورتاردیلار آلان اولان واریمیز
آللاه ایدی بیزه دوغرو یاریمیز
    
٣٩
منی ده سالدیلار قانلی حبسده‌ن
یئل تكین اسیردیم، قوشوردوم حرصده‌ن
هوره‌ن، هایلایان چوخ تهدیدلی سسده‌ن
آرامادیم، كسه‌ر اولدوم یولومو
بوشا وئردیم قیپ قیرمیزی اؤلومو
    
٤٠
ائوین قاپیسینا چوخ گوجله واردیم
یوللاری قاپلایان قانلاری گؤردوم
بیر سس دویمایینجا قاپینی قیردیم
گؤزوكموردو بالالاریم، اؤزله‌ریم
قوّتیم قورودو، كور اولدو گؤزله‌ریم
    
٤١
دووارا دایاندم دلیله‌ر كیمین
آللاهیم سنه‌دیر، سنه‌دیر یمین
بیر شئیه آرتیق من دئمیره‌م امین
تا اؤز بالالاریم توخ گؤرمه‌یینجه
یا دا نانكورلاری گئده‌رتمه‌یینجه
    
٤٢
نه‌ده‌ن سورا بیر آز اؤزومه اویدوم
سانكی سمالاردان گیزلی سس دویدوم
نئچه دوست احبابی من اؤزوم سایدیم
سس دئدی كه سنینكی‌له‌ر اوردادیر
بیر چوخ توركمانلاردان باجوكلدادیر
    
٤٣
اولاشدیرابیلدیم الیم ال‌له‌ره
باخدیم ساری اوزلو، توتقون دیلله‌ره
قالان قالیپ، قاچان قاچیپ چؤل‌له‌ره
وار بیزده‌ن اؤله‌نله‌ر دئدیم؟ یوخ دئدی
عرقداشلاریمیزدان اؤله‌ن چوخ دئدی
    
٤٤
دؤندو منه گؤیچه‌ك اوغلوم، باخیشدی
بیلمه‌م نئجه هر یانیما ساریشدی
دویا دویا توختاشلاندی، قوخلاشدی
بابا دئدی شهیدله‌رمیز چوخ ایمیش
بیزه یاردیم ائده‌ن هیچ ده یوخ ایمیش
    
٤٥
نئجه گلدین بابا، نئجه اولاشدین؟
ناخسی سوقاقلاردان قورخمادان گئچدین؟
او یامان ال‌له‌رده‌ن نئجه ده قاچدین!
اوغلوم دئدیم بیزیم بودور یولوموز
وظیفه‌میز قورتارماقدیر ایلیمیز
    
٤٦
بئله قالدی اولان حاللار گونله‌رجه
سس صداسیز اؤله‌نله‌رمیز اونلارجا
یاسلی غملی یاتان مینله‌ر ، مینله‌رجه
بولاشمیشدی هركس غملی غمینه
كیمسه گلمه‌ز، كیمسه گئتمه‌ز یانینا
    
٤٧
بیر چوخ ائوله‌ریمیز سوسوز یاماقسیز
گونله‌ری پریشان، خسته‌له‌ر حالسیز
یاری جانلی ایكه‌ن یاریسی جانسیز
بوتون دونیا قیپ قیرمیزی بویاندی
یاتمیش اولانلاریمیز همه‌ن اویاندی
    
٤٨
آراماغا باشلادیلار هر یئری
كیمی بوتون گؤمولوپ، كیمی یاری
كیمی كسیلیپدیر قوجایلا قاری
تانینماز اولموشدو شهیدین اوزو
بیر اولموشدو شیرین قاشییلا گؤزو
    
٤٩
ظالم ال‌له‌ر ایشله‌میشدی هر یئرده
چالیپ قیریپ تؤكوپ قیییپدیر مرده
كیمله‌ری حبس ایدی، كیمله‌ری طوردا
تا نه‌له‌رده‌ن سورا آتش كسیلدی
گئجه ایكه‌ن خیرخیزلار یولو بولدو
    
٥٠
سایدیق شهیدله‌ری، اونلاری گئچیپ
كیمی آسیلمیشدی، كیمی بوغولوپ
كیمی پارچا پارچا یئرله‌ره دوشوپ
اله دوشه‌نله‌ری توپراغا گؤمدوك
الی بوش، اوز قارا دا ائوله‌ره دؤندوك
    
٥١
نه‌یه دالاق آرتیق یاسلار باشلادی
درین درین خاطیره‌له‌ر ایشله‌دی
شهید وئره‌ن آنا كؤكسون داشلادی
ییغلاری، سازلاری هارداسان بالام
كیمله‌ر منه دیلدی، كیمله‌ره دیله‌م
    
٥٢
آی بالام بیلمیره‌م هاردا گؤمولدون
دونه‌ن یانیمدایدین، نمازین قیلدین
منه باخا باخا حسرتله گولدون
دئدین گئده‌جه‌یم یولداش یانینا
قاتیلاجاغیم وار مرد میدانینا
    
٥٣
ایچین ایچین سازلاماقلار هر یاندا
شهیدین اورباسی قایناردی قاندا
سولموش اوزله‌ریمیز، قفا دوماندا
چیلدیرتمیشدی عقلیمیزی اولایلار
دؤنموشدو ماتمه شانلی هالایلار
    
٥٤
گورگوربابا ایشته بویدو آنلاتیم
تورلو تورلو آجی بئله دینله‌تدیم
بیلمه‌م سیخدیم سنی، یوخسا آغلاتدیم
داها دا سور، جوابلارا حاضیرام
اؤز ایلیمه، اؤز یوردوما ناظیرام
    
٥٥
گورگوربابا داها نئجه گولوم من؟
نه‌یه وارسین، نه سؤله‌شسین دیلیم من؟
ییغلادان دردیمی كیمه دیییم من؟
كاشكی دردیمده‌ن بیر بیله‌ن اولایدی
آرا سیرا گؤز یاشیمی سیله‌یدی
    
٥٦
بیلدین نه‌ده‌ن اطراف داغلاریم غمگین
بول بول پارالار وار، یوردوموز زنگین
ایسته‌رسه بوكه‌رمیش فلكین چنگین
نه فایدا كی یاریم منه یار اولماز
آللاهی ویریپدیر، قدرینی بیلمه‌ز
    
٥٧
دالقالار ایچینده یاشایان ملّت
گئجه‌سی درد دولو، گوندوزو علّت
یاخیشمازدی بیزه بوگونكو ذلّت
گئچه‌نله‌رده بیزله‌ریدیك وار اولان
ملّتله‌ره مردلیك بیزده‌ندیر قالان
    
٥٨
گورگوربابا بو دونیالار دؤنورو
نفت‌ین دینار باسار، گازین یانیری
كیمله‌ر وئردی جفا، كیم قازانیری
فلك وئریر، بیر ده آلیر الینده‌ن
كیمسه بیلمه‌ز نئجه كسه‌ر دالیندان
    
٥٩
گورگوربابا دؤندوم عتابلاشماغا
یئنگیده‌ن اوتوروپ چوخ دردله‌شمه‌یه
بولوتلار قارالسا، دؤنسه ده آغا
واز گئچمه‌ره‌م، عقلین چئویر باشینا
قویما یابانجی ایش قاتسین ایشینه
    
٦٠
گورگوربابا آسمانینا باخارام
دارقین دارقین سیرلارینی اوخارام
خیاللاردان دووار یاپیپ ییخارام
گاه بولوتلار قاپلار سما یوزونو
گاه دا یاغیش یاغار، یاشلار گؤزونو
    
٦١
دؤرت اطرافین رنگ رنگ اولور گئجه‌له‌ر
سئوداندایام، حسرت منی قورجالار
گئجه‌ن گؤره‌ن گوندوزونده‌ن بورج آلار
عاشیقینام، یوخسا باخمام اوزونه
گؤزوم تیكمه‌م گئجه گوندوز گؤزونه
    
٦٢
سنه عاشیق اولان محرومدور سنده‌ن
گئچه‌ر گئجه‌له‌ری، گوندوزو غم‌له‌ن
كاشكی اوزاقلارا دوشه‌یدین منده‌ن
راحت اولوردوق بیز بو بلالاردان
نه قازانمیش اولدوق گؤز آلالاردان
    
٦٣
بو نفت‌یندیر بیزه هر شئی گؤسته‌ره‌ن
فنالیقلار، پیس هاوالار اسدیره‌ن
سنسه‌ن سوچلو، بوندا سنسه‌ن باسدیران
نه‌مه ده‌یه‌ر، وئردیم ار شهیدله‌ری
گؤمدوم اؤز الیمله‌ن گنج اومودلاری
    
٦٤
نه‌ده‌ن اوزوم گولسون بابا گورگور´وم
آز قالیپدیر شیرین عقلیم چیلدیریم
سنده‌ن باشقا دردیم كیمه بیلدیریم
بو ایشه بیر چاره آللاه عئشقینه
چوخ وارلی‌ییق، بنزیریك چوخ دوشكونه
    
٦٥
گورگوربابا زمانلارین دیلینده
چاش قالمیشیق اونون بونون الینده
باشیمیز قویموشوق ملّت یولوندا
خالخ نه دیییر، قوی دا دئسین، نئیده‌غین
یا بو درده دؤزه‌ك، یا دا گئده‌غین
    
٦٦
گورگوربابا فلك نه یاپدی، یاپدی
یالغیز اولان اؤزویچون بیر دوست تاپدی
هر گله‌ن یئرینده‌ن من منه‌م قوپدو
بیزله‌رسه بیلمیریك كیمدیر دوستوموز
كیمله‌رین الینه دوشه‌ر پوستوموز
    
٦٧
گورگوربابا قالان قولان بیزله‌ریك
دده‌له‌رده‌ن گئری قالان ایزله‌ریك
گئچمیش تاریخله‌ره ایچده‌ن سیزلاریق
قافقاسلاردا پنجه‌له‌شه‌ن كیم واردی
كیمله‌ریدی آتلارمیزی سوواردی
    
٦٨

گورگوربابا قورخما بوگون، یاریندان
سیجاغیندان، ساووغوندان، قاریندان
دوشونجه‌سی ضعیف سوغان زاریندان
بوگون بئله ایسه، یارین دایانماز
فلك بیر یاماندیر، هر شئیه قانماز
    
٦٩
گورگوربابا سنی قیزان قالیپدیر
گئجه گوندوز دوشونجه‌یه دالیپدیر
اؤزو ده بیلمیری نه‌له‌ر آلیپدیر
نئجه گیردی، نئجه چیخسین بو ایلده‌ن
نئجه قورتاراجاق گورگورو سئلده‌ن
    
٧٠
گورگوربابا یانا یانا كول اولدون
كیمین ایدین؟ ایندی كیمله‌ره قالدین؟
نه‌لر دوشونه‌ردین، نه‌له‌ره دالدین!
بیر آز دا دال بیزیم اولان خویلارا
وایینی قات بیزه دوشه‌ن وایلارا
    
٧١
گورگوربابا ظالیم اولما حاققیما
یوك اكله‌مه آغیرلاشان یوكومه
دردله‌شه‌غین سن ده آجی دردیمه
یارالی‌یام، اؤزوم چئشیتلی یئرده‌ن
آلمادیم بیر خبر وفاسیز یاردان
    
٧٢
یانا یانا گورگوربابا قالاسان
اؤز غمینه گئجه گوندوز دالاسان
من دیدیییم عئشقه اؤزون سالاسان
بلكه یانار سرت گؤیلون حالیمیزه
گئچیرده‌سه‌ن قولونو قولوموزا
    
٧٣
گورگوربابا دره تپه بیلمیرسه‌ن
سنه دیله‌نله‌ره هیچ ده دیلمیرسه‌ن
ییللارجا آغلادیم، گؤزوم سیلمیرسه‌ن
كؤلگه‌نده یاشایان غریبی تانی
نه جانی جانیندان، نه قاندی قانی
    
٧٤
سفله بیر قان بسله‌ر، بنزه‌مه‌ز قانا
ظالیمجه قییدیلار چوخ شیرین جانا
آتشینده‌ن بتر اوره‌ییمیز یانا
اؤلسه‌م بیله، اونوتمارام گونله‌ریم
چوخ ایری دارتدیلار یومشاق دنله‌ریم
    
٧٥
گورگوربابا، گل یادلایاق اؤزله‌ری
اوزاقلاردن سیزه باخان گؤزله‌ری
توخ ائدیپسه‌ن آلتینیندان یوزله‌ری
سنی بكله‌یه‌نله‌ر كیمدیر بیلسه‌ن
نه‌ده‌ن سئوگیلییه جفا قیلسان؟
    
٧٦
گورگوربابا ییغناق اولاق بیر یئره
قالماسین آرادا تپه‌یله‌ن دره
مادام كه بختیمیز قارادیر قارا
توپلاناغین، بیر اولاغین ایلمیزده
ائو بیزیمدیر، آناختاری بئلیمیزده
    
٧٧
قوجا بابا قویما دوشه‌ك دیلله‌ره
رذیل اولاق اصیلده‌ن رذیلله‌ره
بیلمه‌م سنه دیییم، بیلمه‌م ایلله‌ره
خاین بیزه چاغداشیمیز، چاغیمیز
لال اولوپدور باغوانیمیز، باغیمیز
    
٧٨
گورگوربابا اطراف داغا باخاركه‌ن
یاغیش یاغار دره‌له‌ره آخاركه‌ن
سئلله‌ر داشار معمورلاری ییخاركه‌ن
كاشكه من ده یاغمور اولوپ اینه‌یدیم
فایداسیز آتشین بیر سؤندوره‌یدیم
    
٧٩
چوخ آجیدیم یانینا گلدیییمه
غم داشییان حاللاری گؤردویومه
سیرر بیلمه‌یه‌نله‌ره سیرر وئردیییمه
گورگوربابا دؤنه‌جه‌یه‌م، گئدیر‌ه‌م
چوخ عتابلار سنه قارشی ائدیره‌م
    
٨٠
كاشكه دردیم فلكه بیلدیره‌یدیم
بلكه دینله‌ردی، آه بیر دیندیره‌یدم
قیزمیش ایسه آوودوپ، سؤندوره‌یدم
سنده‌ن اییی بلكه سیزلار حالیما
یالوارمادان سنین تكین ظالیما
    
٨١
گورگوربابا كؤیله‌ریمیز اوزاقدیر
چؤل‌له‌ریمیز بولبول یئرینه زاغدیر
باداملی قوزوموز قوخموش قوزاقدیر
یاغیش یاغار بیزده‌ن اوزاق چؤل‌له‌ره
سویوموز یوخ، قوش قونمورو گؤل‌له‌ره
    
٨٢
گورگوربابا آرخلاریمیز قاچاردیر
اوراغیمیز دسته دسته بیچه‌ردی
بوگونه باخ، خسته‌له‌ریم ناچاردیر
نئده‌غین گولمورو اوزوموزه فلك
بیر سؤز دئسه‌م چالینیر دف، دومبه‌له‌ك
    
٨٣
قیرمیزیلار دوراندیلار ایییجه
بیر دم فیكیرله‌ره سالان دالماجا
دوراندیلار بیر عاشیق دورانجا
دالقا گلدی، سیلدی اولان ایزله‌رین
گنه دئدیكله‌رمیز اولدو بیزله‌رین
    
٨٤
آی ییلدیزا باخاریدیق گئجه‌له‌ر
دوشونجه‌له‌ریمی دردله‌ر قورجالار
بورجو ویران بیر ده دؤنه‌ر بورج اولار
ساخین گووه‌نیلمه‌ز فلك ایشینه
سنی آلدادیر، گولدورور بوشونا
    
٨٥
دئدیییمیز سؤزله‌ری آنلامادیلار
بویوردوغوموزو دینله‌مه‌دیله‌ر
اویقون اولان شئیی آرامادیلار
فلك دئدی دور باخ، سیزه نئده‌ره‌م
ذاتن بودور، بیلدیییمی ائده‌ره‌م
    
٨٦
گورگوربابا چوخ سؤله‌شدیم، بس دئییل
قارشیداكی ملّا دئییل، قس دئییل
گور سسینه گؤره سسیم سس دئییل
گل گئده‌ك ده، گزه‌ك شیرین ایلله‌رده
باخ نه خراب گزینیرسه‌ن دیلله‌رده
    
٨٧
«تلعفر»ین ایگیدله‌ری، مردله‌ری
بیزده‌ندیله‌ر جوانلاری، قارتلاری
صاف قانلاری، سوموكله‌ری، اتله‌ری
گل بولارا بیر گون سفر ائده‌غین
آیاقداكی باشیمیزدان گئده‌غین
    
٨٨
«اربیل‌ین قالاسی» یوكسه‌كده‌ن باخار
فلكه اوخلاری اوخ اوسته تاخار
یاش یئرینه گؤزله‌رینده‌ن قان آخار
اطرافیندا نیسان سویو ایچه‌نله‌ر
دسته دسته نرگیزله‌ری بیچه‌نله‌ر
    
٨٩
«آلتین كؤپرو» عشرت ییغار باشینا
چوخ اسكیدیر، كیمسه بیلمه‌ز یاشی نه
خوش دوراندیر، ال اوزاتما ایشینه
اورادیر هر زمان سیرانگاهیمیز
كور ائده‌یدی دوشمانلاری آهیمیز
    
٩٠
گورگوربابا تزه دئییل داغلاریم
اطرافیندا نرگیز گوللو باغلاریم
غمگین ایمیش ایندی دیییر چاغلاریم
كیمسه گلمه‌ز، كیمسه گئتمه‌ز یانینا
گئچه‌ن گونله‌ر هپسی منّت جانینا
    
٩١
گورگوربابا «تاووغ‌ون میناراسی»
یارالدی، قاپانمیری یاراسی
اسكی دوستوموزدور دوستلار آراسی
یاراسینا حكیم، طبیب اولایدین
قارانلیقلارینا ایشیق بولایدین
    
٩٢
گورگور بابا «طوز خورماتی» داغلاری
نشئه وئره‌ن عاشیقلارا باغلاری
هاردا قالدی دوزه‌ن وئره‌ن چاغلاری؟
اونون سنده‌ن بكله‌دییی چوخ ایمیش
گول‌له‌ری وار، باغوانلاری یوخ ایمیش
    
٩٣
گورگوربابا «شاه سیوه‌ره‌ك» یاللاری
بیزی قوجاقلایان تمیز قوللاری
قورویوپدور بوداغیندا داللاری
آچ گؤزونو ،باخگیلان اوزاق یوللارا
سنی بكله‌یه‌ن چوخ، اویما ایلله‌ره
    
٩٤
«خانقین»ین آلما اریك باغیندان
«وند نهری»دیر آخان اولو داغیندان
گؤره‌ن دیییر اؤپه‌یدم یاناغیندان
«حج قره»یه بیر گون یولو دوشه‌نده
باخ نه‌له‌ر وارایمش او گول، گولشنده
    
٩٥
ایسته‌رسه‌ن گل گئده‌ك «قیزیل رباطلار»ا
اوغرایاغین ایگیتله‌ره، ذاتلارا
باخ كیمله‌ر مینه‌ردی قوشان آتلارا
قافله‌میز اورالاردن گئچه‌ردی
هر شئیین اییی‌سین اوردان سئچه‌ردی
    
٩٦
«مندلی»ده‌ن كروانیمیز گئچه‌نده
«آلتین تاس»دا سولارینی ایچه‌نده
یام یاشیل باغیندان لاله بیچه‌نده
حرمت اهلی‌دیرله‌ر «منده لاوی»له‌ر
آسلانلارداندیلار قالان یاورولار
    
٩٧
«شهره‌بان»دان، «بعقوبه»ده‌ن «بغداد»ا
كوچه كوچه یاییلمیشدی اوز ده ده
كیمی باغلاریندا، كیمی قرفه‌ده
دیلله‌رینده‌ن آنلا نه وار ایچینده
دوزگون دوزگون اینجی صدف ایچینده
    
٩٨
«بصره كورفه‌سی»نده‌ن گئده‌ك «تبریز»ه
«شهریار»لان قاووشاغین اوز اوزه
دیز به دیز اوتوراق، دنیا بیز بیزه
حیدر بابا «قاییش قورشاق» كؤیونده
باخاق نه‌له‌ر قازانیپدیر اوینده
    
٩٩
حیدربابا گلدیم سلاملاشماغا
كوسموش ایسه‌ن، سنله‌ن باریشماغا
چوخ یورقون‌سان، آهین یوخ قونوشماغا
«شهریار»ا جواب وئرمیش اولایدین
دردله‌رینه قولاق وئرمیش اولایدین
    
١٠٠
اوزاقداییق، سانما سنی گؤرمه‌ریك
واللاه دیلیمیزده‌ن سنی سالماریق
سیزده‌ن باشقا كیمسه‌له‌ره دالماریق
حیدربابا گؤردوم سنی دوشومده
خیالین هله ده قالیپ باشیمدا
    
١٠١
یازیق فلك دونیامیزی آییردی
دوستو آتدی، دشمنله‌ری قاییردی
سانكی خوش گونله‌ری بیر بیر ساییردی
ماراق ائتمه، گنه بیزیك دورانلار
فلك ایچین درتلی تورو هؤره‌نله‌ر

سؤزلوک

آناختار: آچار، کیلیت
آووتماق: تسلی دادن
اوخاردیم: اوخماقUxmaq : آنلاماق، اؤیره‌نمه‌ک، بیلمه‌ک، قاوراماق
اوخالاماق (؟):   
اوربا (؟): (اورواUrva اوغراUğra : چوخ سولو خمیر، اون و سو قاریشیمی بولاماج)  
اوز ده ده (؟):
اوزلاریدان (؟):
اوسکوت: أَسْكُتْ، سوس، ساکیت اول (عره‌بجه)
اؤکسوز: یتیم
اویدومÜydüm  (؟): اولاشماق، واصیل اولماق
اوینده (؟):
باجوكلدا (؟):
بایناماق: بانلاماق
پک: برک، قاتی، سیخی، ساغلام، دایانیقلی
تاووغ‌ون میناراسی: داقوق‌ون مناره‌سی (داقوق: شهر آدی)
توختاشماق: دوروپ دینله‌نمه‌ک، راحاتلاماق، سرینله‌مه‌ک، موتلو اولماق
تونکولمه‌کTünkülmek  (؟): سیچراماق، آتیلماق، زیپلاماق
چورقالاماق: ییغماق، توپلاماق
چیلقین: دلی، دیوانه،
خیرجان: ایشله‌نمیش کیره‌ج
خیرخیز: اوغرو، دزد
خیزمه‌ت: خدمت
دویون: عقد، جشن عروسی
دیلمیرسه‌ن (؟):
دیله‌نله‌ره (؟):
زار: غشاء، پوسته، رویه
سازلاماق: اؤلو اوچون آغیت سؤیله‌مه‌ک
سایاق: یوخوسو یونگول اولان
سوقاق: کوچه
طور: ائوین ایچی
قاپلاماق: بوتونویله قاپاماق، اؤرتمه‌ک، قاپساماق
قاییردی: باشقالاری‌نین ضررینه و حاقسیز یئره بیرینه یاردیمچی اولماق و بیله‌سینه قولایلیق ساغلاماق
قرفه (؟): (قرعه: زمین خشک و بایر که در آن چیزی نروید)
قس: کشیش مسیحی (پائین‌تر از اسقف، بالاتر از متولی کلیسا)، هم‌ریشه با «قشه» و «کشیش»
قورجالاماق: قورتالاماق، ال‌له قاریشدیریپ باخماق
قوزاق:خام میوه، توپاج، ده‌وه دیشقی‌سی
قیشلا: ساخلاو، پادگان
کومانKoman : اوموت
گئده‌غین: گئده‌لیم، گئده‌ک
مِحَطّه‌: ایستگاه راه آهن
معنی: مانی، تورکو، بایاتی
ناخسی: هانگی‌سی، هانسی‌سی
هئیوانیندا (؟): ائیوانیندا (؟)
یارسی: یاریسی
یاماقسیز (؟): (یاماق :تارلا و باخچانین سولاما ایشینه باخان کیمسه، گئنیش آغیزلی قابلاما)
یاناشا: یاناشی، یانی، بیتیشییی
یورقالاماق: یورقا یورومه‌ک، یورغه رفتن
ییغلاماق: آغلاماق، گریستن
ییللار: ایلله‌ر، سالها

No comments:

Post a Comment

Note: Only a member of this blog may post a comment.