جارلاو CARLAV
آگهی تجارتی، آگهی تبلیغاتی، رکلام
مئهران باهارلی
«جارلاو» یئنی‌دئگی‌سی (نوواژه، نئولوژیسم)، آگهی تجارتی، رئکلام و تبلیغات آنلامی‌ندادیر. تورک‌جه‌ده «جار» کؤکو، سه‌س، بان - بانگ[1]، اون، باغیرما، چاغیرما، .... (فارس‌جاسی: بانگ، داد، صدا، صلا، صوت، فریاد، ندا)؛ «جارلاماق» ایسه آنونس ائتمه، بیلدیرمه، آییتما، سؤیله‌مه و ... دئمه‌ک‌دیر.
«جارلاو»ین سون بؤلومو تورک‌جه‌ده آد و فعل‌ده‌ن آد یاپان «–آو»، «–ه‌و» و یا اه‌سکی «-آغو» سون‌اه‌کی‌دیر. «–آو»، «–ه‌و» سون‌اه‌کی گونوموز تورکمان لهجه‌له‌ری‌نده [باتی اوغوزجانین دوغو و گونئی آنادولو ایله قافقاز، ایران و اورتادوغودا وار اولان دوغو لهجه‌له‌ری‌نده] «–وْو»، «-ؤو» اولاراق دا سؤیله‌نیر، بیر سیرا لهجه و آغیزلاردا دا (قاراپاپاق، باتی آنادولو، ...) «-وی»، «–ه‌ی»، «-یی»، وس. بیچیم‌له‌ری‌نه دؤنوشموش‌دور[2].
«–آو»، «–ه‌و» سون‌اه‌کی ایله یاپیلمیش اؤرنه‌ک‌له‌رده‌ن: قاشاو (قه‌شوْو، قشو)، چێلاو (چیلوْو، چلو، چیله‌مه‌ک فعلی‌نده‌ن)، بیله‌و (بیلؤو، بیله‌مه‌ک‌ده‌ن)، ساخلاو (ساخلو، پادگان، سربازخانه، ساخلاماق‌دان)، بۆته‌و (بۆتؤو، بۆتمه‌ک‌ده‌ن)، توُماو (توُموْو؛ آنفولانزا، گیریپ، زوکام؛ توُمماق فعلی‌نده‌ن)، سایلاو[3] (نماینده، مجلس وکیلی، سایلاماق‌دان)، قێراو (قێروْو)، چالپاو (چالپوْو، بوْران)، قاراو (کور، نابینا)، یارلێقاو (لطف، یارلقێاماق‌دان)، مێنقاو (زوکام شدید)، ساقاو (ساقاغوُ، نوعی زوکام اسب)، که‌ته‌و (ورم حلق اسب)، مانداو (استخوان گردن اسب)، آلاو – یالاو (آلاغوُ، اه‌لوْو)، بوُخاو (بوُخوْو)، بوُزاو (بوُزاغێ، بیزوْو)، جێلاو (جلو)، چالاو (چالوْو، پارو)، داغ‌لاو (داغلوْو، داغ کننده)، ده‌مروْو (ته‌مره‌گۆ، نوعی بیماری پوستی)، اه‌ردوْو (آرێتقوُ، آب آلوده حاصل از شستن لباس)، شاید گیره‌و (گرو، رهین)، گۆمروْو (گۆمره‌گۆ، چێنقێراق چان، ناقوس)، کؤسه‌و (کؤزه‌گۆ، ذغال نیم سوخته)، اوْخلاو (اوْخلاغوُ، در تورکیه اوْکلاوا)، زێنقێردوْو (زێنقێرداغوُ، چێنقێرداغوُ؟)، چێرپوْو (چێرپاغوُ)، قوْلاو (قوْلاغوُ، بهره)، یاپاو (یاپاغوُ، پشم بلند بر بدن حیوانات)، بیته‌و – بیده‌و (باکره، اسب اصیل)، اؤلچه‌و (قسطاس، میزان)، ته‌رگه‌و (بررسی، تحقیق)، ایله‌و (ناحیه)؛ بیته‌وی (ناحیه‌ی مجاور و پیوسته)، قوُزای – گۆزئی (قوُزئی، شمال)، ایله‌ی (اطراف، پیرامون)، اینه‌ی (سرازیری، سراشیب)، گۆنئی (جنوب)، کؤسه‌یۆ (شهوت)؛ یئنی‌دئگی‌له‌رده‌ن (نئولوژیسم‌له‌رده‌ن): اوْلای (حادثه)، یاتای (افقی)، یاپای (مصنوعی)، بۆکئی (منحنی)، دیکئی (عمودی)، اوُزای (فضا)؛ اؤده‌و، گؤره‌و، سؤیله‌و (نطق)، تؤره‌و (مشتق)، سێناو (امتحان)، تۆره‌و (مشتق)، ...
اه‌سکی زمان‌لاردا سه‌س و باغیرما، دوروم، اولای و نه‌سنه‌له‌ری آنونس یاپما، بیلدیرمه و تبلیغ ائتمه‌نین باش‌لی‌جا آراجی اولدوغوندان دولایی «جار»ین ایلکین آنلامی سه‌س‌له بیلدیرمه ایدی. سونرالار یازی ایله بیلدیرمه‌یه ده جارلیق دئدی‌له‌ر. ایندی ایسه آنلام گئنیش‌له‌مه‌سی‌یله جار و جارلاو، سه‌س و یازی‌یا اه‌ک اولاراق، باشقا یول و یؤنته‌م‌له‌رله یاپیلان، هر چئشیت آنونس و تبلیغات آنلامی‌ندادیر.
