تورک خالقی‌نین تورکییه ایله ایلگی‌له‌نمه‌سی‌نین تاریخی، توپلوم‌سال،
کیم‌لیک‌سه‌ل و پیراگماتیک نه‌ده‌ن‌له‌ری واردیر
مئهران باهارلی
ایمامی شیعه‌چی‌لیک، صفوی‌چی‌لیک، چالدیران‌چی‌لیق، آنتی عوثمانلی‌لیق
و آنتی تورکییه‌لی‌لیک، تورک خالقی‌نی اؤزونه یادلاشدیرمانین آراجی، و ایران –
فارس میللی کیم‌لییی‌نین ته‌مه‌ل‌له‌ری‌نده‌ن‌دیر.
ایران‌دا یاشایان تورک خالقی‌نین آزه‌ربایجان رئسپوبلیکاسی‌ندان داها چوخ، تورکییه ایله ایلگی‌له‌نمه‌سی‌نین ده‌رین تاریخی، توپلوم‌سال، کیم‌لیک‌سه‌ل و پیراگماتیک نه‌ده‌ن‌له‌ری واردیر:
۱-قافقاز تورک‌له‌ری‌نین آنادولو تورک‌لویونه اولان باغ‌لاری ایله قارشی‌لاشدیریلان‌دا، ایران‌دا یاشایان تورک خالقی سوی، دیل، اینانج، آغیز، .... آچی‌لاری‌ندان، قات قات داها چوخ تورکییه - آنادولو تورک‌لویونه یاخین‌دیر. حتتا اونون اوزانتی‌سی ساییلیر. ایران‌دا یاشایان تورک کیتله‌سی‌نین سوی‌جا یوزده دوخسانی‌نا یاخینی ایسه گئچه‌ن آلتی یوز ایلده تورکییه - عوثمانلی‌دان دوغرودان تورک‌ایلی - ایران‌ا گه‌لمه‌دیر.
۲-تورک خالقی‌نین ته‌مه‌ل میللی دستان‌لاری، کوروغلو، موللا نصرالدین، ده‌ده قورقوت، اصلی کرم .... یا دوغرودان آنادولو - عوثمانلی‌دا یا دا اورادان گه‌له‌ن تورک‌له‌رجه یارادیلمیش‌دیر.
۳-ایران‌داکی علوی (علی آللاهی) و سوننی تورک‌له‌ر، اؤزه‌ل‌لیک‌له میللی دوشونجه‌لی اولان‌لار، ده‌رین‌ده‌ن تورکییه‌یه باغ‌لی‌دیرلار.
۴-ایران‌داکی تورک‌له‌رین میللی کیم‌لیک‌له‌ری اولان «تورک»، تورکییه‌نین ده میللی کیم‌لییی‌دیر. اویسا آزه‌ربایجان رئسپوبلیکاسی‌نین میللی کیم‌لییی روسیانین یارادیپ تحمیل ائتدییی کؤک‌سوز و یاپماجیق اولان «آزه‌ربایجان‌لی»دیر. آزه‌ربایجان‌لی، میللی کیم‌لیک اولاراق اؤزه‌ل‌لیک‌له آزه‌ربایجان آدی داشییان اوچ اوستان دیشی‌ندا یاشایان تورک کیتله‌سی‌نه که‌سین‌لیک‌له هر هانسی بیر شئی ایفاده ائتمه‌ز. حتتا بعضه‌ن قوزئی‌ده‌ن گه‌له‌ن آزه‌ری‌لیک گیبی، تورک خالقی‌جا میللی بیر تهدید ساییلیر.
۵-ایران‌دا سون آلتی یوز ایلده تورک - تورکمان دئوله‌ت‌له‌شمه‌سی (قاراقویون‌لو، آغ‌قویون‌لو، قیزیل‌باش، آوشار و قاجار) هامی‌سی عوثمانلی - آنادولودان گه‌لمه تورک‌له‌رین اثری‌دیر.
.jpg)
۶-اون دوقوزونجو یوز ایل بویونجا و ییرمینجی یوز ایلین باشی‌ندا ایران‌دا تورک‌له‌رین مه‌نیمسه‌دییی مودئرنیته، مشروطه، اتحاد اسلام، سئکولاریسم گیبی آخیم‌لار، دوغرودان عوثمانلی - تورکییه‌ده‌ن گه‌لمه‌دیر. بونلارا سیرادان خالق کؤنول‌لو اولاراق قوشولموش‌دور. آزه‌ربایجان رئسپوبلیکاسی‌ندان مشروطه و سونراسی‌ندا گه‌له‌ن آخیم‌لار ایسه، تورک میللی کاراکتئرده‌ن یوخسون کومونیسم، اینقیلاب‌چی‌لیق، روس‌چولوق، توتالیتاریسم و تئروریسم ایدی. بیر سیرا آیدین و سئچگین‌له‌رین ته‌رسی‌نه، تورک خالقی، اؤزه‌ل‌لیک‌له قافقاز سینیری‌ندان اوزاق بؤلگه‌له‌رده یاشایان تورک‌له‌ر، بونلاری هئچ واخت مه‌نیمسه‌مه‌میش‌دیر.
۷-ایران‌دا مودئرن تورک میللی کیم‌لییی ۱۹ و ۲۰ اینجی یوز ایل‌له‌رده عوثمانلی‌دان بورایا گه‌لمیش «اتحاد اسلام»، «اتحاد و ترقی»، «ژؤن تورک»، «تورک اوجاق‌لاری»نین یئرلی وئرسییون‌لاری‌نین قورولماسی ایله زیروه یاپمیش‌دیر. آزه‌ربایجان رئسپوبلیکاسی‌ندان - اؤزو ده عوثمانلی ائتگی‌سی‌نین سونوجو اولوشان قیسا «تورک مساوات» دؤنه‌می دیشی‌ندا - هئچ بیر زامان تورک میللی کیم‌لییی ته‌مه‌لی‌نده اولان هر هانسی بیر دوشونسه‌ل - سیاسی آخیم گونئی‌ه گه‌لمه‌میش‌دیر.
۸- تورک خالقی تورک‌ایلی‌ده، اؤزه‌ل‌لیک‌له باتی آزه‌ربایجان بؤلگه‌سی‌ندا، عوثمانلی‌نی که‌ندی‌سی‌نی ائرمه‌نی، آسورو، روس و اینگیلیزله‌رین ظولمونده‌ن قورتاران قورتاریجی بیر گوج و قارانتور اولاراق گؤرور. آزه‌ربایجان رئسپوبلیکاسی‌نین تورک خالقی ایله ایلگی‌لی گئچمیش‌ده و گه‌له‌جه‌ک‌ده بئله بیر رول اوینادیغی و یا اوینایابیله‌جه‌یی سؤز قونوسو دئییل‌دیر.
٩-ایران‌دا تورک خالقی دوزئیی‌نده هئچ بیر زامان آزه‌ربایجان رئسپوبلیکاسی ایله بیرله‌شه‌مه ایسته‌ک و حرکت‌له‌ری اولمامیش‌دیر. آز سایی‌دا ایسته‌ک‌له‌ر، تورک خالقی دوزئیی‌نده دئییل، گئنه‌ل‌ده شرقی آزه‌ربایجان اوستانی‌ندان اولوپ دا تورک‌لوک‌له سورون‌لو بیر سیرا آزه‌ربایجان‌چی سییاسی فعال‌لاردا گؤرونموش‌دور. آنجاق عوثمانلی‌یا ایلحاق ایسته‌یی، اؤزه‌ل‌لیک‌له بیرینجی دونیا ساواشی ایل‌له‌ری‌نده تورک خالقی آراسی‌ندا و بوتون تورک‌ایلی‌ده (اورمو، سالماس، خوی، ماکی، تبریز، همدان، تالیش .... بولگه‌له‌ری‌نده) اولدوقجا گوج‌لو اولموش‌دور. عوثمانلی‌یا ایلحاق ایسته‌یی‌نین صفوی دؤنه‌می‌نده‌ن باش‌لایاراق (آزه‌ربایجان‌ی عوثمانلی‌یا ایلحاق ائتمه‌ک ایسته‌یه‌ن – دیو سولطان روم‌لو، اولاما سولطان ته‌که‌لی، ....) اوزون بیر گئچمیشی واردیر.
١٠-ایران‌دا تورک کیتله‌له‌رین تورک میللی کیم‌لییی‌نی مه‌نیمسه‌مه‌سی‌نده تورکییه، ایسته‌ر دیل، ایسته‌ر اده‌بییات، کولتور یاپیت‌لاری، فیلم‌له‌ر، توریسم اولاناق‌لاری، آوروپالی‌لیق، یاریمچی‌لیق اولسا بیله دئموکراسی و لاییک‌لییک .....آچی‌لاری‌ندان چه‌کیم مرکزی، اولگو، اه‌سین و قیوانج قایناغی‌دیر. آزه‌ربایجان رئسپوبلیکاسی ایران‌دا یاشایان تورک‌له‌ر آراسی‌ندا گئنه‌ل‌ده به‌نزه‌ر بیر ائتگی‌یه صاحیب دئییل‌دیر.
۱١-ایران‌دا تورک‌له‌رین اؤز میللی کیم‌لیک‌له‌ری‌نه قاییدیشی، بیر آنلام‌دا اؤزونو روسیا و ایران‌ین اویدوردوق‌لاری آنتی‌تورک، آنتی‌عوثمانلی، آنتی‌تورکییه «آزه‌ربایجان‌چی‌لیق» - «آزه‌ربایجان‌لی‌لیق»دان قورتارماسی، و سون بئش آلتی یوز ایل تاریخی‌نده اولدوغو گیبی، تورکییه‌نی یئنی‌ده‌ن کشف ائتمه‌سی و اونونلا هر طره‌ف‌لی، اؤزه‌ل‌لیک‌له میللی کیم‌لیک، دیل و سییاسی باغ‌لاری گه‌لیشدیرمه‌سی‌له مومکون‌دور. اویسا آزه‌ربایجان رئسپوبلیکاسی‌ندا رسمی میللی کیم‌لیک، خاچ‌لی – پان‌ایرانیسم – ایستالینیزیم یاپیمی اولان آنتی تورک آزه‌ربایجان‌چی‌لی‌لیق ایدئولوژی‌سی‌دیر. آزه‌ربایجان‌چی‌لی‌لیق ایدئولوژی‌سی‌نین ایسه ته‌ک ائتگی‌سی، ایران‌دا یاشایان تورک خالقی‌نی میللی آچی‌دان کؤک‌سوز و کیم‌لیک‌سیزله‌شدیرمه‌ک، اونو اؤز تاریخی ایله تورکیک دونیاسی‌ندان قوپارتماق، پارچالاییپ فارس‌لاشماسی‌نا یاردیم ائتمه‌ک‌دیر.
۱٢-بیزیم دوروم بو باغلام‌دا مولدووانین دورومونا به‌نزه‌ر. مولدووانین اؤزونه و اؤز کؤک‌له‌ری‌نه دؤنوشو، رومانیایا قوجاق آچماق‌دا اولدوغو کیمی، بیزیم ده اؤزوموز و اؤز کؤک‌له‌ریمیزه قاییدیشیمیز تورکییه‌یه یؤنه‌لمه‌ک‌ده‌دیر. ذاته‌ن بوگون قافقازدا آزه‌ربایجان رئسپوبلیکاسی دییه بیر شئی وار ایسه، او دا گونئی قافقاز آیدین و سئچگین‌له‌ری‌نین واختی‌له و یئری‌نده اولاراق عوثمانلی ائتگی‌سی آلتی و ایش‌بیرلییی‌نه گیرمه‌سی‌نین بیر سونوجودور ....
۱٣-ایران‌دا تورک آیدین‌لار و اؤزه‌ل‌لیک‌له تورک کیتله‌سی‌نین عوثمانلی - تورکییه مساله‌له‌ری ایله یاخین‌دان ایلگی‌له‌نمه‌سی و اونلارا قارشی دویارلی اولماسی، تاریخی آچی‌دان پان‌ایرانیسم، روسییا و ائرمه‌نیستان‌ین ییرمینجی یوز ایل بویونجا قورخولو رؤیاسی اولموش‌دور. چونکو ته‌ک‌جه بونون تورک‌ایلی‌نی باغیم‌سیزلیغا گؤتورمه گوجو واردیر.
۱٤-فارس شیعه‌چی‌لیک، صفوی‌چی‌لیک، چالدیران‌چی‌لیق، آنتی‌عوثمانلی‌لیق، آنتی‌تورکییه‌لی‌لیک .... تورک خالقی‌نی اؤزونه یادلاشدیرما آراج‌لاری، و ایران - فارس میللتی کیم‌لییی‌نین ته‌مه‌ل‌له‌ری‌نین اه‌ن اؤنه‌م‌لی‌له‌ری‌دیر. بونون ته‌رسی ده دوغرودور. فارس شیعه‌چی‌لیک، صفوی‌چی‌لیک و چالدیران‌چی‌لیق‌ا قارشی چیخاراق عوثمانلی و تورکییه‌نی یئنی‌ده‌ن کشف ائتمه‌ک، اؤزونه قاییدیش و تورک میللی کیم‌لییی‌نین بینؤوره‌سی‌دیر.
۱٥- ایران‌دا یاشاماق‌دا اولان تورک خالقی‌نین یئنی‌ده‌ن تورکییه ایله ایلگی‌له‌نمه‌یه باش‌لاماسی بو گئرچه‌یی گؤسته‌ریر: ایران - روسییا - ائرمه‌نیستان و خاچ‌لی آوروپانین تورک خالقی‌ندا یوخاری‌دان یاراتماق ایسته‌دیک‌له‌ری آنتی‌عوثمانلی‌لیق - آنتی‌تورکییه‌لیک حسّی و میللی قوپوق‌لوق ایفلاس ائتمیش‌دیر. ییرمینجی یوز ایلده ته‌بریز و چئوره‌سی‌نده بیر سیرا سئچگین‌ده یارادیلان گئچیجی آنتی‌عوثمانلی‌لیق، آنتی‌تورکییه‌لیک یانلیش‌لیغی، گینه ده تاریخین اؤز دوغال سئیری‌نده تورک خالقی‌نین اه‌لی ایله آشاغی‌دان یاواش‌جا دوزه‌لتیلمه‌یه باش‌لامیش‌دیر. بو، سئویندیریجی بیر دوروم‌دور.
۱٦-اؤزه‌ل‌لیک‌له دوغو (ته‌بریز، اه‌رده‌بیل، ساراب، موغان، ...) بؤلگه‌له‌ری‌نده‌ن اولان بیر سیرا ایران‌چی - آزه‌ری‌چی - آزه‌ربایجان‌چی - آزه‌ربایجان‌لی‌چی سئچگین و سیاسی فعال‌لار، بو طبیعی و اولدوقجا یارارلی و گه‌ره‌ک‌لی اولان سوره‌جه قارشی چیخیرلار. اویسا اونلار بو آیمازلیغین یئری‌نه، تورک خالقی‌نی، تورک تاریخی‌نی و تورک چیخارلاری‌نی اؤیره‌نیپ ایزله‌مه‌لی و اونلارا اویماغا چابالامالی‌دیرلار.
١٧-آزه‌ربایجان رئسپوبلیکاسی ایران‌دا یاشاماق‌دا اولان «تورک» میللتی‌نه قوندارما «آزه‌ربایجان میللی کیم‌لییی»نی دایاتما کیمی، مافیا ایله ایچ ایچه اولان لومپه‌ن و شارلاتان تورک دوشمان‌لاری‌نی دا لیدئر دییه سیریمایا سون وئرمه‌لی‌دیر. بیزیم میللتین میللی آد و میللی کیم‌لییی‌نین «تورک» اولدوغونو دانماق‌دا ایصرار ائده‌ن‌له‌ر، «لیدئر» دئییل، اولسا اولسا «خایین» اولابیله‌رله‌ر. خایین‌له‌ری بیزه میللی و لیدئر دییه سونان‌لار، تورک خالقی‌نین دوستو اولامازلار.
No comments:
Post a Comment