Monday, December 4, 2017

غزل‌له‌ر، ٤٩-٦٨



غزل‌له‌ر




49

منِ دل‌شکسته‌ده‌ن بوگون اول یارادیر سلام

تا روزِ حشر اول بتِ عیّارادیر سلام

عشقه وفا و جورا تحمّل، فراقا صبر

اول اهلِ عشقه، یارِ وفادارادیر سلام

دَارُ الْخُلُود ایمیش مانا اول حضرتِ جناب

دَارُ الْخُلُودا، حضرتِ دلدارادیر سلام

اولدو بهار، آچیلدی گلستان و مَرغزار

گُل‌زار ایچینده اول رخ‌ِ گلنارادیر سلام

من رندِ لااوبالی و اول مستِ باده‌کش

میخانه‌له‌رده خَمر ایله خَمّارادیر سلام

یاریندان آیری یاندی «حقیقی» فراق ایله

کویِ وصالِ اول بتِ عیّارادیر سلام



50

عشقین یولوندا من، مانا تقصیر بیلمه‌زه‌م

عشقینده‌ن اؤزگه جانیما تاثیر بیلمه‌زه‌م

تقدیرِ لَمْ يَزُلْ منی قول ائیله‌دی سانا

تقدیر ایچینده شمّه‌یِ تغییر بیلمه‌زه‌م

ای نکته‌یِ حقیقتِ عشقه مرید اولان

گل‌گیل که سنده‌ن اؤزگه داخی پیر بیلمه‌زه‌م

تزویر و زَرق، زاهدِ کجرودان اولدو فاش

من رند و عاشقم، غمِ تزویر بیلمه‌زه‌م

تا گؤرموشه‌م جمالِ رخ‌ِ بی‌مثالینی

تکبیر قیلمیشام، دئمه تکبیر بیلمه‌زه‌م

یاخدی «حقیقی»‌یی غمِ عشقین فراق ایله

وصلینده‌ن آیری چاره و تدبیر بیلمه‌زه‌م



51

ازلده چون سنی بیر یارِ مه لقا دئمیشه‌م

هزار جان و دلی عشقینه فدا دئمیشه‌م

گؤزونله مردمونو فتنه‌‌یِ زمانه بیلیپ

ساچین سلاسلینه حلقه‌یِ بلا دئمیشه‌م

بو جانا مِهْرِ رخون دلپذیر اولاندا سنین

اونون شعاعینا وَ الشَّمْسِ وَالضُّحَی دئمیشه‌م

پناه قیلمیشام اول آستانِ دولته من

خداست شاهدِ حالم که بی‌ریا دئمیشه‌م

هدایت ایندی سنین شانینه از «فضلِ اِله»

بو معنیده‌ن سانا من ختمِ انبیاء دئمیشه‌م

وصالِ عشقِ رخون گنج ایمیش نهایت‌سیز

ویرانه گؤنلومو اول گنجه آشنا دئمیشه‌م

حیاتِ لَمْ يَزُلْو بولموشام وصالیندا

لبینده چشمه‌یِ حیوانا جان‌فزا دئمیشه‌م

سنی یگانه‌یِ مقصودِ کائنات بیلیپ

وجودِ ذاتینا هم سایه‌یِ خدا دئمیشه‌م

«حقیقی» وار غمینده بیمارِ هجر اولانا

حدیثِ لعلِ شَکَربارینی شفا دئمیشه‌م



52 (*)

دلبرا عشقین یولوندا ناله‌یِ زار ائتمیشه‌م

جنّتِ وصلینده‌ن آیری، ترکِ گُل‌زار ائتمیشه‌م

بوندان آیریق من داخی جورا تحمّل قیلمازام

گرچه من صد جور ایله‌ن اول یارا اقرار ائتمیشه‌م

کفر و ایمان شرحینی تا بیلمیشه‌م عِلْمَ الْيَقِين

اولموشام ایمانا یولداش، کفرو انکار ائتمیشه‌م

اولماسین روزی وصالِ جنّتِ وصلین مانا

دُنیی و عُقبی‌دا سنده‌ن اؤزگه گر یار ائتمیشه‌م

دانه‌یِ خالین خیالیندا‌ن منِ آشفته‌ دل

مرغِ جانی دامِ زلفونده گرفتار ائتمیشه‌م

دعویِ ذکرِ أَنَا الْحَقّ قیلمیشام منصوروار

بر سرِ دارِ محبّت گؤر نه گفتار ائتمیشه‌م

صاحبِ کشّاف‌ا منطق‌ده‌ن معانی سورموشام

علمِ هیأت‌ده‌ن بیان و شرحی تکرار ائتمیشه‌م

گؤرموشه‌م رخسارینی روشن، ضمیر ِچشم ایله

ناظر ِحُسن اولموشام، بس کسبِ دیدار ائتمیشه‌م

قیلمیشام جان و جهان شُکرانه یارین وصلینه

زی تجارت کیم مَلَک مُلکونده بازار ائتمیشه‌م

نافِذُ الجاویدِ وحدت اولدو روحِ قدسیان

من بو ذاتِ خلقتین نَفْسینده زنهار ائتمیشه‌م

چون «حقیقی» بیلمیشه‌م سرِّ كَلَامَ اللَّهی من

حَمْدُ لِلَّه کیم بو علمی کشفِ اسرار ائتمیشه‌م



53

دُنیی و عُقبی‌دا من یار اول نگاری بیلمیشه‌م

گؤنلومون مقصودو هم اول گل‌عذاری بیلمیشه‌م

ایچمیشه‌م جامِ لبینده‌ن لا يَزالین خَمْرینی

مستِ جاویدم، شراب بی‌خُماری بیلمیشه‌م

جَنَّةُ الْمَأْوی نگارین مرغزارِ وصلی‌دیر

مُرغِ زارام، کیم وصالِ مَرغزاری بیلمیشه‌م

لوحِ محفوظوندادیر حشرین حسابیندان شمار

حاسبِ عشق اولموشام، من اول شماری بیلمیشه‌م

تا مرید اولدوم سرِ کویوندا من اول دلبرین

پیرِ عشقم که طریقِ روزگاری بیلمیشه‌م

خاکِ درگاهیندادیر کُحْلِ بصیرت عینیمه

اولموشام بینایِ حق، نور اول غباری بیلمیشه‌م

چون «حقیقی» سالمیشام باش اول نگارین پایینا

حَمْدُ لِلَّه که جنابِ شهریاری بیلمیشه‌م



54

تا نورِ دیده اول رخِ گلناری بیلمیشه‌م

مِصْبَاحُ لَمْ يَزُلْ من او دیداری بیلمیشه‌م

کون و مکانی وئرمیشه‌م اونون وصالینا

بازارِ عشق ایچینده بو بازاری بیلمیشه‌م

تفسیر قیلمیشام خطّ و خالین کتابینی

اول عارفه‌م که نکته‌یِ اسراری بیلمیشه‌م

غرق اولموشام غمینده فراقین جفاسینا

چون وَصَلَ لَمْ يَزُلْ من او گُل‌زاری بیلمیشه‌م

ای گوهرین حقیقتی نُطقوندان آشکار

شُکْر ائیله‌ره‌م که نُطقِ گوهرباری بیلمیشه‌م

جان و جهانی وصلینه شُکرانه قیلماغا

ناصح مانا سن اولما، من اول کاری بیلمیشه‌م

تا زلفِ پیچ و تاب ایله سودایا دوشموشه‌م

دامِ بلادا طُرّهیِ طَرّاری بیلمیشه‌م

ای صورتین تجلّی‌سی، انواری گؤنلومون

خورشیدِ لَمْ يَزُلْ من او رخساری بیلمیشه‌م

یار اولدو چون «حقیقی»‌یه یارین غمی بوگون

یارین غمینده درد ایله هم یاری بیلمیشه‌م



55

چمنده سروِ قدین تک چینار گؤرمه‌میشه‌م

رخون کیمی سمنِ گل‌عذار گؤرمه‌میشه‌م

ازل گونونده سنین عشقین ایله تا به ابد

منیم کیمی داخی بیر بی‌قرار گؤرمه‌میشه‌م

فراق و درد و غمینده‌ن نه فکریم اولا منیم

چو سن تکی صنمِ غمگسار گؤرمه‌میشه‌م

کناره قیلمامیشام عشق ایله از روزِ ازل

میانِ عشقه دوشه‌لده‌ن، کنار گؤرمه‌میشه‌م

جمالِ حُسنونا آئینه‌دیر ضمیرِ مُنیر

جمالین آئینه‌سینده غبار گؤرمه‌میشه‌م

ساچین سلاسلی دامِ بلایا سالدی منی

بو دامِ هجر و بلادان گذار گؤرمه‌میشه‌م

ساچین کیمی ختنِ مُشک‌بارا باخمامیشام

رخون کیمی چمنِ مَرغزار گؤرمه‌میشه‌م

آپاردی صبر و قراریم‌نی اول قارا گؤزله‌ر

اؤزومده من داخی صبر و قرار گؤرمه‌میشه‌م

«حقیقی»‌یه‌م که بو دور و مدار ایچینده بوگون

بو حُسن ایله صنمِ روزگار گؤرمه‌میشه‌م



56

گؤره‌لی قامتینی، سدره‌یِ رضوان دئمه‌نه‌م

یاخدی فُرقتده منی حسرتین ای جان دئمه‌نه‌م

ایچه‌لی یاقوتِ جان‌پروری‌نین جرعه‌سینی

ظلمتین چشمه‌یِ حیوانینا حیوان دئمه‌نه‌م

هر گؤنول کیم اونو عشق ائتدی فراقیندا ویران

من او دیوانه‌دِل‌ین گؤنلونو ویران دئمه‌نه‌م

ظلمتِ زلفونه همسایه‌یِ مهتاب دئره‌م

طلعتِ حُسنونه جز مِهرِ درخشان دئمه‌نه‌م

نئجه کیم یاخدی منی آتشِ هجرانا غمین

شوقِ وصلینده‌ن اونون آدینی هجران دئمه‌نه‌م

بشر اولدور کیم اونا فهم اولا ادراک و بَصَر

بونو بیلمه‌ز بشرین آدینی انسان دئمه‌نه‌م

روحِ ایمانا چکه‌ر عقلیمی، حیوانیِ نَفْس

کیم که بو رمزی بیلیر، من اونا حیوان دئمه‌نه‌م

دلبرین خطّینه چون سدره‌یِ رحمان دئدی حق

دییه‌بیلمه‌ن که اونو آیتِ قرآن دئمه‌نه‌م

اسریدی جانیم اونون آبِ حیاتیندا بوگون

چکدی ظُلْماتا منی زلفِ پریشان دئمه‌نه‌م

یار ایله‌ن روزِ الست ائیله‌میشه‌م عهده وفا

عهد و پیمانیمی من یار ایله یالان دئمه‌نه‌م

آغولو فُرقتینی جانیما نوش ائیله‌میشه‌م

بجز از وصلِ رُخش دردیمه درمان دئمه‌نه‌م

یاخدی حسرت اودو ایله‌ن، باغریمی هجرانا غمی

حق بیلیر من بو سؤزو دلبره پنهان دئمه‌نه‌م

سرِ تاج ائیله‌میشه‌م خاکِ قدمین من اونون

بو گؤنول تختینه چون آیریغی سلطان دئمه‌نه‌م

در و دیوارینا میخانه و بتخانه‌له‌رین

بجز از مدرسه و مسجدِ رندان دئمه‌نه‌م



57

گل‌گیل که سنده‌ن آیری داخی یار بیلمه‌نه‌م

بی گلشنِ وصالِ تو گُل‌زار بیلمه‌نه‌م

وئرمه‌ن بو چرخِ کجرویِ غدّارا گؤنلومو

[من] اول تجرّده‌م که عالَمِ غدّار بیلمه‌نه‌م

عشقین قدیم، و مِهْرِ رخون لا يَزال ایمیش

من بوندان اؤزگه نکته‌یِ اسرار بیلمه‌نه‌م

خَمْرِ لبینده‌ن اسریمیشه‌م، یازِ‌ خُمارِ می

خَمْرِ لبین کیمی داخی خَمّار بیلمه‌نه‌م

منصوروار گرچه منی دارا چکسه‌له‌ر

دَارُ الشِّفَا دئره‌م، من اونو دار بیلمه‌نه‌م

گر قویموشام لباسیمی میخانه‌ده گیرو

سر مستِ باده‌یه‌م، سر و دستار بیلمه‌نه‌م

شمعِ رخوندا جانیمی پروانه قیلمیشام

اول نارا دوشموشه‌م، داخی من نار بیلمه‌نه‌م

پیوسته قاشلارین کیمی محرابا باخمانام

مستانه گؤزله‌رین کیمی عیّار بیلمه‌نه‌م

شرحِ لبین چو نُطقا گتیردی «حقیقی»‌یی

من بوندان اؤزگه نُطقِ دُرَربار بیلمه‌نه‌م



58

زهی جان که بو جگر قانینا بویانا دئدیم

آفرین اول تنه کیم عشق اودونا یانا دئدیم

کیم که جان قیلمادی اول دلبرِ عیّارا نثار

یاخدی حسرت غمی‌له‌ باغرینی بِریانا دئدیم

نفسِ شهوت پرستین فعلینه آلدانما گؤنول

که زیان ائیله‌ر اونون علّتی انسانا دئدیم

زهد و تقوا خبرین عابدِ ربّانی‌یه سور

اوخو اول آیتی کیم حق دئدی من ک‌اونا دئدیم

فلکین حشمت و اندیشه‌سی‌نین ترکینی قیل

اؤزونو سالما بو غدّار ایله عِصیانا دئدیم

خلوت و یار دئدیم، باده‌یِ گُل‌رنگِ لطیف

هر نه که یارا دئدیم، من اونو رندانه دئدیم

قطره‌یِ یاقوتِ جان‌پروری‌نین جرعه‌سینی

ازلی عشق شرابیندان ایچه‌ن جانا دئدیم

قیلدی بیگانه منی وصلینه همسایه‌یِ هجر

بو سببده‌‌ن من اونا بی‌دل و بیگانه دئدیم

چون اونون خال و رخو قویدو منیم جانیما داغ

زهی دولت، کیم اونون داغی‌لا جان یانا دئدیم

آه و فریادینی بو عاشقِ آشفته‌‌دِل‌ین

قامتی سدره، لبی چشمه‌یِ حیوانا دئدیم

ای «حقیقی» سنی چون زار ایله آغلاتدی غمی

عالمی غرق ائده‌ر اول اشکِ خون افشانا دئدیم



59

یوزون کتابینا تا آیتِ اِله دئدیم

جنابِ حضرتینی جانیما پناه دئدیم

مجرّد ائیله‌دی عشقین منی زمانه‌ده چون

نه فکرِ دُنیی و عُقبی، نه عز ّو جاه دئدیم

آیاغینا یوزومو سالدیم از سرِ اخلاص

منی گدا و سنی پادشاه و شاه دئدیم

دوشه‌نده گلشنِ وجهینده‌ن آیری بلبلِ جان

ساچین کیمی من اونون بختینی سیاه دئدیم

سن اولدون اوّل و آخرده چون مانا هادی

ایکی جهاندا سنی حالیما گواه دئدیم

تجلّی قیلدی جمالیندا واهبِ صورت

بو معنیده‌ن سانا من مظهرِ اِله دئدیم

گؤتوردو پرده یوزونده‌ن حجابِ زلفونون

غلامِ حُسنِ رخون اولدو مِهْر و ماه دئدیم

توتوشدو چرخِ فلک بیرله آسمان و زمین

او دم که فُرقتِ عشقین غمینده‌ن آه دئدیم

«حقیقی»‌یه‌م که بو دور و مدار ایچینده سنی

سریرِ سلطنت اوستونده پادشاه دئدیم



60

او رخون شمعینه چون جانیمی پروانه دئدیم

یاخدی، یاندیردی منی آتشِ هجرانا دئدیم

نئجه زاهدله‌ری پابندِ بلا قیلدی ساچی

نئجه آشفته‌له‌ری چکدی او زندانا دئدیم

یوزونون آیتی‌نین اوّلی چون فاتحه‌دیر

یاز اونون حرفینی سرنامه‌یِ قرآن‌ا دئدیم

قیلمیشام قامتینی سدره‌یِ رضوانا مثال

عاشقه‌م جان ایله اول سدره‌یِ رضوانا دئدیم

قدمِ خاکِ درینده‌ن یوزومو ائتمه‌ن ایراق

زهی دولت که من اؤز رازیمی سلطانا دئدیم

عشوه و غمزه‌له‌ری غارتِ دین ائیله‌ر ایمان

که من اول عینه نیچین کافرِ تورکانه دئدیم

ای «حقیقی» بو ملاحت که رخ‌ِ یاردادیر

یاخدی حسرت غم ایله‌ن باغریمی بِریانا دئدیم



61

سحرده سنبلِ زلفونده‌ن اسدی بادِ نسیم

حیاتِ لَمْ يَزُلْی تاپدی استخوانِ رمیم

وصالِ جنّتینه واصل اولمادی زاهد

اَنانیّت‌ده‌ن اونا مسکن اولدو نارِ جحیم

حروفِ آیتی صد بار قیلمیشام تکرار

ساچینلا قاشینا تشبیه اولاندا نون ایله جیم

بو وجه ایله‌ن که سنی خلقت ائیله‌میش خالِق

نه احتیاج اولا بو حُسن و صورته تعظیم

حیاتِ لَمْ يَزُلْه واصل اولمادی ابدی

یولوندا جانینی هر کیم که قیلمادی تسلیم

«فَرَس» کناره‌یِ «فیل»ده‌ن گئچه‌ر «رُخ»ا قارشی

«پیاده» سورمه‌یی «فرزین»ه «شاه» ائده‌ر تعلیم

نثار قیلماغا عشقین یولوندا جان و جهان

طریقت اهلینه احتیاج اولمایا تکلیم

«حقیقی»‌یه سنی محبوب قیلدی خالِقِ خَلْق

او دم که خلقتِ عالم‌نی ائیله‌دی تقسیم



62

تا ازلده‌ن دوشدو اول یار ایله بازاریم منیم

فُُرقتینده‌ن عرشه چیخدی ناله‌یِ زاریم منیم

رازِ عشقین جانیمین ایچینده ساخلاردیم ولی

عاقبت فاش اولدو گیزلی گنجِ اسراریم منیم

دلبرین یولوندا قربان اولماغا ای متّقی

اولماگیل ناصح که واردیر اوندا اقراریم منیم

شول مُکَرّم، پاکیزه گوهر که یوخدور قیمتی

کیم دورور عالمده اول یارِ وفاداریم منیم

روضه‌یِ رضوان معطّر اولدو از بویِ لبش

تا گُلِ خندانینی گؤرسه‌تدی گُل‌زاریم منیم

سنده‌ن آیری اولماسین یا رب بو چرخِ روزگار

گل که سن‌سین دُنیی و عُقبی‌دا دلداریم منیم

چون «حقیقی» گؤردو اول معشوقه‌نین رخسارینی

دولت و اقبالا یئتدی بختِ بیداریم منیم



63

گل‌گیل که سئومیشه‌م سنی جانانه‌له‌رده من

جان اوینارام یولوندا بو دیوانه‌له‌رده من

ویرانه گؤنلومو غمِ عشق ائتدی چون مکان

بیر گنج بولموشام دلِ ویرانه‌له‌رده من

هر تشنه‌نین که جامی، مصفّا لبین دئییل

ایچمه‌ن حیات آبین او پیمانه‌له‌رده من

شیرین غمینده جانیمی تسلیم قیلمیشام

خسرو حکایتین دئمه‌ن افسانه‌له‌رده من

چون خانقاه و مدرسه و زاهد است و شیخ

حقده‌ن مراد ایسته‌ره‌م اول خانه‌له‌رده من

بیگانه کیمی‌دورور کیم اونا آشنا دییه‌م

یا اولوم آشنا دلِ بیگانه‌له‌رده‌ من

یاخدی «حقیقی» جانینی شمعِ رخوندا چون

یاندیم بو آه و سوز ایله پروانه‌له‌رده من



64 (*)

لمعه‌یِ نورِ تجلّی، آفتابی‌دیر یوزون

لَيْلَةُ الْإِسْرَاء ساچین، ظِلِّ حجابی‌دیر یوزون

احسنِ صورت جمالیندیر ایکی عالمده چون

عَالَمُ الْغَيْب‌ین کلامی، انتخابی‌دیر یوزون

صورتین إِنَّا فَتَحْنَادیر، خطین أُمُّ الْكِتاب

شول جهتده‌ن عارفین يَوْمَ الْحِسَابی‌دیر یوزون

لَيْلَةَ الْمِعْرَاجا اسراءدا رفیق اولدو ساچین

قَابَ قَوْسَيْنی هلالین ماهتابی‌دیر یوزون

لوحِ محفوظوندادیر مُنْزَل تبارک آیتی

قُلْ تَبَارَك شانینه حقده‌ن خطابی‌دیر یوزون

سدره‌دیر سروِ گُل اندامین، رخون اسماءِ حُسن

سوره‌یِ تنزیل خطّ و خالین کتابی‌دیر یوزون

هیأت‌ین شرحینی منطق‌ده‌ن بیان ائیله‌ر فقیه

کنزِ حکمتده‌ن کلامین احتسابی‌دیر یوزون

روشن اولدو جمله‌یِ عالمده وجهین پرتووو

چون «حقیقی»‌نین چیراغی، آفتابی‌دیر یوزون



65

ای جمالین پرتووو چون آفتابی گؤنلومون

صورتین مصحف، خطین أُمُّ الْكِتابی گؤنلومون

دُنیی و عُقبی‌دا سنده‌ن اؤزگه دلدار ایسته‌مه‌ن

چون ایکی عالمده سن‌سین انتخابی گؤنلومون

خضرِ عشق اولدوم منِ آشفته‌ بر یادِ لبت

آبِ حیوانیندا رقص ائیله‌ر حبابی گؤنلومون

زلفِ مشک افشانینی چون شانه قیلدین در صباح

سر به سر توتدو جهانی مشکِ نابی گؤنلومون

لبله‌رین پیمانه‌سینده‌ندیر حیاتی عمرومون

سلسبیلین ساغرینده‌ندیر شرابی گؤنلومون

خاکِ درگاهیندادیر کُحْلِ بصیری عینیمین

زلف و رخساریندادیر نور و حجابی گؤنلومون

چون «حقیقی» فارغم مِن یومِ حشر و احتساب

رحمتین دورونده‌دیر يَوْمَ الْحِسَابی گؤنلومون



66

ای لبین عَيْناً تُسَمِّي سَلْسَبِيلی گؤنلومون

وی رخون شمعِ هدایتده‌ن دلیلی گؤنلومون

روزِ خلقتده‌ن مصوّردیر جمالین عینیمه

نارِ حکمتده‌ن منوّردیر خلیلی گؤنلومون

چون شهیدِ غمزه‌‌یِ یارم منِ آشفته‌‌دل

عشق میدانیندادیر كَانَ الْقَتِيلی گؤنلومون

حسرتینده‌ن وصلی‌نین پیوسته از بهرِ غمت

جاریدیر خونِ جگرده‌ن آبِ نیلی گؤنلومون

استوار ائتدی سنی بر اهلِ اسلامِ سلیم

فاعلِ مطلق که هم اولدور جلیلی گؤنلومون

خاکِ درگاهیندادیر کُحْلِ بصیری عینیمین

مِهْرِ رخساریندادیر نورِ جمیلی گؤنلومون

ای «حقیقی» عشق ایله‌ن سِرِشته‌دیر از «فضلِ حق»

آتش و باد و هوایی، آب و گیلی گؤنلومون



67

ای ساچین ظلمت، رخون مِهر ایله ماهی گؤنلومون

خاکِ درگاهیندادیر اقبال و جاهی گؤنلومون

واجب اولموشدور مانا قیلماق مسخّر عالمی

چون ایکی عالمده سن‌سین پادشاهی گؤنلومون

ای خطین شانینده منزل آیتِ أُمُّ الْكِتاب

لوحِ محفوظوندادیر حق‌ده‌ن گواهی گؤنلومون

حسرتین دردی منی یاخدی فراقین نارینا

جنّتِ وصلینده‌ن اولدو عذرخواهی گؤنلومون

تاجِ خسرودور سنین فضلینده‌ن ای سلطانِ حُسن

فرقِ اقبال و سعادتده‌ن کلاهی گؤنلومون

آفتابِ صورتین زلفِ پریشانیندادیر

شول جهتده‌ن روشن اولموشدور سیاهی گؤنلومون

غمزه‌‌یِ خونریز ایله‌ن قیلدین مسخّر عالََمی

چون خط و خالیندا‌دیر لشکر، سپاهی گؤنلومون

وحدتین کویوندا محو اولدو «حقیقی» تا ابد

طورِ عشقیندیر ازلده تکیه‌گاهی گؤنلومون



68

به تیرِ غمزه‌ چو قیلدین سینه آماجین اونون

دیله‌رسه جانیمی گل، وئرگیل احتیاجین اونون

دلیلِ شمعِ رخو اولدو هر کیمه هادی

ازل سراج ایله یاندیردی حق سراجین اونون

یولوندا صدق ایله هر کیم پیشیرمه‌ز اتمه‌یینی

الینده‌ن آلدی فلک رزق و نان و ساجین اونون

جهانی کفر ایله ایمانا چکدی زلف و رخو

گتیردی روم ایله چین و ختا خراجین اونون

طوافِ کعبه‌‌یِ کویوندان ایسته‌یه‌ن عابد

دیله‌ر که بوسه کُنَد دامنِ حُجّاجین اونون

غمینده چونکه گؤنول اولدو درد ایله‌ن خسته

طبیبِ عشقه دئ‌گیل کیم قیلا علاجین اونون

«حقیقی» خاکِ درینده‌ن باشینا تاج ائتدی

فلکده عرشه ملائک یئتیردی تاجین اونون

No comments:

Post a Comment

Note: Only a member of this blog may post a comment.