سوسن نواده رضی: مه‌ن همیشه فضولی ایله دئییشمه‌یی سئومیشه‌م! بیلمیره‌م سببی نه‌دیر؟!

 

سوسن نواده رضی: 

مه‌ن همیشه فضولی ایله دئییشمه‌یی سئومیشه‌م! بیلمیره‌م سببی نه‌دیر؟!

فضولی:

گریبان اولدو رسوالیق اه‌لی‌یله چاک، دامن هم

مه‌نه رسوالیغیم‌دا دوْست‌لار طعن ائتدی، دشمن هم

رهِ عشق ایچره جان قیلدیم گرفتارِ بلا، تن هم

بو یئتمه‌ز می، کی بیر درد آرتیریرسین دردیمه سه‌ن هم؟!

 

سوسن:

بو دونیانین داشین بیر تورلو باش‌دان آتمادین، مه‌ن هم

نه عهدین‌ده، نه قوولوندا وفا سه‌ن ائتمه‌دین، مه‌ن هم

محبّت یول‌لارین چیزدین، ولی سه‌ن گئتمه‌دین، مه‌ن هم

اوساندیردین! بو لذّت ذؤوقونه سه‌ن یئتمه‌دین، مه‌ن هم

 

فضولی:

اگر توتسام غمیم ائل‌ده‌ن نهان، صبر و قراریم یوخ

وگر شرحِ غمِ پنهانیم ائتسه‌م، غمگساریم یوخ

اسیرِ بندِ زندانام، اه‌لیم‌ده اختیاریم یوخ

بو یئتمه‌ز می، کی بیر درد آرتیریرسین دردیمه سه‌ن هم؟!

 

سوسن:

اوره‌ک‌ده درد درد اوسته گه‌لیپ، آوار اولار، امّا

یاشام باش‌دان باشا غم اوستونه غم‌له‌ر قالار، امّا

سئویلمه‌ک نشئه‌سی جان اوستونه جان‌لار جالار، امّا

اوساندیردین! بو لذت ذؤوقونه سه‌ن یئتمه‌دین، مه‌ن هم

 

فضولی:

اولوپ‌دور اشکِ خوناب ‌ایله گولگون چهره‌یِ زردیم

یانیپ‌دیر آتشِ هجرانا جانِ دردپروردیم

جفایِ چرخِ کج‌رفتار اه‌لین‌ده‌ن وار مین دردیم

بو یئتمه‌ز می، کی بیر درد آرتیریرسین دردیمه سه‌ن هم؟!

 

سوسن:

آپارما آبری‌سین اشکین، ساخین بی اعتبار ائتمه!

اگر هجرانا یوخ‌دور طاقتین، عشقین یولون گئتمه!

تیکان‌دان واردیسا قورخون، گوله بولبول کیمی اؤتمه!

اوساندیردین! بو لذت ذؤوقونه سه‌ن یئتمه‌دین، مه‌ن هم

 

فضولی:

گهی شوقِ وصال و گه بلایِ هجر ایله زارام

اؤزوم هم بیلمه‌زه‌م دردیم نه‌دیر، مه‌ن نئجه بیمارام

غمِ عشق ایچره بیر درمانی یوخ درده گرفتارام

بو یئتمه‌ز می، کی بیر درد آرتیریرسین دردیمه سه‌ن هم؟!

 

سوسن:

وصال ایچره ایلاهی نغمه‌له‌ر جان‌دان قوشار اینسان

چه‌که‌ن‌ده فرقتین دردین بوتون دردین آشار اینسان

وصال اولسون یا هجران، عشق‌ده‌ن آللاه‌لاشار اینسان

اوساندیردین! بو لذت ذؤوقونه سه‌ن یئتمه‌دین، مه‌ن هم

 

فضولی:

جدا سه‌ن‌ده‌ن، بلا و دردِ هجران ایله توتدوم خو

قیلیر هر دم مه‌نه بیداد درد آیرو، بلا آیرو

بلا و درده دوشدوم روزگاریم بؤیله، حالیم بو

بو یئتمه‌ز می، کی بیر درد آرتیریرسین دردیمه سه‌ن هم؟!

 

سوسن:

فراقین‌دا اوره‌ک کؤزدور، کؤنول اوددور، خیالیم سو

سئویلمه‌ک – سئومه‌ک اولمازسا، سوْلار اومّید، اؤله‌ر آرزو

گؤره‌ن حالیم، بو مجنون‌دان دا مجنون‌دور دئییر قامو

اوساندیردین! بو لذّت ذؤوقونه سه‌ن یئتمه‌دین، مه‌ن هم

 

فضولی:

طبیبِ عشقه چون اظهار قیلدیم دردِ پنهانی

مه‌نِ بیمارا مطلق اولمادی بیر صحّت امکانی

ازل‌ده‌ن وار بیر دردیم کی یوخ‌دور هیچ درمانی

بو یئتمه‌ز می، کی بیر درد آرتیریرسین دردیمه سه‌ن هم؟!

 

سوسن:

گؤتور دردین، گه‌تیر عشقین جفاسین، چیینیمه سؤیکه‌ن

نه حاجت وار طبیبه دردی‌نین درمانی اه‌ل‌ده‌یکه‌ن

وفا مه‌ن‌ده، صفا مه‌ن‌ده، شفا اسراری مه‌ن‌ده‌یکه‌ن

اوساندیردین! بو لذت ذؤوقونه سه‌ن یئتمه‌دین، مه‌ن هم

 

فضولی:

فضولی! هر زمان بیر طعن ایله باغریم قیلیرسین قان

عجب بیلمه‌ز می سین کیم عشق‌ده‌ن گئچمه‌ک دئییل آسان؟

بیلیرسین دوشموشه‌م بیر درده کیم یوخ‌دور اونا درمان

بو یئتمه‌ز می، کی بیر درد آرتیریرسین دردیمه سه‌ن هم؟!

 

سوسن:

دؤنوپ دؤوران فضولی! ایندی چاتمیش سوسن‌ه صحبت

اوره‌ک قان اولدوسون عشقین یولوندا کیم قویوپ بدعت؟

گئچیلمه‌ز عشق‌ده‌ن، باغری‌ندا بسله‌ر چونکو بیر لذّت

اوساندیردین! بو لذت ذؤوقونه سه‌ن یئتمه‌دین، مه‌ن هم