Monday, December 4, 2017

غزل‌له‌ر، ٢٦-٤٨




غزل‌له‌ر






26


یارین جفایِ غمزه‌‌سی جانیمدا یارادیر

آه و فراق الینده جگر پاره پاره‌دیر

یارین غمینده آغریما، ای دل جفاسینا

قیل‌گیل وفا که جورو اونون بی شماره‌دیر

محشر گونونده مسکنی دَارُ الْخُلُود ایمیش

اول عابدین که قبله‌سی رخسارِ یارادیر

قانیمدان اسریدی چون اونون فتنه‌ گؤزله‌ری

جانین همیشه میلی او چشمِ خُُمارادیر

یا رب نه‌دیر که گؤنلوم ائریشمه‌ز وصالینا

پیوسته داغِ حسرتی باغریمدا یارادیر

کیم که بو یولدا عشقه مرید اولدو ای رفیق

سمعینده عارفین نَفَسی گوشواره‌دیر

چون ذرّه‌دیر «حقیقی»، اونون حُسنو آفتاب

مهتاب چئوره‌سینده نیچوک کیم ستاره‌دیر



27 (*)

بویوندور سدره و طوبی‌، دوداغین آبِ حیواندیر

اونون ماهیّتِ ذوقون نه بیلسین اول که حیواندیر

یوزون إِنَّا فَتَحْنَادیر، تبارک شانینه مُنْزَل

بو وجهی احسنِ صورت دییه‌نله‌ر اهلِ عرفاندیر

رخون گُل‌زارینا قارشی قیزاردی مغربین رنگی

طلوعِ مشرقه زلفون نسیمی عنبر افشاندیر

جمالین پرتویِ نورو منوّر قیلدی آفاقی

دوداغین آبِ حیوانی ساچین ظلمتده پنهاندیر

حدیثِ گوهر افشانین هدایت‌دیر نهایت‌سیز

عقولو اهلِ عرفانین اونون شرحینده حیراندیر

وصالین حسرتِ ناری، منی یاخدی فراقیندا

نه ماهیّت‌سین ای جان کیم، جمالین حورِ رضواندیر

«حقیقی» چون سنی گؤردو، منزّه اولدو عالمده‌ن

گؤزونده صورتِ رحمان، دیلینده ذکرِ سبحاندیر



28 (*)

ای مَلَک سیما نه جان‌سین، وجهِ رحمان سنده‌دیر

مصحفِ حق‌دیر جمالین، شرح و برهان سنده‌دیر

نَافِذُ الجاويد از آنست امرِ تو در عالمی

جمله‌یِ عالم سنین رایینجه، فرمان سنده‌دیر

كُنْتُ كَنْزین پرده‌سی رفع اولدو حقده‌ن وجهینه

چون بو رازین محرمی‌سین، گنجِ پنهان سنده‌دیر

دردِ بی درمانیما وصلینده‌ن آیری چاره یوخ

ای طبیبِ دردمندان، گل که درمان سنده‌دیر

کوثرین خاصیّتی لعلینده‌دیر، مَن خضروار

زنده‌یِ جاوید از آنم ک‌آبِ حیوان سنده‌دیر

دُنیی و عُقبی سنین کامینجا، سن دَر کامِ دِل

ای سلیمانِ دو عالَم، گل که دوران سنده‌دیر

گل کَرَم بیرله نظر قیل‌گیل «حقیقی» حالینا

صاحبِ خُلق و کَرَم‌سین، لطف و احسان سنده‌دیر



29

تا که حُسنون صورت و معنی‌دا دعوی گؤرسه‌دیر

عارضین نورو جمالیندان تجلّی گؤرسه‌دیر

سجده‌یِ ایمان گتیرمه‌ز قاشلارین محرابینا

هر بصیرتسیز کیم اونو طاقِ کسری گؤرسه‌دیر

سوره‌یِ السَّبْعِ الْمَثَانِي خطِّ رخساریندادیر

شول جهتده‌ن صورتین هر شئی‌ده معنی گؤرسه‌دیر

ای مسیحا دم، سنین انفاسِ لعلین عاشقه

نفخه‌یِ رُوحُ الْقُدُسدان نُطقِ عیسی گؤرسه‌دیر

کیم که حیران اولماز اول معشوقه‌نین رخسارینا

اهلِ دل اول مُشْرِکی معنی‌دا اَعمی گؤرسه‌دیر

زاهدا، گل سجده قیل شول صورتِ رحمانا سن

سجده‌یِ حقّی سانا چون اهلِ تقوی گؤرسه‌دیر

چون «حقیقی» هر که منصور اولدو در میدانِ عشق

بر سرِ دارِ محبّت شرطِ دعوی گؤرسه‌دیر



30 (*)

لعلینده جامِ خَمْرِ مصفّا دئییل می‌دیر؟

خالین سیاهی حَبَّةِ السَّوْدَاء دئییل می‌دیر؟

مِهْرِ رخون که دورِ قمرده‌ن خبر وئریر

عرشِ سمادا نورِ معلّا دئییل می‌دیر؟

چون شاهدِ حقیقی سن اولدون بو عرصه‌ده

رُوحُ الْقُدْس بو حکمته گویا دئییل می‌دیر؟

حاجت دئییل مَشّاطه کمالِ جمالینا

شوْل صورتِ خجسته مهیّا دئییل می‌دیر؟

خضرِ دِلم که کوثرِ جامِ لبینده‌دیر

از چشمه‌یِ حیاتِ تو اَحیاء دئییل می‌دیر؟

هر بی‌خبر که بیلمه‌دی قدرِ وصالینی

حیواندان اول أُولئِكَ أُدْنِی دئییل می‌دیر؟

پیوسته تؤکدو قانیمی مستانه گؤزله‌رین

شول کافر از ایمان مبرّا دئییل می‌دیر؟

مِرْآةُ لَا مَكَانَ که رخون آفتابی‌دیر

عارف قاتیندا منظرِ اعلی دئییل می‌دیر؟

جان وئردی چون «حقیقی» بهایِ وصلینه

وصلینده‌ن اول فقیره تمنّا دئییل می‌دیر؟



31

کوثرین عینی لبین جامِ شرابیندان می‌دیر؟

سوره‌یِ رحمان رخون حرفِ کتابیندان می‌دیر؟

طرّه‌یِ عنبرفشانِ زلفون نسیمی عالمی

سر به سر قیلدی معطّر، مشکِ نابیندان می‌دیر؟

جنّتین باغیندا سدره شول قد و بالا می‌دیر؟

آفتابِ لَمْ يَزُلْ اول حُسنِ تابیندان می‌دیر؟

حَبَّةِ السَّوْدَاء می‌دیر، یا دانه‌یِ خالِ رخون

فتنه‌‌لی عینین می‌دیر، یا فتنه‌‌یِ خوابیندان می‌دیر؟

آبِ حیوان چشمه‌یِ لعلینده‌ن ایسته‌ر خضرِ جان

مستِ عشقین باده‌سی اول عینین آبیندان می‌دیر؟

لاله‌نین قلبینده داغ ز-آهِ دلِ شیدا می‌دیر؟

کوثرین جامیندا می وصلین شرابیندان می‌دیر؟

گؤنلومون دیجورو اول عنبرفشان زلفون مو‌دور؟

عینیمین نورو جمالین آفتابیندان می‌دیر؟

تؤکدو باغریم قانین اول ناز و عتابِ غمزه‌‌له‌ر

[عشوه بیرله باغریمی یاندیردی وصلین فُرقتی]

حشر و نشر اول غمزه‌‌نین ناز و عتابیندان می‌دیر؟

واجب اولموشدور «حقیقی»، سجده قیلماق وجهینه

وَ اعْبُدُوا اللَّهَ وَجْهٍ وجهین خطابیندان می‌دیر؟



32 (*)

ای رخون گُل‌زارِ جنّت، ساچلارین ریحانی‌دیر

وی دوداغین آبِ حیوان، جان اونون حیرانی‌دیر

صورتین لوحوندا حق چکمیش کمالِ قدرتین

احسنِ صورت کمالی، قدرتِ رحمانی‌دیر

گل که یاندیردی منی حسرتده عشقین آتشی

شربتِ وصلین بو دردِ خسته‌نین درمانی‌دیر

مومنین قلبینده‌دیر اهلِ یقینین روضه‌سی

عارفِ اسرارِ حق، شول روضه‌نین رضوانی‌دیر

ای که حُسنوندور کمالِ قدرت رحمانیمیز

قدرتِ رحمانا حیران اولمایان شیطانی‌دیر

دلبرین یولوندا گر اهل ایسه‌ن اول‌گیل جان‌فدا

ترکِ جان ائتمه‌ک بو یولدا عمرِ جاویدانی‌دیر

ای «حقیقی» حق سانا «فضل»ینده‌ن اولدو مستعان

شُکرِِ ایّامِِ وصال و رحمتِ ربّانی‌دیر



33

زلف و رخون که شام و سحرده‌ن خبر وئریر

اونون مشامی روحِ بشرده‌ن خبر وئریر

شیرین لبین حدیثی که جان‌بخشِ عالَم است

شُکْر ائیله‌ره‌م که شهد و شَکَرده‌ن خبر وئریر

موسی چو بیلدی رمزِ أَنَا اللَّهی عارفه

آنَسْتُ نَاری طور و شجرده‌ن خبر وئریر

هر کیم که گؤردو شوقِ رخون آفتابینی

اهلِ بصیره نورِ بَصَرده‌ن خبر وئریر

پیوسته تؤکدو قانیمی مستانه چشم ایله

اول غمزه‌‌له‌ر که خونِ جگرده‌ن خبر وئریر

میدان ایچینده اولمادی اسفندیارِ عشق

هر بی‌هنر که عیب و هنرده‌ن خبر وئریر

کشف ائیله‌دی «حقیقی» حدیثین بیانینی

اول دُر فِشانی گؤر که گوهرده‌ن خبر وئریر

هر کیم که گؤردو وجهینی ای خسرویِ زمان

اهلِ جهانا دورِ قمرده‌ن خبر وئریر



34

بو جورو کیم مانا اول قلبی سنگِ خارا قیلیر

تیغِ جفا ایله باغریم‌نی پاره پاره قیلیر

فلکده بیر گئجه اول ماهتابی گؤرمه‌ک ایچین

شرر بو آهیم اودوندان چیخار، ستاره قیلیر

خونابِ چشمیمی یارین غمی روان ائده‌لی

فقیه‌ِ مدرسه از اشکِ ما کناره قیلیر

کمانه قاشلاری، آشفته‌ زلف و غمزه‌له‌ری

نئجه بو محنت و جور و جفایی یارا قیلیر

جمالِ آیینا اول دلبرین نظر قیلماق

درونِ آئینه‌‌یِ قلبی بی‌غباره قیلیر

عجب دئییل می کیم اول صورتِ جمیل الله

سحابِ سنبلونو آفتابا تاره قیلیر

«حقیقی» جور و جفادان کیمه شکایت ائده

جفا و جورونو چون یاری بی‌شماره قیلیر



35

حجابِ وحدتی رفع ائتمه‌دی یگانه هنوز

محبِّ عشقه وفا قیلمادی زمانه هنوز

یولوندا من نئجه کیم جانیمی نثار ائده‌ره‌م

گمان ایچینده قالیپ‌دیر، دوشه‌ر گمانا هنوز

اگرچه غمزه‌‌سی پیکان ایله‌ن دله‌ر جگری

اونون خده‌نگینه جان قیلمیشام نشانه هنوز

بو قلبی هر نئجه پاک ائیله‌ره‌م منِ درویش

سیمرغِ عشق گلیپ قونماز آشیانا هنوز

وصالِ جنّته وصل اولدو عاشقِ صادق

قالیر تعجّبه زاهد، قیلیر فسانه هنوز

«حقیقی» رقصِ محبّت قیلیر به چنبرِ عشق

سرودِ نغمه‌یِ وحدته‌دیر ترانه هنوز



36

خضرِ جان جز جامِ لعلت آبِ حیوان ایسته‌مه‌ز

جنّتِ وصلینده‌ن آیری اهلِ دل، جان ایسته‌مه‌ز

کفر و ایماندیر رخ و زلفون، چو بیلمه‌ز متّقی

سنبلون سر حلقه‌سینده کفر و ایمان ایسته‌مه‌ز

ای وصالین درده درمان، ای یوزون دَارُ الْخُلُود

دردی درمانسیز گؤنول، وصلینده درمان ایسته‌مه‌ز

گرچه تؤکدو قانیمی عشقینده عینین غمزه‌‌سی

غارت و قصدِ دل و جان ائیله‌ر اول، قان ایسته‌مه‌ز

فاعلین ماهیّتین بیلمه‌ز فقیه‌ِ بی‌خبر

ذاتِ بی‌مثلین صفاتین قلبِ ویران ایسته‌مه‌ز

مَقْدمِ وصلینده جان شُکرانه واجب‌دیر بوگون

چون گؤنول تختینده سنده‌ن اؤزگه سلطان ایسته‌مه‌ز

ای بویون سدره، لبین عَيْناً تُسَمِّي سَلْسَبِيل

سالکِ رهرو بو شرحه نقلِ قرآن ایسته‌مه‌ز

جنّت‌آبادِ سرِ کویوندان آیریق تا ابد

روضه‌نین باغیندا زاهد حورِ رضوان ایسته‌مه‌ز

چون «حقیقی» جامِ لعلینده‌ن ایچه‌ر یک جرعه می

خضرِ عشقین چشمه‌سینده‌ن آبِ حیوان ایسته‌مه‌ز



37

یولوندا جانینی ترک ائتمه‌یه‌ن وفا بیلمه‌ز

فراق الینده بلا چکمه‌یه‌ن جفا بیلمه‌ز

ساچین سوادینی وَ اللَّيْله قیلمایان تشبیه

یوزونده آیتِ وَ الشَّمْسِ وَالضُّحَی بیلمه‌ز

جهانی توتدو نیاز ایله زاهدِ تقوی

اونون حقیقتینی سالکِ ریا بیلمه‌ز

طوافِ کعبه کویوندان ایسته‌یه‌ن عابد

به جز وصالِ رُخت، مروه و صفا بیلمه‌ز

رقیبی سور مانا، قیلما اونون حکایتینی

بیگانه حالینی هر اهلِ آشنا بیلمه‌ز

الهی اولماسین اول دل که از سرِ اخلاص

بو جانی دانه و دامیندا مبتلا بیلمه‌ز

حجابِ ظلمت ایله‌ن باغلادی بصیرتینی

غبارِ پایینی هر کیم که توتیا بیلمه‌ز

نوایا یئتدی «حقیقی» مرادِ وصلینده‌ن

اونون مرادینی هر اهلِ بی‌نوا بیلمه‌ز



38

ای آفتابِ عشق، رخون آفتاب ایمیش

وجهین حروفو آیتِ أُمُّ الْكِتاب ایمیش

یا رب نه حُسن ایمیش بو ملاحتده کیم اونون

تعریفِ وجه‌ِ شانینه حقده‌ن خطاب ایمیش

کفر و ایمان ایمیش رخ و زلفون حقیقتی

کالنُّورُ  فِي السَّوَاد، عجب ماهتاب ایمیش

یاخدی فراق اودویلا منی حسرت و غمین

گل‌گیل که حسرتین غمی يَوْمَ الْعَذَاب ایمیش

اسرارِ كُنْتُ كَنْزی بیان ائیله‌دی لبین

نظّاره‌یِ جهانا رخون آفتاب ایمیش

یارین غمینده قیلما شکایت «حقیقی»‌یا

یارین غم و فراقی چو ناز و عتاب ایمیش



39

طلوعِ مِهرِ رخون آفتابِ طلعت ایمیش

جمالین آیتِ أُمُّ الْكِتابِ وحدت ایمیش

حیاتِ چشمه‌یِ حیوان ایمیش لبین خضره

مشامِ زلف و خطّین مشکِ نابِ وحدت ایمیش

آیاغینا باشینی کیم که سالدی از سرِ صدق

فراغت از غمِ يَوْمَ الْحِسَابِ وحدت ایمیش

گؤتوردو پرده رخوندان جمالِ لَمْ يَزُلْی

هنوز اهلِ ظُلاما حجابِ وحدت ایمیش

کناره قیلمادی عشقین محیطینه دوشه‌‌لی

گؤنول که بحرِ غمینده حبابِ وحدت ایمیش

ساچین که سایه‌سی ظِلُّ اِله ایمیش ابدی

اونون شبینده یوزون ماهتابِ وحدت ایمیش

«حقیقی» کعبه‌یِ حق بیلدی وجهین اول یارین

چو امرِ اسْجُدُوا حقده‌ن خطابِ وحدت ایمیش



40

آغزینی غنچه‌یِ خندان دئدیله‌ر، گئرچه‌ک ایمیش

خطِّ رخسارینی ریحان دئدیله‌ر، گئرچه‌ک ایمیش

لوحِ محفوظونو تا گؤردو کلام اهلی سنین

آیتِ وجهینه قرآن دئدیله‌ر، گئرچه‌ک ایمیش

ذوقِ عشقین که غمِ دُنیی و عُقبی‌یا ده‌یه‌ر

بو گؤنول تختینه سلطان دئدیله‌ر، گئرچه‌ک ایمیش

ترکِ جان قیلماغی عشقین غمِ وصلینده سنین

منِ آشفته‌یه بهتان دئدیله‌ر، گئرچه‌ک ایمیش

لعلینی چشمه‌یِ حیوانا تشبّه قیلیبان

دُرجِ یاقوتونا مرجان دئدیله‌ر، گئرچه‌ک ایمیش

اهلِ تقوا که سجود ائیله‌دی وجهینده سنین

ساجدِ صورتِ رحمان دئدیله‌ر، گئرچه‌ک ایمیش

عنبر افشان ساچینی کفره مناسب قیلیبان

شمعِ رخسارینی ایمان دئدیله‌ر، گئرچه‌ک ایمیش

ای «حقیقی» چو سانا نقل کلام ِاولدو معین

نَفْسی‌نین شرحینی برهان دئدیله‌ر، گئرچه‌ک ایمیش



41

گل‌گیل که باغِ وصلِ تو خُلدِ برین ایمیش

خَمرِ لبت زِ کوثرِ جان آفرین ایمیش

دامِ بلایِ عشقه گرفتار ائده‌ن منی

شول زلف ایمیش که تاره‌سی حَبَلُ الْمَتِين ایمیش

کون و مکانی وصلینه شُکرانه وئرمیشه‌م

بو رسم ایچینده رسمِ محبّت همین ایمیش

روزِ ازلده چشمه‌یِ حیوان ایمیش لبین

زلفون نسیم و مشکِ رخون یاسَمین ایمیش

دَارُ الْخُلُود ایمیش سرِ کویون حقیقتی

هر گوشه وحدت اهلینه بیر مُلکِ دین ایمیش

چون هادیِ زمانه سن اولدون بو عرصه‌ده

شُکر ائیله‌ره‌م که واسطه رُوحُ الْأَمِين ایمیش

چکدی «حقیقی»‌یی سرِ زلفون کمندینه

شول قاشلارین کمانه‌سی ک‌اندر کمین ایمیش



42

ازلده شوقا گتیردی منی بدایتِ عشق

سعادتی مانا کشف ائیله‌دی سرایتِ عشق

آیاغینا باشیمی سالدی اول پری‌زادین

یئتیردی دامنِ وصله منی هدایتِ عشق

هر آنکه بیلمه‌دی یارین غمینی عینِ صفا

میسّر اولمادی اول جاهله کفایتِ عشق

محبّه نکته‌یِ توحیدی کشف ائده‌ر فاعل

گؤتوردو پرده‌یِ اسراری چون روایتِ عشق

بیانِ شرحینه مستغرق اولدو جان و گؤنول

محیطه سالدی منی کُنجِ بی‌‌نهایتِ عشق

منوّر ائیله‌دی ویرانه گؤنلومو عشقین

همین بودور نظر ای شاه‌ِ من، رعایتِ عشق

جفا و جورو وفادیر «حقیقی»‌یه یارین

بیر اولدو مشربِ توحید ایله‌ن حکایتِ عشق



43 (*)

تَبَارَكَ اللَّه حُسن و جمال بؤیله گره‌ک

بو حُسن و صورته هم خطّ و خال بؤیله گره‌ک

اگرچه وجهینه تشبیه قیلمیشام آیی

ولی ملاحت ایله‌ن بَرْ کمال بؤیله گره‌ک

بهایِ وصلینه جان وئرمیشه‌م از روزِ ازل

سعادتِ ابده مُلک و مال بؤیله گره‌ک

لبین مزاجینی سورماقدا ایسته‌ره‌م خضری

دییه‌م که چشمه‌ی آبِ زلال بؤیله گره‌ک

امیدِ وصلینه شاد اولموشام فراقیندا

حقیقت اهلینه دفعِ ملال بؤیله گره‌ک

آیاغینا باشیمی سالمیشام منِ درویش

جناب حضرتینه اتّصال بؤیله گره‌ک

وصالینی دیله‌ره‌م کام ایله‌ن از «فضلِ اِله»

منِ شکسته‌یه کامِ وصال بؤیله گره‌ک

بصیرت اهلی گؤره‌نده قیامِ قامتینی

دئدی که سروِِ سهی ‌در مثال بؤیله گره‌ک

«حقیقی» شرحِ دهانین قیلاندا روزِ ازل

اونون بیانینا شیرین مقال بؤیله گره‌ک



44

جامِ لبینده چشمه‌یِ حیوان دیله‌ر گؤنول

وصلین باغیندا روضه‌یِ رضوان دیله‌ر گؤنول

دامِ بلایِ زلفه نیچوک اولمایا اسیر

چون عارضینده چاه‌ِ زنخدان دیله‌ر گؤنول

درمانی درد ایچینده طلب ائیله‌ر اهلِ دل

بو دردِ بی‌نهایته درمان دیله‌ر گؤنول

جان ذرّه‌وار رقصه گیره‌ر در سماعِ کُلّ

رخسارین اوزره مِهْرِ درخشان دیله‌ر گؤنول

چون هادیِ زمانه سن اولدون بو عرصه‌ده

خاکِ درینده مُلکِ سلیمان دیله‌ر گؤنول

گل‌گیل که عینیمه شبِ معراج ایمیش ساچین

اول اُستوادا صورتِ رحمان دیله‌ر گؤنول

جانین «حقیقی» قیلدی فدا چون جنابینا

کون و مکانی وصلینه قربان دیله‌ر گؤنول

ای اوّلین و آخرین، وی رهنمایِ عشق

از لطفِ بی‌کرانِ تو احسان دیله‌ر گؤنول



45

چو سنبلونده‌ن اونون پیچ و تابا دوشدو گؤنول

توتوشدو آتشِ عشقینده، تابا دوشدو گؤنول

گؤره‌نده آیتِ رخسارین اول پری‌زادین

حروفِ وجه ایله‌ن أُمُّ الْكِتابا دوشدو گؤنول

نه وصل ایمیش که اونون حسرت و فراقیندا

گهی تعشّقا، گه اضطرابا دوشدو گؤنول

گؤزومده‌ن آبیمی، باغریم قانی روان ائده‌لی

به دستِ دامنِ دلبر، خضابا دوشدو گؤنول

چو اسدی دان یئلی عنبرفِشان ساچیندان اونون

نسیمِ مُشک ایله بس مُشکِ نابا دوشدو گؤنول

عتاب و ناز ایله باخدی «حقیقی»‌یه یاری

اول اهلِ ناز ایله ناز و عتابا دوشدو گؤنول

بیر اولدو مشربِ توحید، عشقِ لَمْ يَزُلْی

چو واحدِ ابد ایله خطابا دوشدو گؤنول



46

شها غمینده چو دوشدو بیانِ عشقه گؤنول

ائریشدی مرتبه‌یِ لامکانِ عشقه گؤنول

جفاسینا منی محو ائیله‌دی، وفا قیلماز

نه تدبیر ائیله‌یه بو دل‌ سِتانِ عشقه گؤنول

بیر اولدو مشربِ توحید، عشقِ لَمْ يَزُلْی

کناره قیلمادی، دوشدو میان ِعشقه گؤنول

چو کاف و نون ایله کشف اولدو عالمِ ارواح

محیطه دوشدو، باخیر كُنْ فَكَانِ عشقه گؤنول

گؤتوردو پرده رخوندان زمانه اول یارین

قول اولدو تا به ابد بو زمانِ عشقه گؤنول

حیاتِ لَمْ يَزُلْو بولدو جان وصالیندا‌

یئتیردی منزلینی جاودانِ عشقه گؤنول

«حقیقی» هیأت‌ی شرح ائیله‌دی جمالیندا

گؤتوردو منطق‌ی، گلدی بیانِ عشقه گؤنول



47

سرو اولدو شاهِ سدره‌یِ رضوانینا طفیل

ماءِ معین چشمه‌یِ حیوانینا طفیل

تا قیلدی مُشکِ نافه ساچین بویونا نثار

مهتاب اولدو شمعِ شبستانینا طفیل

عالمده شاه‌ِ حُسن سنی قیلدی چون اِله

خوبان اولدو صورتِ رحمانینا طفیل

ریحان و یاسمین و گُلستان و ارغوان

گُل‌زار ایچینده غنچه‌یِ خندانینا طفیل

آبِ حیاتا جامِ لبینده‌ن ائریشدی خضر

ظُلَمات اولدو زلفِ پریشانینا طفیل

هر سالکین که مسکنی کویوندور ای قمر

قیلدی جهانی مِهْرِ درخشانینا طفیل

چون خسرویِ «حقیقی» سن اولدون زمانه‌یه

آفاق اولدو حکمِ سلیمانینا طفیل



48

غَرّه‌یِ عشق اولان گؤنول، ملتفتِ جهان دئییل

عشقه مقیّد اولمایان، طالبِ لامکان دئییل

خلقتِ خَلقِ عالمین، امری چو کاف و نون ایمیش

کیم که بو رمزی آنلاماز، قابلِ كُنْ فَكَان دئییل

حکمتی‌نین نشانه‌سی، اولدو جهان بو عرصه‌ده

فاعلِ عشقین ای گؤنول، حکمتی بی‌نشان دئییل

سرِّ أَلَسْتُ بِرَبِّكُمْ قَالُوا بَلَی‌ده قول ایمیش

کیم که بو قولو بیلمه‌دی، خلقتی جاویدان دئییل

زَرق و ریاسی زاهدین، قابل ِحضرت اولمادی

ظنّ و گمان ایچینده‌دیر، شوبهه‌سی بی‌گمان دئییل

گرچه سیمرغِ لامکان، سنده‌دیر ای بشر بوگون

نَفْسینه عارف اولماسا، قابلِ آشیان دئییل

عشقی یولوندا دلبرین، باشینی قوی «حقیقی»‌یا

کیم که بو یولدا باشینی، قویمادی جان‌فشان دئییل

دیوان تورکی سلطان نویان ابوالمظفّر جهانشاه باهادیر قاراقویونلو باهارلی تورکمان-حقیقی
تصحيح: مئهران باهارلی. ناسخ، مصحح و ناشر‌له‌رين يانليشلاری تصحيح ائديلميشدير.
https://sozumuz1.blogspot.com/2017/12/blog-post.html
دوزه‌لتمه‌له‌ر و اؤنه‌ريله‌ريمده‌ن اؤرنه‌کله‌ر: ديوان تورکی جهانشاه حقيقی
https://sozumuz1.blogspot.com/2017/12/blog-post_4.html
غزل‌له‌ر، ١-٢٥
https://sozumuz1.blogspot.com/2017/12/blog-post_62.html
غزل‌له‌ر، ٢٦-٤٨
https://sozumuz1.blogspot.com/2017/12/blog-post_18.html
غزل‌له‌ر، ٤٩-٦٨
https://sozumuz1.blogspot.com/2017/12/blog-post_37.html
غزل‌له‌ر، ٦٩-٩٦
https://sozumuz1.blogspot.com/2017/12/blog-post_6.html
تويوغلار، سؤزلوک- ديوان تورکی جهانشاه حقيقی
https://sozumuz1.blogspot.com/2017/12/blog-post_97.html
تئهران اليازماسي‌نين رسيمله‌ری- ديوان تورکی جهانشاه حقيقی
https://sozumuz1.blogspot.com/2017/12/blog-post_17.html

No comments:

Post a Comment

Note: Only a member of this blog may post a comment.