اورمولو سئیید حوسئین عرب‌باغی اؤوگوسونده – آنی‌سی‌نا ایکی تورک‌جه قوشوق
دو شعر تورکی در مدح و به یاد سید حسین عرب باغی
اورومی
بو تورک‌جه قوشوق‌لار، هم یاتیرین ایچی‌نده تابلو اولاراق آسیلمالی، هم ده یاتیرین دیشی‌ندا کتیبه اولاراق یازیلمالی‌دیر.
این اشعار تورکی هم باید به صورت تابلو در داخل زیارت‌گاه، هم به صورت کتیبه نوشته شده و در بنای زیارت‌گاه نصب شوند.
.png)
١-اورمونون گؤزه‌ل زیارت‌گاهی وار
اوُرموُنوُن گؤزه‌ل زیارت‌گاهی وار
اوردا بیر گؤزه‌ل سئییدین آدی وار
«عرب‌باغی» او سئییدین آدی‌دیر
«عرب‌باغی» پیغمبر اولادی‌دیر
هرگون زیارت‌گاه‌دا وئریلیر نذیر
دردی اولان مریض، قاپی‌سی‌‌ندا گه‌زیر
«عرب‌باغی» آدی دوشوپ دیل‌له‌ره
مؤعجوزله‌ری سه‌س سالیپ‌دیر گؤی‌له‌ره
«عرب‌باغی» حوسئین‌ین بالاسی‌دیر
آغام حوسئین سئییدله‌ر آغاسی‌دیر
٢-باتدێن سحرین اوُلدُوزوُ ته‌ک، نورلوُ کوکب
ائی سیدِّ والا به «عرب‌باغێ» ملقّب
وئی رهبرِ دین، شمسِ هُدی، فردِ مجرّب!
ائی آدێ حۆسئین، جَدّی اوْلان موُسایِ کاظیم!
مکتوبوُ اوْلان مونسی، اقلامێ ملازم
ترویجِ شریعت‌ده اساتید، اعاظم
وار علمِ لَدُنّون، سه‌نه توصیف نه لازم
حکمت قلمی‌یله‌ن یازان احکامێ مرتّب
بیر خدمتِ ارزنده شریعت‌ده سه‌نین وار
وجهی اوْدوُ جدّین ته‌ک آغا، ممتحنین وار
قرآن‌یله تطبیق اوْلوُنوُر هر سخنین وار
هر وقت دعادا سه‌نی چوْخ ذکر ائده‌نین وار
ائی قلبِ شریفی اوْلان آللاه‌ا مقرّب
چه‌کدین اوْ قه‌ده‌ر مدّتِ عؤمرۆنده ریاضت
تبلیغ ائله‌دین دینی، تاپێپ خلقْ هدایت
سه‌کسه‌ن ایکی جلد ائتمیسه‌ن احکامێ کتابت
آچدێن بو جهان اهلی‌نه سه‌ن بابِ سعادت
دینی تانێمازلار مگر اشخاصِ مودّب
خلّاق‌یله داییم وار ایدی راز و نیازێن
گؤرمه‌ز بوُ زمانه هه‌له هم مثل و طرازێن
متروک ایدی، برپا ائله‌دین جمعه نامازێن
محراب‌دا هرگۆن گؤرۆنۆر جایِ نامازین
صف‌له‌ر دۆزۆلۆر جمعه‌له‌ر، ائی بانی‌یِ مکتب
عالم‌ده آغا، دادرسی‌یدین ضعفانێن
ساداتێن اوُموُدوُ سه‌ن ایدین، هم فقرانێن
سه‌ن‌سیز کیم ائده‌ر یاد بوُ درمانده‌له‌ر حالێن؟
حاشا گه‌له بوُ عالمه مانند و مثالێن
ائی روح و روانێ اوْلان عالَم‌ده معذّب!
اثنا عَشَری مذهب‌ه رهبر سه‌ن ایدین، سه‌ن
تلقین ائله‌یه‌ن دینی مکرّر سه‌ن ایدین، سه‌ن
مجری‌یِ احادیثِ پیمبر سه‌ن ایدین، سه‌ن
بیچاره و درمانده‌یه یاور سه‌ن ایدین، سه‌ن
ائی مهری دوْلان قلبِ جماعت‌ده لبالب
ائی داد اوْ گون‌ده‌ن ائله‌دین ترکْ جهانێ
ماتم‌زده قێلدێن آغا، مخلوقِ خدانێ
اۆممید ائوی، حیرت‌ده قوْیان اهلِ سخانێ
نومید قاپێن‌دان ائله‌مه‌زدین فقرانێ
هر یئرده گؤره‌ن‌ده سه‌نی ایسته‌ردی‌له‌ر مطلب
سن داعی‌یِ حقّ‌ی ائله‌یه‌ن وقتْ اجابت
اطرافێوا جمع اوْلدوُلار احباب و قرابت
غسلوُن وئریپ، ائتدی‌له‌ر اوْ گۆن دفنینه شرکت
گؤز یاشێ تؤکه‌ردی هامێ آردێنجا جماعت
باتدێن سحرین اوُلدُوزوُ ته‌ک، نورلوُ کوکب
ائی اهلِ عزا، قلبی فراقێن‌دا یانان‌لار!
وئی اهلِ حقیقت، سؤزۆنه تئز اینانان‌لار!
ائی رهبرین اه‌ل‌ده‌ن وئریپ، آواره قالان‌لار!
ائی مجلسِ ترحیمی‌نه یک‌سر جمع اوْلان‌لار!
منظورِ نظرده‌ن نه‌دیر عرضیم؟ بوُدوُ مطلب:
ائی کاش اوْلایدێق هامێمێز کربِ بلادا
بیر شامِ غریبان گئجه‌سی قان‌لێ منادا
گؤز یاشێ تؤکوپ، ناله ائدیپ خیمه‌سرادا
اوْل خیمه که یانمێش‌دێ، قوُروُلموُش‌دوُ منادا
اوْلموُش‌دوُ نگهبان اوْ گئجه حضرتِ زینب
بوُ بنده‌یِ عاصی قالێپ آواره، ایلاهی!
وار دردِ درونوُ، سه‌ن ائله چاره، ایلاهی!
یاندێرما جهنّم‌ده مه‌نی نارا، ایلاهی!
غفّارِ ذنوب‌سان بوُ گوناه‌کارا، ایلاهی!
غفّارێ گوناه‌لارێن! اؤزۆن عفو ائله، یارب!
سئیید حوسئین عرب‌باغی یاتیری، اورمو – آزه‌ربایجان
– تورک‌ایلی
اورمولو سئیید حوسئین عرب‌باغی اؤوگوسونده – آنیتی‌نا ایکی
تورک‌جه قوشوق
https://sozumuz1.blogspot.com/2022/10/blog-post_5.html
آیت الله «عرب‌باغی اورومی»: مراجع تقلید و مجتهدین شیعی،
علّت ذلّت و ضعف و فلاکت اهل اسلام و ایران هستند
https://sozumuz1.blogspot.com/2022/09/blog-post_24.html
کشتار سیصد هزار تن تورک در سالماس و اورمو - اورمیه و
سولدوز به روایت سید حسین عرب باغی اورومی
No comments:
Post a Comment